Yohaana 8 - NEAJEEDA EESH BEA BUUNEESSEAN

¹ ng'atta gawa Yeesu uhuuda gijeeda masaytunajeega.

² Iimuchchu nea ghaghar gayeew sakteayda gabiikta jeeda gheeda sibatta Aseetta; gaweay headaannyi buuneessean ak gopteada ak gonealshi.

³ Hean gweadu ng'oorshoodiga ea Farisayajeega gatmooni subwardang'eanyi nea gamealuul, geanung' ghamiinaada aba bugusta buuneeda.

⁴ Ng'atta geyeeshsha niny, “Ginealshoochcheanda, gatmoani ghwanyawa geabwardang'eanyi nea gamealuul.

⁵ Aba jeeda deaweeda gagooneasa Muusa uurda jea eefta lagheanga dea uurji nii. Giyeaniin ang'iing'i appadaydeaba gatmoani?”

⁶ Gwarukuta ng'asheanji nea simooda gil ak abeeda ghwanyas gheatta gichchea eahaaktaawa. Gageanu Yeesu ak gabuy uhuudaanyi, ak ghang'waar ng'eanyi aba monneeda.

⁷ Sinnyaash muuchchi, ghamiinaada ak gwayeeshsha, “Siida nyaa riing'a aba jeedeang'wa doawa siida madeeda jea gafta lagheaneeda.”

⁸ Ng'atta gabiikta gabuy uhuuda, ak ghang'waar ng'eanyi aba monneadaannyi.

⁹ Iiy ng'asheanji hean gabadiinnagi nea gosheeda gweargwa. Geanung'wa heeda Yeesu nea gaba geaw sea gatmootta minaada aba madeadaannyiin.

¹⁰ Diiw geaw Yeesu gwayeeshsha gatmootta, “Iyya, gwanda yeenu saawa? Manda eara siyagi argweakseeyi?”

¹¹ Gwayeeshsha niny, “Mandana eara akkalealla, Ng'uttamiida.” Gwayeshsha Yeesu, “Abeeda eara aniini ea maydeargweakseey; una, ak ea adagudisni ring'eeda.”]

Yeesu weeshinda ng'eanyiida gil

¹² Gabiikta Yeesu gichcha gobalool saawa nea gwayeeshsha, “Aniini geawoschi weeshinda ng'eanyiida; siida eadu geeshteanyu maygwaneayeewa jeeda misaneeda, niny abeeda gaygwandeawa weeshinda eaweega.”

¹³ Gwayeeshsha Farisayajeega niny, “Ang'iing'i gimuuwu ng'asheega badaydaang'u nea gubwageaw ak ghamneawa muwwunoodaang'u ea mii huumwa gil.”

¹⁴ Ghwasha Yeesu nea gwayeeshsha, “Eara damuuwwu ng'asheega badaydeanyu nea gabwageaw, ghanalli gideaba muwwunoodeanyu huumwa, aba gideaba aniini ghaanalli heedealeabu ak ghaanalli heedeagalli. Dukku agooga ghanyea mwoanali heedealeabu ghana heedeagalli.

¹⁵ Agooga iissa gorgweaksiini buuneeda ng'asheega saseeda, amadukku aniini ea maydeargweaksa siida.

¹⁶ Ama eara deargweaksa girgweaksiindeanyu gaba huumwa aba gideaba aniini mwabwageaw geandeawi dea ajeaknean.

¹⁷ Aba jeeda deaweededeang'wa geang'waar gideaba muwwunoomba fii iyyeenya huumwa;

¹⁸ aniini geamuuwwu ng'asheega badaydeanyu ak eara Bwaabwa ajeaknean earada gamuuwwu ng'asheega badaydeanyu.”

¹⁹ Ak geeyeeshsha niny, “Ghwandaang'u gwanda yeenu?” Ghwalamda Yeesu ak gwayeeshsha, “Agooga mwoanalaan aniini ghana Bwaabwa; aminyeetta ghwanyawa ghoanallaan aniini, ghwanyawa gajanala eara Bwaabwa.”

²⁰ Ng'asheesu gwargu aba gah heeda siyiina gheaseeda aba damanda anealsheewa aba jeeda Gheeda sibatta Aseetta. Nea abeeda ghanyea manda siida aheaksa geattinda ghoang'ng'waay aba gideaba mii ghwahitta damandaannyi.

Moammuusi aweayeena heechcheadawa

²¹ Gwayeeshsha gichcha saawa, “Aniini neawi heechcheadawa, amaduw gajagaseadayyean, ak gajameewwiisiina jeeda ring'egeagwa; nea heeda eawi aniini amwajoammuusa ahinni.”

²² Hean gwayi fuga Yahuudi, “Ak gaygwanuus geawi, anda gwayi heedeawi mwajoammuusa agooga apkaani?”

²³ Gwayeeshsha saawa, “Agooga goleabu heeda hing'aada nea aniini gealeabu heettiyeada, gobeayi ng'eanyiini, aniini meabeahi ng'eanyiini.

²⁴ Geayeeshshnineegwa gideaba gajameewwiisiina jeeda ring'eegeagwa, aba gideaba gajameewwiisiina jeeda ring'eegeagwa ea eeghus amwasa gideaba siida aniini.”

²⁵ Geyeeshsha niny, “Ang'iing'i guwosi ng'eaha?” Gwayeeshsha Yeesu, “Ammwadi ghwanyawa nearukuneegwa.

²⁶ Geandeawi ng'asheega saang'a jea dargu ea gea jea deargweaksiinaneegwa, amaduw siida ajeaknean ea huumwa, nea gearukusi ng'eanyiida ng'asheega eayiing'si headaannyi.”

²⁷ Eamajeeng'na saawa gideaba Yeesu gobaloola saawa badayda Bwaabwa.

²⁸ Gwayeeshsha Yeesu, “Iyoogatkachchi Balleanda Siida, abeeda gajanala gideaba siida aniini, ea gideaba mwammuusi dasin gida wassean aba gheambalmeedeanyu geaghus dargu ng'asheega anaalan Bwaabwa.

²⁹ Siida ghayi ajeaknean geandeawi niny; moang'ng'wa gwanung'usean heeda nea gabwageaw, aba gideaba iissa geasinnyi galeagasean ng'asheekka bwariiyiin.”

³⁰ Damanda baloola, hean ghamwas fuga saang'a.

Fuga abal geat ea soomjooga

³¹ Gwayeeshsha Yeesu fuga Yahuudi mwas niny, “Asi iyoang'ng'waannyi ng'asheegeasu anaalleagwa, gajahuuwa ginealangeasu bea huumwa,

³² gajanala humeanda ak abeeda humeanda gaygagooneegwa gibaldeaba geat.”

³³ Ghwasha Saawa niny nea gwayeeshsha, “Aseasa geewoschi jeatta Abrahaamu nea eara heeda ghayi ghanyea miyeahuuwa soomjooga sii. Abeeda ginyaashi naaha ng'asheanji bea gideaba, ‘Gajeanyasa gibaldeaba geadiin?’”

³⁴ Ghwasha Yeesu nea gwayeeshsha saawa, “Aba huumwa aba huumwa, geayeeshshineegwa, gilinyoo ea sihi nyoo gwasna ring'eeda soomjeanda ring'eeda.

³⁵ Soomjeada meabiitteena ghoah galeagasean; balleanda gobiitta ghoah galeagasean.

³⁶ Balleanda igoneegwa gibaldeaba geat gajooppala geat huumwa.

³⁷ Ghaanalli gideaba agooga gowoschi jeatta Abrahaamu; ak eara ghamneawa googaseadayyi gideaba gajanuusean aba gideaba manda ng'asheandeanyu jeesingeagwa.

³⁸ Aniini geargu ng'asheega eadeaksi heeda Bwaabwa, nea agooga goosnayi ng'asheega rukuneegwa ghweanigeagwa.”

³⁹ Ghwasha Saawa nea gwayeeshsha, “Ghweandeanya Abrahaamu.” Gwayeeshsha Yeesu saawa, “Inyeeda ghwanyawa gowoschi diibiga Abrahaamu, gajasna gida ghayi sin Abrahaamu,

⁴⁰ ak ghameawa googaseadayyi anuusean, siida rukuneegwa humeanda eayiing'si heeda Aseetta; nii mii gidasin Abrahaamu.

⁴¹ Agooga goosinnyi ng'asheega sin ghweanigeagwa.” Gwayeeshsha Saawa niny, “Aseasa meewosi diibiga sishuwaanda; geendeawi Bwaabwa assakkalealla, nea Aseetta.”

⁴² Gwayeeshsha Yeesu saawa, “Inyeetta ghwanyawa Aseetta ea Ghweandeang'wa gil, gajabwariinyaan, aba gideaba aniini gealeabu heeda Aseetta; aniini mwawuuni aba uhuudeanyu gweannean siida ajeaknean.

⁴³ Ghwasaan agooga anda moanali gideargu? Nii gweagu gideaba moammuusi olleeysiina iit ng'asheandeanyu.

⁴⁴ Agooga gobeayi ghweandeang'wa was Meang'nyeandeenda ak iissa googasayi asna gitta bwariiy ghweandeang'wean. Niny gabay gwanuusa buuneeda ghang'eada mwadi, niny iissa ea madobiiwsiina humeanda aba gideaba manda jeadaannyi humeanda. Iissa irugu ng'uyyeega gwargu aba gitta biit siratta ninyiin, aba gideaba niny gaba ng'uyya, ak ea ghweanda ng'uyyeega.

⁴⁵ Aniini geargu huumwa ak ghoaw gidamoamwaseawanaan.

⁴⁶ Aba jeedeang'wa gajeang'eaha gil jea gwargu gideaba geabea riing'a? Asi abeeda iyearukku huumwa abeeda ghwasaan andak ea moamwasaan?

⁴⁷ Siida Aseetta iissa goleeysiit ng'asheega Aseetta; ak ghamneawa agooga ea molleysiini iit aba gideaba mowosi fuga Asetta.”

Yeesu ea Abrahaamu

⁴⁸ Ghwasha Fuga Yahuudi nea gwayeeshsha, “Neada ea meattoabiiwi rukunooda gideaba guwosi siida Samariya, ak gubwadi gideaba gindeawi meangeenda?”

⁴⁹ Ghwasha Yeesu ak gwayeeshsha, “Aniini meandeawani meangeenda; aniini iissa ghawalli gheang'da Bwaabwa, amaduukku agooga ghanyea moawwali gheang'deanyu.

⁵⁰ Aniini meagassi daghambiit geaw; gwanda siyagi gasa nea siida laja girgweageeda.

⁵¹ Aba huumwa, aba huumwa, geayeeshshineegwa, siida jea ghoang'ng'waay ng'asheandeanyu ea mayghwadaa miyeeda eara hay.”

⁵² Hean gwayeeshsha Fuga Yahuudi niny, “Asi ghamneawa sinalli gideaba ang'iing'i gindeawi meangeenda. Abrahaamu ghami ak eara sibanga, ak ghamneawa giyeeni, ‘Siida ang'ng'waay ng'asheandeanyu maygwasamu miyeeda eara hay.’

⁵³ Ang'iing'i guwosi haweewa Abrahaamooda was ghweandeanya meahi? Eara sibanga gameewa! Ang'iing'i gihindigeaw ng'eaha?”

⁵⁴ Ghwasha Yeesu nea gwayeeshsha, “Iyaghambiichchi geaw gigheambiitteanyu ea mii gili; Bwaabwa dea aghambiidani nea dea oyeennyi Aseetteang'wa.

⁵⁵ Agooga mii ghanyi anala niny; amaduukku aniini ghaanalli niny. Ameayeennyi mwaanali niny, abeeda gaydoaw siida ng'uyyeega urjeweegwa; aniini ghaanalli niny ak ghang'ng'waanyi ng'asheandaannyi.

⁵⁶ Ghweandeang'wa was Abrahaamu ghayi gahoosan aba gassooda jea ghwadaa eaweetteanyu ak ghwadaa ak gang'weela.”

⁵⁷ Hean ghwalamda Fuga Yahuudi ak gwayeeshsha niny, “Ang'iing'i miyannyiida gweanyew haradam ea damanamughuush ak gajanidaahi Abrahaamu?”

⁵⁸ Gwayeeshsha Yeesu saawa, “Aba huumwa, aba huumwa, geayeeshshineegwa, dea mii gwandeewa Abrahaamu, abeeda aniini geandi.”

⁵⁹ Ng'atta gooliimu lagheanga nea geegasa eefta iiduw ghafuygeaw Yeesu amahit gwaritteawa jeeda gheeda sibatta Aseetta.