Mwanzo 27 - Hapari Zooshapweya

Esiyaakha onimparikhiya Yaakhumpa na Ezawu

¹ Esiyaakha ooluvaliye, maasho awe aashokheriye khuhisala oona. Khunkhuwela Ezawu mwanawe otu nwulu araka “Mwanaka!” Ye khujipu: “Lape!”

² Khumuuza yoori: “Miiyo kooluvala siikhu kinfwaavo akijuweeni.

³ Othuule nttetthe lawo olawe ntthuttu wasaye nyama.

⁴ Wiipikhe saana wookituvelavo okitiisele kije, kuuparikhiye kihinafwe.”

⁵ Ezawu khulankha khulawa ntthuttu osaya nyama yoori antiisele papaawe. Rapekha aari onsiila Esiyaakha attakhulanaka mwanawe Ezawu,

⁶ Rapekha khumuuza mwanawe Yaakhumpa araka: “Weyo! Kansiila papaawo amuuzaka ttwiiyo Ezawu yoori:

⁷ ‘Okitiisele nyama yawiipikhiwa wookituvelavo kije, kuuparikhiye mmakhono wa Nnyizinku kihinafwe.’

⁸ Apho mwanaka, osiileze mattakhuzi apa kinuurumaaye, nasaapi eti

⁹ olawe oliphanko la nyama wawaathuule aana a puuzi awiri ooneneva, kite kiweepikhe saaneene anttelaaye ontuvela papaawo.

¹⁰ Onlawanele aje, ooparikhiye ahinafwe.”

¹¹ Yaakhumpa khunjipu mamaawe Rapekha yoori: “Ezawu tu wa waattana ovuzi, ila miiyo wala.

¹² Paapa amana akipapasela ahikisikanani ovuzi kinttela wiiya ntthu woohata, toowo khankiparikhiya ontta okilaani.”

¹³ Mamaawe khumuuza yoori: “Laana yaya eto ti ekikwele miiyo mwanaka. Ila orette eti kiwuuziyeeyo: weettele puuzi epile kuurumiyeezo.”

¹⁴ Aphano ye khulawa khuthuula puuzi khuntiisela mamaawe, khwiipikha wootuvavo yaari weettelaaye ontuvela papaawe.

¹⁵ Rapekha khuthuula kuwo epile zooshapweya za Ezawu mwanawe otule nwulu zaari owawe, khunwalisa Yaakhumpa mwaana nttiitthi.

¹⁶ Khunfinikha na shapala ya puuzi makhono awe na phantte etile yoohiina ovuzi ya mmwisiko mwawe.

¹⁷ Khuthuula etthu yoojiwa yootuva eepikhiyeeyo na phaawu khumwinkha mwanawe Yaakhumpa.

¹⁸ Ye khulawana aphale aariivo papaawe khunkhuwela: “Paapa!” Ye khujipu: “Lape! Weeyo o mwanaka ni?”

¹⁹ Yaakhumpa khumuuza papaawe yoori: “Miiyo ki Ezawu mwanenu wa mwanzo. Katiisa eti mwaakirumiyeeyo. Mwilankhe mwije nyama eti kitiisiyeeyo, nawiisha mwikiparikhiye.”

²⁰ Esiyaakha khumuuzela mwanawe yoori: “Wapattha toovi nasaapiru mwanaka?” Ye khujipu yoori: “Nnyizinku, Nluku enu eetta okiperekheza.”

²¹ Khumuuza yoori: “Nkakisusele apha kuupapasele, kuujuwe nkhama khweele o mwanaka Ezawu.”

²² Yaakhumpa khunsusela papaawe. Esiyaakha khusala ampapasela, khumuuza yoori: “Huula ti ya Yaakhumpa, ila makhono pa Ezawu.”

²³ Ye khuhinjuwi mwaasa wa makhono awe wiiyana ovuzi nkhama apa a ttwiiye Ezawu na khumparikhiya.

²⁴ Khumuuzela theenya yoori: “Weeyo o mwanaka Ezawu?” Ye khujipu: “Aaa, ti miiyo.”

²⁵ Aphano khuri: “Okitiisele apha nyama yaya eto osayiyeeyo kije, yoori kuuparikhiye.” Yaakhumpa khumweettisela khuja na khumwinkha viinyu khunywela.

²⁶ Aphano Esiyaakha khumuuza yoori: “Okaattame mwanaka okipatikhe.”

²⁷ Yaakhumpa khumwaattama papaawe khumpatikha. Esiyaakha khusiila muuru wa kuwo zawe, aphano ye khumparikhiya araka: “Muuru wa mwanaka muuru wa nshapa looparikhiyiwa ti Nnyizinku.

²⁸ Nluku awinkhe mmatte wa pinkuuni na oruwera wa vathi, peewu zawaatta na viinyu yawaatta.

²⁹ Khapila zawaatta zuurumeele weeyo, na mahimo awaatta ookokhorele. Wiiye Mbwana wa attwiizo, na aana a mamaawo ookokhorele weeyo. Oolanikha pi apale anttelaaye wuulaani, na ooparikhiyiwa pi apale anttelaaye wuuparikhiya.”

³⁰ Paata Yaakhumpa oparikhiyiwa ti Esiyaakha papaawe, ye alaakavo aphale, nasaapiru ttwiiye Ezawu khufiya alankhaka wuusaya.

³¹ Naye khwiipikha etthu yoojiwa yootuva khuntiisela papaawe, khumuuza yoori: “Mwilankhe paapa mwije nyama eti keetteliyeeyo osaya mwikiparikhiye.”

³² Papaawe khumuuzela yoori: “Weeyo o paani?” Ye khuri: “Ti miiyo Ezawu, mwanenu otu wa mwanzo.”

³³ Esiyaakha khusuthuwa channu khusala athukumela khulupa yoori: “Khi otule apatthiyeeyo nyama khukitiisela ti paani? Weeyo ohinate miiyo kaja keesha. Kamparikhiya, ti wooparikhiyiwa!”

³⁴ Ezawu noosiila mattakhuzi apale a papaawe khwiiphiiriwa khulila venkivene, khunvekela papaawe yoori: “Na miiyo paapa mwikiparikhiye!”

³⁵ Ye khulupa yoori: “Aatiiyevo ttwiiyo apha khukittettekha, khuthuula parakha yawo.”

³⁶ Ezawu khulupa yoori: “Eto swaafu ya phiiri akittettekhaka. Ti maana ootthajiwa nzina la Yaakhumpa. Yamwanzo akinyakanya lifunku laka la omwaana wamwanzo. Apho theenya akinyakanya parakha yaka. Paapa khamwipweheeni hatha parakha khwa miiyo?”

³⁷ Esiyaakha khujipu: “Miiyo kanthawaza Yaakhumpa yoori eeye Mbwana awo weeyo na ajamaazo ooshi anttela onrumeyela. Onteela wiiyana tiriku yawaatta na viinyu. Kuurettele niini miiyo mwanaka?”

³⁸ Ezawu khumuuzela papaawe: “Mweeyo paapa khamwisalaneeni hatha parakha? Na miiyo mwikiparikhiye!” Khusala alila anyakulaka.

³⁹ Aphano Esiyaakha khunjipu: “Weeyo onttela wiikhala ohali woolepelana na miti za oruweriwa, ohali woothowawo mmatte wa pinkuuni.

⁴⁰ Weeyo onttela wiikhala khwa phanka yawo na onttela onrumeyela ttwiiyo. Amana weeyo ovilela theenya, ontta olaamo nthwaapu mwaya mphu.”

⁴¹ Ezawu khwiiphiiriwa ti ttwiiye mwaasa wa parakha etile enkhiweeyo ti papaawe. Khusala oopuwela toono: “Siikhu za matthaka a paapa ziri kharipu. Amana afwa miiyo kintta omuula ttwiiyaku Yaakhumpa.”

⁴² Wakathi asiiliyeevo Rapekha mattakhuzi apale aari ottakhulaaye mwanawe otu wamwanzo Ezawu, ye khunkhuwela mwanawe Yaakhumpa otu nttiitthi aya khumuuza yoori: “Woone, shawuri ariinaazo Ezawu pi zootakha owuula.

⁴³ Apho weeyo mwanaka osiile eti kiniwuuzaaye. Otthire nasaapi ethiiti, weette wa nlupwaaka Labani aniikhalaaye nti wa Harani.

⁴⁴ Weekhale ottuukho mpakha ttwiiyo omwiishe okatipukha wawe.

⁴⁵ Amana omwiishela okatipukha wawe na asahawu eti onretteliyeeyo miiyo kintta wuuperekheza nhupi yoori ote. Akintakha okipwetheya aanaaka oowiiri siikhu moote!”

⁴⁶ Aphano Rapekha khulawa omuuza Esiyaakha yoori: “Akituveliweeni ohaayi aka wooshi mwaasa wa aakha a ahiiti apa awaaraliyeeyo Ezawu. Amana Yaakhumpa na ye awaarala aakha a tuniya ethiiti miiyo kinhithari ofwa.”