1 Akorintiyu 8 - Hapari ZooshapweyaEtthu yoojiwa ya otwaheliwa sanamu 1 Monkoni wa vitthu zoojiwa zootwaheliwa sanamu, ninoona yoori fooshi ninaaye ojuwa. Ojuwa ontana ojikhupali, ila pheta enjeka. 2 Otule anuupuwelaaye yoori onjuwa etthu, nalelo khanajuwe nanna aneettelaazo ojuwa. 3 Ila otule animphetaaye Nluku, oto onjuwiwa ti Nluku. 4 Nakataalikha, monkoni wa etthu yoojiwa yootwaheliwa sanamu, ninjuwa yoori sanamu khinthoonyeza hatha etthu voolumwenku na Nluku ori mmote paasi. 5 Maana, hatha nkhama eetta wiiyavo akina ankhuweliwaaye yoori miluku, waaza otulu mpakha vathi, weekhweele awaapho pure a miluku na ambwana, 6 ila khwa fweeyo, Nluku ori mmote paasi, Paapa, otule ompiyeeyo vitthu zooshi na fweeyo niwaapho khwa ye; na Mbwana mmote Yinsa Al-Masiihu paasi, othuuto vitthu zooshi zumpiweeyo khwa ye, khwa othuuto fweeyo neeyavo. 7 Khwa etthiipo, khahiyo atthu ooshi ariina ojuwa waya opo. Akinoko nalelo azowera sanamu, anja etthu yoojiwa yaya eto nkhama twaha ya sanamu; wiiya shawuri zaya pi zoottettheya, aniiya ookwakhula. 8 Nakataalikha, etthu yoojiwa khinniretta wiiya atthu okhupaleliwa omaasho wa Nluku. Khaninziti amana nihiji, ama khanitepa amana nija. 9 Khwa zooshi, mwiiyane phoole yoori otaphuliwa weenu ohiretteye wiiya etthu ya owaakwakwanttula apale oottettheya. 10 Maana, nkhama ntthu ona shawuri zoottettheya khuwoonani mweeyo mwiriina ojuwa waya opo mwijaka nzaawiya, na ye khaniweezelani oja epile etwaheliweeyo sanamu? 11 Etthiipo, ttwi oto woottettheya, otule Al-Masiihu anfweliyeeyo, ontta otapanyeya mwaasa wa ojuwa opule weeyo oriina. 12 Amana weeyo onkosa ttwiiyo khwa nanna nkhama eto, otuthulaka ojuwa wawe woottettheya, oninkosa Al-Masiihu. 13 Nakataalikha, nkhama etile miiyo kinjaaye enintapanya ttwiiyaku, akinteela oja theenya nyama, yoori kihintapanye ttwiiyaku. |
© 2020, Wycliffe Bible Translators, Inc. All rights reserved.
Wycliffe Bible Translators, Inc.