Yohaana 7 - NEAJEEDA EESH BEA BUUNEESSEAN

Yeesu ea oorjooga ghaamwat

¹ Ng'atta ng'asheesu gwaneayeewa Yeesu jeeda ng'eanyiida Galilaaya, aba gideaba magassa gwaneayi aba jeeda ng'eanyiida Yudeeya aba gideaba fuga Yahuudi gagasa gwanuus niny.

² Abeeda aba damandida ea nineekkiit ghwelmeeda fuga Yahuudi sisinna Udahabeaschajeega.

³ Hean ghwalamda oorjooga ghaamwat ak gwayeeshsha, “Ng'amwana hiji ak guwi ng'eanyiida Yudeeya ghwadaa ginealangaagu gadiyoojiga isnayi.

⁴ Siida moammu gwasna gadiyeeda makcheameeda aba iigasa ghwadambiir gheawungaaschi aba heeda buuneeda. Asi iisni gadiyoojusu abeeda gihiimsi geaw ng'eanyiida.”

⁵ Aba gideaba eara oorjooga ghaamwat mwamwasa niny.

⁶ Gwayeeshsha Yeesu saawa, “Damandeanyu mighwahidu, amadukku damandeang'wa gwanda galeagassean.

⁷ Ng'eanyiida moammu ghwasteagwa, duukku aniini ghwastan aba gideaba geamuuwwu gideaba gadiyoojigaaschi eamunyas.

⁸ Aweayeena agooga jeedeaba ghwelmeetta nea goobeayi geat; aniini maydawa jeedeaba ghwelmeani, aba gideaba mighwahidu damanda doabiiw aba heedeanyu.”

⁹ Gwarukta ng'asheesu amang'atta goobiida hoowa bea Galilaayaan.

Yeesu aba jeeda ghwelmeeda sisna udahabeaschajeega

¹⁰ Ng'atta nea nuweay Oorjooga ghaamwat ghwelmeetta, iiduw eara niny gawa nea mwabwadakta.

¹¹ Hean gagaseadayyi fuga Yahuudi aba jeedeaba ghwelmeetta nea geyeena, “Gwanda yeenu?”

¹² Iiduw gwaheedu giniikghta aba jeeda buuneeda. Mwaatkwa iissa gwayi, “Siisi aamiy”, nea mwaatkwa gwayi, “Mannda, niny gahutteawi buuneeda.”

¹³ Eara gwasa ghanyeamanda siida badaksa ak gwarukuta ng'asheega badaydannyi aba eeshpwara aba gheawalmeeda fuga Yahuudi.

¹⁴ Iiduw suweay bugusta ghwelmeeda gawa Yeesu gheeda sibatta Aseetta ak gonealshi.

¹⁵ Hean ghahamng'eanyi fuga Yahuudi nea gwayi, “Siisi ghwanyasa yeenu fughareani nea mii ghoassoamwa?”

¹⁶ Ghwasha Yeesu ak gwayeeshsha saawa, “Ng'asheega anaalli buuneeda mii geasu, gaba dea ajeaknean;

¹⁷ siida bwariiy gwasin gida bwariiy niny, gayghwanal ginealshooni ea gwaleabu heeda Aseetta ghana gideaba gearukku aba gheambalmeedeanyu.

¹⁸ Siida baloola gheambalmeadaannyi abeeda gagaseadayyi gigheambitteaba geaw, amadukku siida gasa gigheambiitta siida ghayi ajeagu gaba huumwa nea jeadaannyi ea mannda munyinda.

¹⁹ Ghayi Muusa magoneegwa deaweeda? Eara gwasa manda jeedeang'wa eara siyagi ang'ng'waay deaweeda. Ghwasaan inyasgoogasayyi anuusean?”

²⁰ Hean ghwasha Buuneeda nea gwayeeshsha, “Gindeawi meangeenda! Gagaseadayyi ng'eaha gwanuusnyi?”

²¹ Ghwasha Yeesu nea gwayeeshsha, “Geasinnyi gadiyeenagi, ak ghwanung' ghahameagwa ng'eanyi iyoadaayi.

²² Muusa ghayi gagooneegwa ghasmeahooda (Maleapna heeda Muusa, gwaleabu heeda ghweaniga), ak ghoayaachchi agooga siida ghasmeahooda eaweeda Sabatto.

²³ Iissa isiyaat siida ghasmeahooda eaweetta Sabatto, ak abeeda ea meenuusa deaweeda Muusa, abeeda goonyareeksean aba gideaba ghaahaapchi siida eaweetta Sabattohi?

²⁴ Adorgweakkiisi buuneeda aba gidoodaakti, iissa gorgweaksi aba girgweageeda doabiiw.”

Heappi niny Mesiyahi?

²⁵ Hean gwayi fuga mwaatkwa bea Yerusaleemu, “Heappi! Siitta sigasa gideaba gajenusiin mii nihi?

²⁶ Ak ghamneawa gabalool aba eeshpwaara nea meerukusiina ng'ashaan! Gwadeeppa eara fuga ambaliischi eanijeeng'u gideaba siisi Gristohi?

²⁷ Eaweetta jea ghwahinna Gristo manda siichchea ghwanal helleabu, dukku aseasa geanalli helleabu siisi.”

²⁸ Gwargu Yeesu aba ghuutta haw aba damanda anealsheewa aba jeeda gheeda sibatta Aseetta, “Ghoanallaan ak ghoanalli eara heeda ealeabu? Mwaawuni aba uhuudeanyu aniini; dea ajeaknean niny huumwa ak ea moanali niny.

²⁹ Ghaanalli niny aba gideaba gealeabu headaannyi, ak gojeaknean.”

³⁰ Geegaseadayyi gichchea eang'ng'wayda ak ea manda siida aheaksa geattinda ghoang'ng'waay aba gideaba mii ghwahitta damandaannyi.

³¹ Iiduw ghwamwas Fuga saang'a niny; nea gwayi, “Gristo iihidu, gaygwasin gwadeagwajeega burdeawa geasin siisi?”

Gechcheakta furiischoodiga ghoang'ng'waay Yeesu

³² Ghwayiiy Farisayajeega gidameang'sheatta emeeda appadaydaannyi, hean gojeakta ashoohoodiga hees ea Farisayajeega furiischoodiga gaweay ghoang'ng'way niny.

³³ Gwayeeshsha Yeesu, “Gajendeayeena gheadi nuwaas, amang'atta gaydaweesa dea ajeaknean;

³⁴ gajagassean ak ea mwajanyasaan, nea heechchea deabiida ea mwajoammuusa ahinni.”

³⁵ Gabalool Fuga Yahuudi nea gwayeenniissa geat, “Siisi gaygawa yeenu jea ea mwajeammuusa eanyasaan? Gaygawa heeda emeeda dardaawaat mida Yunaani ak ghoanaal eameani bea Yunaani ini?

³⁶ Gwarukuna naaha ng'asheanji bea gideaba ‘Gajagassean ak ea mwajanyasaaniin, nea heechchea deabiida ea mwajoammuusa ahinniin?’”

Eeniga beega jea gweadu eaweega

³⁷ Eaweetta huydean asheala ghwelmeeda eaweechcheanda haw gil, ghaminaada Yeesu ak gwargu aba ghuutta haw nea gwayi, “Siida bearji muwooshta, doani heedeanyu ghwaleayda.

³⁸ Siida mwasan aniini aba ginnyaashta Ng'oruutka, ‘Gayghwadalalaana jeadaannyi eeniga beega eattu eaweega manda mudeanooda aba jeeda guroroodaannyi.’”

³⁹ Gwargu ng'asheesu appadayda Gurorooda, jea ghwanyas fukka jea ghamwas ninyiin; damandida Gurorooda mii ghwaan aba gideaba damandida Yeesu miyeakghambiit.

Dardeayda aba jeeda buuneeda

⁴⁰ Iiduw aba jeeda buuneeda gwanda fuga ama iiy nea gwargu ng'asheesu gwayi, “Aba huumwa siida sibaneeda.”

⁴¹ Gwayi fuga mwaatkwa, “Siisi Gristo gil.” Nea mwaatkwa gwayi, “Gristo ghoammu gwaleabu Galilaaya?

⁴² Neada ng'oruutka ea mayi, Gristo gaygwaleabu dooshta Dawdi, ak gwaleabu Betleheemu gharang'da abiitta Dawdi?”

⁴³ Hean ghwadarda buuneeda appadaydaannyi.

⁴⁴ Gagasa fuga mwaatkwa ghoang'ng'waay niny amaduw ea manda siida aheaksa geattinda ghoang'ng'waay.

Fuga ambaliischi bea Yahuudi mandeawana masaweega

⁴⁵ Gabikta Furiischoodiga heeda ashoohoodiga hees ea Farisayajeega, ak gwayeeshsha saawa, “Ghwasaan andamiyoyeanni?”

⁴⁶ Ghwasha Furiischoodiga, “Eara heeda ghayi manda siida ammu gabaloolda gidabaloolda siisi!”

⁴⁷ Ghwasha Farisayajeega nea gwayeeshsha saawa, “Asseara agooga sirenganneegwa?

⁴⁸ Ghoang'ng'wa adaaha earea siyagi gil aba jeeda fuga ambaliischi dea mwas ghana Farisaayu dea mwas niny?

⁴⁹ Eameani mwanala deaweedean, sumwaashta.”

⁵⁰ Ghwalamda siyagi aba jeannyaawa was Nikodemooda, ghayi weah headaaannyi ammwadi ak gwayeeshsha saawa,

⁵¹ “Neada deaweededeanya iissa gorgweaksa siida nea mii ghanyi ghwayiiy ak ghwanal gissini?”

⁵² Ghwasha Saawa nea gwayeeshsha, “Asseara ang'iing'i gileabu ng'eanyiida Galilaaya? Asi sikteawana ak gay daaha gideaba Galilaaya mii gwaleabu sibaneeda.” [

Gatmooda sing'ng'waay nea gamealuul

⁵³ Hean gaba siisi ng'eat ak gw gheannyi,