Mwanzo 16 - Hapari Zooshapweya

Ovokoliwa wa Esumayila

¹ Wakathi aya opo, Suhuriiya muukha wa Eburamu khaari ovokola. Ye aarina njaazi mmote wa Misuri aari wiitthiwaaye Hajira.

² Siikhu moote, Suhuriiya khumuuza mannawe Eburamu yoori: “Nnyizinku khanikinkha mwaana, apho orapalelane njaazi aka, khinjuweya kimpatthaka mwaana khwa ye.” Asiiliyeevo toole, Eburamu khukhupalela mattakhuzi apale a muukhaawe.

³ Suhuriiya khunthuula njaazi otule khumwinkha Eburamu yoori eeye muukhaawe wa phiiri. Vitthu epi zaarettikhaniye Eburamu arina nyaakha khumi eekhalaka tuniya ya Kanaani.

⁴ Eburamu khurapalelana Hajira, ye khwiiya wa wiimittha. Ooniyeevo yoori eemittha khwaaza ontwayifu n'hano awe.

⁵ Aphano Suhuriiya khumuuza Eburamu yoori: “Miiyo kanthuula njaazi aka khuwinkha, ye noojuwa yoori eemittha aaza okitwayifu. Okitwayifusha opu anikirettelaaye Hajira, khahi etthu ya shariya, ti weeyo onintakhelaaye. Nnyizinku ti aniphuke miiyo na weeyo.”

⁶ Eburamu khunjipu Suhuriiya yoori: “Ye nalelo njaazi awo, onrettele khwa nanna ontakhaazo.” Aphano Suhuriiya khwaaza omwiina Hajira mpakha khufiyelela otthira.

⁷ Nlayikha la Nnyizinku khunsikana Hajira n'yaara eemeliye kharipu na naattuuttu wa maati aattameliyeeyo tarikhi ya Shuuri.

⁸ Nlayikha ntthile khumuuzela liraka: “Weeyo Hajira njaazi wa Suhuriiya! Onlankha vayi wala ontta vayi?” Ye khujipu: “Kinintthira nhano aka Suhuriiya.”

⁹ Nlayikha la Nnyizinku khumuuza yoori: “Orutele wa nhano awo na wanshututele.”

¹⁰ Khumuuza theenya yoori: “Kinteela waattisa ojama awo khwa nanna ohinaalakeyaaye.”

¹¹ Khumuuza theenya nlayikha la Mbwana yoori: “Weemittha onteela ompattha mwaana ontthaje nzina la Esumayila, mwaasa yoori Nnyizinku oona ohoowa wawo.

¹² Ye onteela wiiya nkhama puuru wa ntthuttu; onteela wiiya muumani wa atthu ooshi, na yo anteela wuumana na ye, na onteela wiiya wa waattuwana na attwiize.”

¹³ Ntthi laari nzina Hajira amwinkhiyeeyo Nnyizinku, otule anttakhulaniyeeyo yoori: “Weeyo o Nluku onikoonaaye,” maana aalupiye yoori: “Miiyo kamoona otule anikoonaaye?”

¹⁴ Tiito nlipu aya opule oniitthiwaaye Beeri-Laayi-Rooyi. Nlipu aya opu ori enakatthi ya Kateeshi na Peereti.

¹⁵ Hajira khumpattha mwaana wa Eburamu, na Eburamu khuntthaja nzina la Esumayila.

¹⁶ Wakathi Hajira ampatthiyeevo mwaana otule, Eburamu aarettiye arina nyaakha thamaaniini na sitha.