Mwanzo 29 - Hapari Zooshapweya

Ofiya wa Yaakhumpa nti wa Harani

¹ Yaakhumpa khurutela safwari yawe khulawa mpakha nti oriiye phantte lintthamuwaawo njuwa.

² Siikhu moote, khweekesa nkerekhere wa nttapo khoona nlipu mmote ozukuleliwe ti maphanko mattatthu a pwittipwitthi zirapaleliye. Waari nlipu zaari onywisiwaavo maati, liwe laari ofinikhaniwakaaye nlipu opule laari liwululene.

³ Tiito amakhampuzi aari owejelanakaaye yoori asusise liwe ntthile enkhe nyama zaya maati oonywa, nawiisha khurutiselavo.

⁴ Yaakhumpa khuwoozela amakhampuzi apale araka: “Mweeyo attwiizaku, mwa a vayi?” Yo khujipu araka: “Fweeyo nti eetthu Harani.”

⁵ Ye khuri: “Mwininjuwa Labani ntuulu wa Nahoori?” Yo khujipu araka: “Aaa, nininjuwa!”

⁶ Khuwoozela theenya yoori: “Nkumi?” Yo khujipu yoori: “Aaa, nkumi! Mwanawe Rakeele ti oto antaaye apho na pwittipwitthi za papaawe.”

⁷ Yaakhumpa khulupa yoori: “Nalelo khunaripe, khunafiye wakathi wookusanya maphanko. Mwinkhe maati pwittipwitthi epo mwilawe mwajise opheya.”

⁸ Ila yo khujipu araka: “Khaninwahi, nina yoowejela pwittipwitthi zooshi zikusanyeye attaapha nisusise liwe ntthi lifinikhaniweeyo nlipu, ninkhe pwittipwitthi zeetthu maati zinywe.”

⁹ Eettaka ottakhula etthiipile khusala ata Rakeele na pwittipwitthi za papaawe, mwaasa yoori aari nshuki.

¹⁰ Yaakhumpa noomoona Rakeele mwaana wa halwiye Labani eettaka ota na pwittipwitthi, khulawa khufunula nlipu khwinkha maati pwittipwitthi za halwiye.

¹¹ Nawiisha Yaakhumpa khumpatikha Rakeele khusala alila.

¹² Aphano Yaakhumpa khumuuza Rakeele yoori: “Miiyo ki jaama wa papaawo, ki mwaana wa Rapekha.” Ye khutthira alawaka omuuza papaawe.

¹³ Labani noosiila hapari za Yaakhumpa mwaana wa nlupuwe, khusala atthira alawaka okutthanana. Nonsikana khumpatikha, khunthuula khusala alawana owawe. Yaakhumpa khumuuza Labani zooshi epile zanvireliyeezo.

¹⁴ Aphano Labani khulupa yoori: “Weeyo khweele ojamaayaku, taamu yeetthu moote.” Yaakhumpa khwiikhala mpakha wiisha mweezi ari ottuukho.

¹⁵ Elottelanaka Labani khuri: “Hatha nkhama ojamaayaku, onakhola khaazi mahala? Kuuze phakari yawo.”

¹⁶ Labani aarina aanaawe awiri aakha; otu nwulu aari wiitthiwa Liiya. Nttiitthi aya aari wiitthiwa Rakeele.

¹⁷ Liiya aari woosizila maasho, ila Rakeele aari wooshapweya mwiili awe na omaasho wawe.

¹⁸ Yaakhumpa mwaasa wootuveliwa ti Rakeele, khulupa yoori: “Kintta okhola khaazi nyaakha sapa okilooze mwanawo otu nttiitthi aya.”

¹⁹ Labani khujipu yoori: “Kemaani! Ti yooshapweya wuulooza weeyo zayita onlooza ntthu nkinoko. Osala wiikhala attaapha.”

²⁰ Yaakhumpa khukhola khaazi nyaakha sapa yoori anrale Rakeele. Nyaakha epile sapa ye khoona nkhama siikhu vattitthiiru mwaasa wontuvela channu.

²¹ Ye khumuuza Labani yoori: “Aphano kiloozeni muukhaaka, maana zafiyela siikhu naasiilaniyeezo.”

²² Labani khuwaakhuwela atthu awaatta a mmuti mphule khuretta njampo.

²³ Ila nooripa khunthuula mwanawe Liiya khumwinkha Yaakhumpa khurapalelana.

²⁴ Labani khumwinkha karumeya awe Ziilipa mwanawe Liiya yoori asala anrumeyela.

²⁵ Ochiyeevo, Yaakhumpa khumoona yoori ti Liiya. Ye khulankha olawa omuuzela Labani yoori: “Niini eti okiretteliyeeyo? Miiyo akaari okhola khaazi mwaasa wa Rakeele? Khi kiiswa yaya niini okittettekhaka?”

²⁶ Labani khunjipu yoori: “Fweeyo mmuti mweetthu mphu khanizowereeni onlooza otu nttiitthi nttunkhulu ahinaraliwe.

²⁷ Amana zivira siikhu sapa za njampo ntthi, nintta wuulooza otu nkina, paata onaahitaavo okikholela khaazi theenya nyaakha sapa.”

²⁸ Ye khukhupali, khuvira siikhu epile sapa za njampo la harusi ya Liiya, Labani khunthuula Rakeele khunlooza.

²⁹ Khunthuula karumeya awe Biila khumwinkha mwanawe Rakeele yoori asala anrumeyela.

³⁰ Yaakhumpa khurapalelana Rakeele khuntuvela zayita Liiya. Khurutela theenya onkholela khaazi Labani mpakha nyaakha sapa.

Aana a Yaakhumpa

³¹ Nnyizinku nawoona yoori Yaakhumpa khaari ontuvela Liiya, khumwinkha mavokozi. Ila Rakeele ari woohivokoli.

³² Liiya khwiimittha khumpattha mwaana wanlume, khuntthaja nzina la Ruubeni. Khuri: “Nnyizinku oona ohoowa waka. Aphano phi kinttelaavo oophetiwa ti mannaka.”

³³ Khwiimittha theenya khumpattha mwaana nkinoko, khuntthaja nzina la Simiyooni. Khulupa yoori: “Nnyizinku asiila ohituveli waka, akinkha mwaana nkina.”

³⁴ Khwiimittha theenya swaafu kiina khumpattha mwaana khuntthaja nzina la Leevi, khulupa yoori: “Aphano mannaka onttela wiiya wootuveliwa ti miiyo mwaasa wompatthela aana attatthu.”

³⁵ Khurutela wiimittha theenya, khumpattha mwaana khulupa yoori: “Swaafu eti kinttela onsifu Nnyizinku.” Tiito antthajiyeeyo nzina la Yuuda. Aphano khumwiishela mavokozi.