Zaburi 1 - EBIBILIA ENCHENU

EGETABU KI’E RITANG’ANI ( 1—41 ) Omogoko bw’ekeene

¹ Nasesenirie omonto otari gotunyana chingencho chi’abakori amabe, n’otari kobwatia chinchera chi’abanyabibe, gose otari gosanga amo nabwo bagochecheria.

² Korende richiko ri’Omonene nigo rikomogokia mono, na okorengereria kwaye gwonsi nigo kore ase richiko erio, omobaso na obotuko.

³ Ere nigo anga buna omote osimekire rooche mbarabare, oyokwama amatunda amaya ekero engaki yaye egoika, na amato aye tari kwoma ngaki ende yonsi, na rinde rionsi agokora nigo agosesenigwa.

⁴ Abakori amabe tibari bo, korende nigo banga buna omoiriro okoirurukigwa nomwaga.

⁵ Ase ayio, abakori amabe tibagocha gwekengera ase rituko ri’ekiina, gose abanyabibe tibagosangererekana amo n’abanyene oboronge.

⁶ Omonene nigo akoraa enchera y’abanyene oboronge, korende enchera y’abakori amabe nesire.