Olaawo 7 - Hapari Zooshapweya

Munsa na Haruni enakatthi ya firawuuna

¹ Aphano Nnyizinku khumuuza Munsa yoori: “Miiyo kooretta wiiya nkhama Nluku khwa Firawuuna na ttwiiyo Haruni wiiya nkhama napiyu awo.

² Weeyo omuuze zooshi epile kuurumiyeeyo, na ttwiiyo Haruni amuuze Firawuuna awaalikhe meezirayiilu aleemo mmuti mwawe.

³ Ila miiyo kinteela wuumisa rooho ya Firawuuna na kinteela wenkeza alama zaka na vitthu zaka zootikinisa nti wa Misuri.

⁴ Ye khanteela wuusilezani, ila miiyo kinteela wookola nkhono aka khwa Misuri, na khwa khaazi khuluzeene za ophuka, kinteela owaalazawo Misuri atthu a Ezirayiilu.

⁵ Na amisuri phi anttelaavo ojuwa yoori miiyo ki Nnyizinku, amana kookola nkhono aka khwa Misuri kiwaalazavo meezirayiilu vakatthi vaya.”

⁶ Munsa na Haruni khuretta etthiipo Nnyizinku awaarumiyeezo.

⁷ Munsa aarina nyaakha thamaaniini na Haruni nyaakha thamaaniini na mittatthu, wakathi aattakhulaniyeevo Firawuuna.

Pakhora ya Haruni enthatuwa khwiiya nyookha

⁸ Nnyizinku khumuuza Munsa na Haruni yoori:

⁹ “Amana Firawuuna awuuzani yoori: ‘Mwirette minjuza,’ omuuze Haruni yoori: ‘Athuule pakhora yawo eeselele enakatthi ya Firawuuna,’ pakhora ya eto entta othatuwa yiiye nyookha.”

¹⁰ Aphano Munsa na Haruni khulawa mpakha wa Firawuuna, noofiya khuretta etthiipile Nnyizinku aawaarumiyeeyo. Haruni khuthuula pakhora etile khweeselela enakatthi ya Firawuuna na mashawuriiya awe pakhora etile khuthatuwa khwiiya nyookha.

¹¹ Aphano naye Firawuuna khuruma olawa okhuweliwa ajuwi na ashawi; na yo khuretta etthiipo khwa oshawi aya.

¹² Wakhula mmote wa yo khusala eesa pakhora yawe na othatuwa nyookha, ila pakhora ya Haruni khumiza pakhora epile.

¹³ Ila Firawuuna khuumisa rooho yawe khuhitakhi onsiileza Munsa na Haruni, nkhama etthiipo Nnyizinku aalupiyeezo.

Pala yamwanzo: Taamu

¹⁴ Nnyizinku khumuuza Munsa yoori: “Rooho ya Firawuuna ti ya nthiti khanteela owaalikha atthu apo olawa.

¹⁵ Olawe wakutthanane Firawuuna supuyeene; ye onlawa woowa omuttho. Weemele nshini wa muuttho osala onweja, olawaka othuule pakhora yawo mmakhono etile yaathatuwiyeeyo nyookha.

¹⁶ Omuuze yoori: ‘Nnyizinku, Nluku wa meezirayiilu, akiruma owuuza yoori: Owaalikhe atthu aka alawe akaaputu n'yaara, mpakha leelo khuntakha okisiileza.

¹⁷ Nnyizinku alupa toono: Ethiito ti enttelaaye wuujuwisa yoori miiyo ki Nnyizinku: khwa pakhora eti kiriina mmakhono kintakha kipiye maati a muuttho Niilu athatuwe eeye taamu.

¹⁸ Swi ziriiye mmuttho zinteela ofwa zooshi, osala onukhamo woohifwayivo. Aphano amisuri khanlawa ovilela anywa maati a mmuttho mphule.’ ”

¹⁹ Nnyizinku khumuuza Munsa theenya yoori: “Omuuze Haruni athuule pakhora yawo ookolele nkhono maati a Misuri, a mmuttho na mpakha a mmatthatta na a mmazuuku athatuwe eeye taamu, Misuri yooshi yiitaale taamu, mpakha zoopo za thaapwa na za mawe.”

²⁰ Munsa na Haruni khuretta nkhama etthiipo Nnyizinku awaarumiyeezo. Haruni khushashula pakhora etile, khujapha maati a mmuttho Firawuuna ari attaapho na mashawuriiya awe, maati apale ooshi khuthatuwa taamu.

²¹ Swi zooshi zaariimo mmuttho mphule khufwa khusala onukhamo woohifwayivo, amisuri khuhisala awahi onywa maati a mmuttho mwaya mphule, nti wooshi waarina taamu.

²² Na yo anamajintta a Misuri khuretta etthiipo na ojuwa waya woovitheya, ila rooho ya Firawuuna nalelo khusala eri yawuuma khuhitakhi onsiileza Munsa na Haruni nkhama etthiipo Nnyizinku aalupiyeezo.

²³ Firawuuna khuzukuluwa khusala alawa owawe khuhijali epile zaya.

²⁴ Amisuri ooshi khulawa khuthipa nshini wa muuttho yoori apatthe maati oonywa, maana maati apale a mmuttho khaari onyweya.

²⁵ Zaaviriye siikhu sapa paata ya Nnyizinku othatusha maati apale a mmuttho.