1 Kronika 10 - Biblia alo Ŋɔŋlɔ Kɔkɔe La Le Eʋegbe Me 1913

Saul ku le aʋawɔwɔ me kple Filistitɔwo.

¹ Filistitowo wɔ aʋa kple Israel; tete Israel-ŋutsuwo si le Filistitɔwo nu, eye wotsi aʋa le Gilboa-toa dzi.

² Filistitowo ɖe Saul kple viawo ɖe nu, eye Filistitɔwo wu Saul viwo, siwo nye: Yonatan, Abinadab kple Malxisua.

³ Ke esi aʋa la nu sẽ ɖe Saul dzi, eye aŋutrɔdalawo va tui la, dzidzi ƒoe le aŋutrɔdalawo ŋuti.

⁴ Tete Saul gblɔ na eƒe adekplɔvi bena: Di wò yi naƒo ɖem, ne bolotɔ siawo magava awɔ funyafunyam o! Ke eƒe adekplɔvi la meli o, elabena evɔ̃ ŋutɔ. Tete Saul tso eƒe yi hedze enu.

⁵ Esi eƒe adekplɔvi la kpɔ be, Saul ku la, eya hã dze yi nu, eye woku.

⁶ Ale Saul kple via etɔ̃awo kpakple eƒe aƒe blibo la woku zi ɖeka.

⁷ Esi Israel-ŋutsu, siwo katã nɔ bali la me, kpɔ be, wòsi, eye Saul kple viawo ku la, wogblẽ woƒe duwo ɖi hesi, eye Filistitowo va nɔ wo me.

⁸ Esi ŋu ke, eye Filistitɔwo va nu ɖe ge le ame tsiaʋawo ŋu la, wokpɔ Saul kple viawo woku ɖe Gilboa-to la dzi,

⁹ eye woɖe nu le eŋu hetsɔ eƒe ta kple eƒe aʋawɔnuwo ɖo ɖe Filistitɔwo ƒe anyigba dzi godoo, ne woaɖe gbe ƒã dzidzɔ sia na woƒe mawuwo kple dukɔ la.

¹⁰ Wotsɔ eƒe aʋawɔnuwo da ɖe woƒe mawu ƒe me, eye wotsɔ eƒe takoloe ku Dagon ƒe xɔ me.

¹¹ Esi Yabes-Gileadtɔwo katã se nusiwo keŋ Filistitɔwo wɔ Saul la,

¹² ŋutsu aʋawɔlawo katã ho, eye wova tsɔ Saul kple viawo ƒe kukuawo yi Yabes; woɖi woƒe ƒuwo de baniti la te le Yabes, eye wotsi nu dɔ ŋkeke adre sɔŋ.

¹³ Ale Saul ku le eƒe vodada de Yehowa ŋu kple Yehowa ƒe nya, si me mele ɖe asi o la ta. Ede ŋɔliyɔlawo hã gbɔ ɖabia gbe wo se,

¹⁴ ke mebia gbe Yehowa ya se o; eyata wòwui, eye wòna fiaɖuƒe la yi ɖe Dawid, Isai vi la si me.