Khaazi 3 - Hapari Zooshapweya

Ovonisiwa wa ntthu woorakala

¹ Siikhu moote Pheeturu na Yaahaya aari weetta Nyuupa Yoosifwiwamo wakathi wa saakhentta.

² Aarettiye athuuliwe ntthu aavokoliweeyo ari woorakala. Oto aya wakhula siikhu aari otthiwaka vanlako wa Nyuupa Yoosifwiwamo, onittheliwaaye Nlako Wooshapweya, yoori asala awaavekela zimola atthu apale aari oviramo.

³ Amooniyeevo Pheeturu na Yaahaya aviraka Nnyupa Woosifwiwamo, khusala awaavekela zimola.

⁴ Pheeturu na Yaahaya khunkhontolela maasho khumuuza yoori: “Oneekese fweeyo!”

⁵ Mwinyi otule khusala aweekesa, awejelaka opwekhera etthu ya winkhiwa pa yo.

⁶ Pheeturu khulupa yoori: “Akina feeta wala weero, ila kiniwinkha ethiiti kiriina. Khwa nzina la Yinsa Al-Masiihu wa Nazareeti, lankha weettette!”

⁷ Khunkholela nkhono nlume awe khunlansa. Nasaapiru moolu awe na khoza zawe khookowa.

⁸ Khwiirukha khweemela khwaaza weettetta. Khuvira Nnyupa Woosifwiwamo vamote na yo, eettaka wiirukha ansifwaka Nluku.

⁹ Wakathi atthu ooshi amooniyeevo eettaka weettetta na ansifwaka Nluku,

¹⁰ khufwahamu yoori mwinyi othuutule aari okhitirakaaye wiikhala va Nlako Wooshapweya wa Nyuupa Yoosifwiwamo Nluku khusala alola zimola. Ooshi aya khwiiya ootikinisiwa na oshanka channu khwa vitthu zanrettikhaneliyeeyo.

Oshaahiti wa Pheeturu Nnyupa Woosifwiwamo

¹¹ Nazimola otule ankholeliyeevo Pheeturu na Yaahaya. Atthu ooshi khwiiya ootikinisiwa, khusala atthirela attaaphale aarivo Pheeturu na Yaahaya, puuro yaari wiitthiwaaye Livenu la Seleyimaana.

¹² Ooniyeevo vitthu epile, Pheeturu khuwooza yoori: “Attwiizaku meezirayiilu, mwashankisiwani khwa vitthu epi? Wala mwinneekesa ni nkhama enriwaaye ntthu otu eettetta khwa owahi weetthu ama emaani yeetthu?

¹³ Nluku wa Eburahiima wa Esiyaakha na wa Yaakhumpa, Nluku wa amarehemu apapazetthu anttitthimisa karumeya awe Yinsa, othuutule mweeyo mwaawenkhiyeeyo atthu yoori amuule na khunkatthala vakatthi wa Pilaatu, wakathi ye aalakeliyevo onfukula.

¹⁴ Mweeyo mwankatthaliye Nttakatthifu, Nashariya, khuveka yoori afukuliwe namahusuti.

¹⁵ Mweeyo khumuula mweenyewe ohaayi, ila Nluku khunsisimula muufwa fweeyo na mashaahiti a vitthu zaya epo.

¹⁶ Mwaasa wa waamini nzina la Yinsa, nzina nttinttho lanvonisa mwinyi otu mwinimoonaaye na mwininjuwaaye. Amini entaaye khwa Yinsa yamwinkha ekumi ya ekhweele, nkhama etthiipo mwinoonaazo vakatthi venu mooshi.

¹⁷ “Aphano attwiizaku, miiyo kajuwa yoori mwaarettiye hatha mwihijuwaka na anamalokozela enu.

¹⁸ Ila Nluku aretta etile yaalupiweeyo raku pi manapiyu ooshi araka: Al-Masiihu awe aari oteela ohoowa.

¹⁹ Mwithupwiye mwirutele wa Nluku yoori twampi zenu ziiye za oswaamihiwa,

²⁰ yoori ote wakathi wa ovumula wa olankha phantte ya Mbwana na amperekhe Yinsa, othuuto atthomiweeyo yoori eeye Al-Masiihu.

²¹ Yinsa ona ya wiiya pinkuuni mpakha ofiya wakathi enttelaavo ozukulisiwa vitthu zooshi nkhama aalaleyiyeezo Nluku raku khwa manapiyu awe.

²² Maana Munsa alupa yoori: ‘Mbwana Nluku onlawa ampuwise khwa attwiizenu napiyu mmote nkhama miiyo; mwinsiileze zooshi anttelaaye owuuzani.

²³ Otule ahininsiilezaaye napiyu aya oto, ontta ophakuliwavo vakatthi wa atthu a Nluku atapanyeye.’

²⁴ “Manapiyu ooshi, waaza Samuweele na apale akinoko paata ya ye attakhula monkoni wa siikhu epi za leelo.

²⁵ Mweeyo mwaanamarithi a manapiyu na wahati Nluku aarettaniyeeyo amarehemu apapazenu, ye aamuuziye Eburahiima yoori: ‘Khwa peewu yawo atthu ooshi a voolumwenku anttela wiiya ooparikhiyiwa.’

²⁶ Nluku anthawula Karumeya awe, khumperekha omwanzo vakatthi venu mweeyo, yoori ooparikhiyeni amana mwilikha oretta vitthu zootakhala.”