Meepereewu 7 - Hapari Zooshapweya

Melikizeteekhi, mfwalume na namalokozela wa tiini

¹ Melikizeteekhi oto aari mfwalume wa sitati ya Salemu na namalokozela wa tiini ya Nluku Nwulu wa Pinkuuni. Ye aakutthananiye Eburahiima wakathi aari orutaavo paata ya owaashintta afwalume. Melikizeteekhi khumparikhiya.

² Othuuto theenya Eburahiima amwinkhiyeeyo lifunku la khuumi la zooshi. Yamwanzo nzina lawe lina maana a “mfwalume wa shariya” ya phiiri “mfwalume wa Salemu,” enlupaaye yoori “mfwalume wa heeri.”

³ Woohijuwiwi papaawe, wala mamaawe, ojama awe, omwanzo wa siikhu zawe, wala mwiisho wa ohaayi awe, ila wawumpiwa nkhama Mwaana wa Nluku, khwiiya namalokozela wa tiini khwa mileele.

⁴ Mwishitahi ottunkhulu awe, hatha papeetthu Eburahiima aamwinkhiye ye lifunku la khuumi khwa vitthu aapatthiyeezo nvittha.

⁵ Nkhama enlupaazo kano za Munsa, anamalokozela a tiini atthaapo aari ojama wa Leevi, ana shariya opwekherela lifunku la khuumi la attwiize eeyiyeru pure ojama wa Eburahiima.

⁶ Ila Melikizeteekhi aheeyiyeru pure wa ojama wa Leevi, ye aapokhereliye lifunku la khuumi aalaziyeeyo Eburahiima, ye khumparikhiya Eburahiima othuuto ahitiweeyo.

⁷ Khayiivo hatha shaakha nsimaana oparikhiyiwa ti nttunkhulu.

⁸ Khwa phantte ya anamalokozela a tiini, lifunku la khuumi limpwekheriwa ti anaatamu anfwaaye. Ila khwa phantte ya Melikizeteekhi, lifunku la khuumi limpwekheriwa ti ntthu ariiye haayi nalelo.

⁹ Enwaheya olupa yoori, hatha Leevi otule ampokherelaaye mafunku a khuumi, enkha lifunku la khuumi khwa Eburahiima,

¹⁰ maana wakathi Melikizeteekhi akutthananiyeevo Eburahiima, Leevi aari ahinavokoliwe.

Yinsa ori nkhama Melikizeteekhi

¹¹ Eriwaka yaari owaheya opattikhana okhaamili khwa ohaakhimu wa aleevi, kano apwekhereliyeeyo atthu a Ezirayiilu zaari olankhaaye nkatthi wa ohaakhimu opule, khaari ohithajiya opuwa haakhimu wa tiini nkina, nkhama etthiipo aariizo Melikizeteekhi khahiyo nkhama aariizo Haruni?

¹² Weekhweele amana wiiyavo ozukulisiwa wa ohaakhimu, theenya mpakha wiiyevo ozukulisiwa wa kano.

¹³ Maana otule anlupeziwaaye vitthu zaya epo ti wa lihimo likina, khaarivo hatha ntthu mmote wa lihimo laya nttho aarumeyiyeeyo va alitaari.

¹⁴ Maana enjuwiwa saaneene yoori Mbwana eetthu ojama wa lihimo la Yuuda, nttinttho Munsa ahilupezeeni hatha etthu monkoni wa ohaakhimu.

¹⁵ Eto yaya yajithoonyeza saaneene wakathi apuwiyeevo namalokozela wa tiini woofwarikhana nkhama Melikizeteekhi.

¹⁶ Ye aretteya wiiya haakhimu wa tiini, woohiiyi mwaasa wa ojama wa lihimo la Leevi, ila khwa owahi wa ohaayi woohiina mwiisho.

¹⁷ Maana khwa ye yalupiwa yoori: “Weeyo onamalokozela wa tiini wa mileele, nkhama etthiipo aariizo Melikizeteekhi.”

¹⁸ Oruma opule wa raku walaziwavo maana waari woottettheya na woohifwayi.

¹⁹ Maana kano khikhamilikhiseeni hatha etthu. Nasaapi eti Nluku aninkha nroromelo nwulweene, otthuupo pi onnattamanisaaye Nluku.

²⁰ Epo zaya khirettikhaneeni woohiivo olaphisana. Atthu akina aretteya wiiya mahaakhimu a tiini woohiivo olaphisana.

²¹ Ila ye aretteya wiiya haakhimu wa tiini khwa olapha, wakathi Nluku aamuziyeeyo yoori: “Mbwana alapha na khanrutela nyuma, weeyo o namalokozela wa tiini khwa mileele.”

²² Khwa ethiito Yinsa aretteya wiiya nroromelo wa osiilana nwulweene.

²³ Anamalokozela apale a tiini aarivo awaatta, maana ofwa waari owaalikhisa orutela khaazi yaya.

²⁴ Ila mwaasa wa Yinsa wiiya haayi khwa mileele, ohaakhimu awe khuniisha.

²⁵ Tiito, ye onaaye owahi mileele wa owoosuru apale animwaattamaaye Nluku khwa ye, maana meekhazi awe ooshi aniiya a owaavekelela yo.

²⁶ Nanna ya haakhimu nwulu wa tiini naari onhithajiyaaye oniiya nkhama toono: nttakatthifu, woohiina paathuli, watwahara, woophakuwana na anatwampi, woottitthimisiwa zayita pinku.

²⁷ Ye khanihithajiya, wiiya nkhama mahaakhimu awulu a tiini akina, aninkhaaye wakhula siikhu twaha, yamwanzo khwa twampi zaya na nawiisha khwinkha khwa twampi za atthu; maana epo ye aretta khwa swaafu moote paasi ojinkha twaha ye mweenyewe.

²⁸ Maana kano zawaathawula mahaakhimu awulu a tiini atthu antteettheyaaye; ila khwa olapha otiyeeyo paata ya kano za Munsa, Nluku anthawula Mwanawe khaamili wa mileele.