Yohaana 6 - NEAJEEDA EESH BEA BUUNEESSEAN

Yeesu ghoang'aatta fii sagalamnyooji muut

¹ Iing'atta ng'asheesu ghoaghaawa Yeesu basooda Galilaaya, was basooda Diberiya.

² Ghwaat geeshta emeeda aba gideaba saawa nidaah gwadeagwajeega sissa fuga miyeani.

³ Hean gwading'da Yeesu gijeeda, ak gopteada sea ginealangaaschi.

⁴ Abeeda ea ninekkiit ghwelmeeda Basakka, bea fuga Yahuudi.

⁵ Ang'wearda ghwadaa emeeda nea ghapka headaannyi ak gwayeeshsha Yeesu Filippo, “Gajeashaahana yeenu mukkattajeega jea ghwaak fiisu?”

⁶ Gwarukuta ng'asheanji nea gwasim, nea ghwanal niny gichcheagwasin.

⁷ Ghwasha Filippo nea gwayeeshsha, “Dinaaraji bughalaji iyyeenya moammu ghwasha mukkattajeega deayeat eara elakkiisa fiisu gil mwanang.”

⁸ Gwayeeshsha oorjeanagi was ginealaneedaannyi suguuura Andereya bea gennyea Simon Betro,

⁹ “Gwanda hiji jeabwagi mideawa mukkattaji muut bea shayiiri ea ghweayi iyyeenya; ak gaygwarachchi naaha suu aba fuga saang'a deenu?”

¹⁰ Ghwayeeshsha Yeesu, “Anung' gobitpiit buuneeda.” Abeeda gwanda hoowa nyeega saang'a; hean gobitpiit headiga nyiit sagalamnyooji muut.

¹¹ Gageanu Yeesu mukkattajeekka ama ng'atta gabadiischeesa Aseetta ak gwalakkiisa fuga abitpiit; gwahindunu eara ghweayeekka, akkaba siisi siittaw gidagassiida.

¹² Iiduw nea ning'atta agiischooda nea nilang'u buuneeda, gwayeeshsha ginealangaaschi, “Owweamni gheaptanga silach adaghwaroat eara gil.”

¹³ Hean ghoawaam banajanga mukkattajeekka bea shairiin ghwanyawa lach fuga sing'ng'attaan, ak ghoannyiit soscheew damaniyyeenya.

¹⁴ Daa buuneeda gwadeadooda sin gwayi, “Aba huumwa siisi sibaneeda jea ghwahidu jeeda ng'eanyiida!”

¹⁵ Jeeng'u gideaba geegasa eang'ng'waay eayaat aba uurda ghoaw sugoochcheanda, goheelli geaw Yeesu buuneeda ak gabiikta gichcha uhuuda gijeeda nea godeayi geaw.

Yeesu ghabeawa badayda beega

¹⁶ Iiduw nea ghoaw shing'ada ghwararang'aada Ginealangaaschi ea gaweay ghuutta basooda,

¹⁷ gwading'da maleambooda ghoaghaawa basooda gaweay ng'eanyiida Gapernaumu. Gamisaniit nea Yeesu ea mighwahitta heannyaawa.

¹⁸ Gabalaksa basooda ak goyuuk jeammeeda ng'waan.

¹⁹ Hean ghamwanmwan maleambooda beatta geanu aseedeanagi, ak ghwadaa Yeesu nea ghwaan appadayda beega ak gwariiksa maleambooda ak ghabeal,

²⁰ gwayeeshsha saawa, “Adoabealli, siida aniini.”

²¹ Hean gang'weela ak gagasa godiing'sa jeeda maleambooda, ama deagheatta ea nihitta maleambooda ng'eanyiida ghajaam gwachchi weay.

Fuga gaseadayyi Yeesu

²² Iimuchchu ghwadaa fuga heetta sunung'wa gigheawda basooda meatkweeda niirjean, gideaba sunung'wa hoowa maleamboonagi, nea Yeesu gwachchi ea mading'da maleambooda sea Ginealangaaschi, abeeda ginealanga gaweay nea gabwageat.

²³ Nea abeeda ea nihidu maleambajeega leabu ng'eanyiida Diberiya ea ghwahitta heeda neekkeewa heeda aksa buuneeda mukkatte, heeda ghayi moasha Ng'uttamiida ghawooda.

²⁴ Hean iiduw nea ghwadaa buuneeda gideaba Yeesu ea ginealangaaschi manda hiji, gwading'da maleambajeega gaweay ng'eanyiida Gapernaumu nea gagaseadayyi Yeesu.

Yeesu mukkatteyda eaweega

²⁵ Iiduw nea geanyasa gigheawda basooda meatkweeda niirja geannyaash nea geyeeshsha, “Rabi, gihidu eeju hiji?”

²⁶ Ghwashsha Yeesu nea gwayeeshsha saawa, “Aba huumwa, aba huumwa, geayeeshshineegwa, mogaseadayyean, aba gideaba ghayi noadaayi gwadeagooda, gogassean aba gideaba ghayi ghoayaaji mukkatte ak golang'uuchchi.

²⁷ Adiiduw godeawiichchi aba hamitta jea gabay gammudean, adeawissiina hamitta jea gwanyagu eaweega manda mudeanooda, jea gagooneegwa Balleanda Siida; aba gideaba nigeawiit goroor Aseetta was Ghwaan.”

²⁸ Hean geyeeshsha, “Gajeesna naaha ijea eammuusa eesna gadiyeeda Aseetta?”

²⁹ Ghwashsha Yeesu nea gwayeeshsha, “Gadiyeeda Aseetta nihi, gideaba amwasa siida ajeagu niny.”

³⁰ Hean gwayeeshsha Saawa, “Gisni ana gwadeagu jea eadaaha ak geamwascheay, Gaysina ana gadiya?

³¹ Ghwaanigaasa ghayi ghwaak hamitta suguura mana aba dareapcheeda aba gissung'waarda, ‘Ghoadaw mukkatteyda leabu humng'eeda ghwaak.’”

³² Gwayeeshsha Yeesu saawa, “Aba huumwa, aba huumwa, geayeeshshineegwa, mii Muusa gil dea goneegwa mukkatteyda leabu humng'eeda; Bwaabwa dea gooneegwa mukkatteyda huumwa leabu humng'eeda.

³³ Aba gideaba mukkatteyda Aseetta diitta rarang'aana humng'eedean gil ak ghoadaw ng'eanyiida eaweega.”

³⁴ Geyeeshsha niny, “Ng'uttamiida, goaneasa mukkatteehean galeagasean.”

³⁵ Gwayeeshsha Yeesu saawa, “Aniini geawoschi mukkatteyda eaweega; siida wuu heedeanyu mayghwayeachchih, nea siida mwasan ea mayghwaak muwoash eara hay.

³⁶ Ak geayeeshshineegwa earappeadi noadayaan moamwasaan.

³⁷ Fukka sean goonan Ghweandean gayghapka hedeanyu; nea dea wuh heeeanyu ea mayghanyi dajaksa jarooda.

³⁸ Aba gideaba mwararang'aanani humng'eeda doan dasin gideagasay aniini, ghaawunnyi dasin gidagasa dea ghayi ajeaknean;

³⁹ nea gidagasa dea ajeaknean ea nii gil, gideaba ea meahuttani earagi aba jeeda geagoonan, geaghus deaduudu eaweeda huydean.

⁴⁰ Aba gideaba gidagasa Bwaabwa nii gil, gideaba siida nyoo ghwadaa Balleanda ak ghamwas abeeda ghwanyas eaweega manda mudeanooda, ak gaydeaduudu eaweeda huydean.”

⁴¹ Hean gabiissa ghoaniikgh fuga Yahuudi aba gideaba gwayi, “Aniini geawoschi mukkatteyda leabu humng'eeda.”

⁴² Gwayi Saawa, “Neada siisi ea mii Yeesuuyda was balleanda Yoseefu, anda geanalli ghwaan ea ghaamwat? Abeeda ghoammustaan gideaba gaygwayi, ‘Ghararang'aani humng'eeda?’”

⁴³ Ghwasha Yeesu nea gwayeeshsha saawa, “Adonnikkiisi geat.

⁴⁴ Manda siida ammu ghwaan hedeanyu iimagisna Bwaabwa ghayi ajeaknean ak abeeda geaduudu aba eaweeda huydean.

⁴⁵ Geang'waar aba jeeda sibanga gideaba, ‘Gayghoanaal Aseetta sean. Siida wassean aleeysiit nea ghoanaal Bwaabwa, gayghwaan heedeanyu.’

⁴⁶ Aba seareani mii gideaba gwanda siida nidaa Bwaabwa gil geaghus diitta leabu heeda Aseettean; nii siida nidaa Bwaabwa.

⁴⁷ Aba huumwa, aba huumwa, geayeeshshineegwa, siida mwas gwandeawa eaweega manda mudeanooda.

⁴⁸ Aniini geawoschi mukkatteyda eaweega.

⁴⁹ Ghweanigeagwa ghwaak hamitta suguura mana aba dareapcheeda ak gameewa.

⁵⁰ Nii ea mukkatteyda rarang'aana humng'eeda, nea siida wassean iiyak ea mayghami.

⁵¹ Aniini geawoschi mukkatteyda eaweega rarang'aana humng'eeda; siida wassean iiyak mukkatteheani, gayghwashng'u eaweega manda mudeanooda; nea mukkatteyda jea daadaw appadayda eaweega ng'eanyiida ea sasedeanyu.”

⁵² Hean gabiissa gwasheang'nyi fuga Yahuudi nea gaba geat, nea gwayi, “Gayghoammustaan siisi gideaba gaygagoaneasa saseadaannyi ak geayaaji?”

⁵³ Gwayeeshsha Yeesu saawa, “Aba huumwa, aba huumwa, geayeeshshineegwa, imoayaagi saseeda Balleanda Siida, ak ghoaleayi foojandaannyi, ea maygwanda jeesingeagwa eaweega;

⁵⁴ siida akk saseedeanyu nea ghwali foojeandeanyu gaygwandeawa eaweega manda mudeanooda, nea abeeda gaydeaduudu niny eaweetta huydean.

⁵⁵ Aba gideaba saseedeanyu gichchea eayaak bea huumwa, ak eara foojeandeanyu ea gichchaeali bea huumwa.

⁵⁶ Siida iiyak saseedeanyu ak ghwali foojeandeanyu gaygobiida jeedeanyu, nea eara aniini gaydeabiida jeadaannyi.

⁵⁷ Gidajeakteaydanean Bwaabwa mideawa eaweega, eara aniini geandeawi eaweega appadayda Bwaabwa, gwasnu eara siida akk saseedeanyu gayghwanyas eaweega appadaydeanyu.

⁵⁸ Asi nii mukkatteyda rarang'aana humng'eeda, mawurji sea dea akk ghweaniga ak gameewa; siida iiyak mukkatteheani gayghwanyas eaweega manda mudeanooda.”

⁵⁹ Gwargu ng'asheesu nea gonealshi aba jeeda ghooriida sinnealshachcheewa aba ng'eanyiida Gapernaumu.

Ng'asheega eaweega manda mudeanooda

⁶⁰ Iing'shi gea saang'a aba jeeda ginealangaaschi gwayi, “Ng'asheesu suu eahang'oonyi; gayghoammu ng'eaha goleeysiit?”

⁶¹ Gwajeeng'u Yeesu aba jeadaannyi gideaba ghoaniikgh ginealangaaschi appadaydeaba ng'asheanji, gwayeeshsha, “Ng'asheanji gwaruusseegwa?

⁶² Abeeda gaygawurjiin iyoadaayi Balleanda Siida nea ghwascheang'da gawa heeda ghayi mida bea amwadi?

⁶³ Gurorooda dea eattu eaweega gil, aba gideaba saseeda manda gidammu; ng'asheesu earukuneegwean gurorooda gil ea eaweega.

⁶⁴ Eara ghamneawa gwanda jeedeang'wa fuga mamwasa.” Ghang'eada mwadi Yeesu ghayi gwargu ng'asheesu nea gabean ghwanal gideaba geabeang'a gil fukka mwamwasaan, ak ea ng'eaha siida jea ghwala bwadaw niny.

⁶⁵ Hean ng'atta gwayi, “Nii gidearukunegwa gideaba manda siida jea ghoammu ghwaan heedeanyu iimwanung' Bwaabwa ghwaan.”

⁶⁶ Ng'atta gabiikta bwadaw gea saang'a aba jeedeaba ginealangaaschi ak ea mudughwaat geeshta.

⁶⁷ Gwayeeshsha Yeesu fukka attamaniyyeenyean, “Eara agooga googasayi aweayeena?”

⁶⁸ Ghwasha Simon Betro ak gwayeeshsha, “Ng'uttamiida, akajeeweaya heedeabeang'a? Ang'iing'i gindeawi ng'asheega eaweega manda mudeanooda;

⁶⁹ aseasa sumwaschi, ak geanalli gideaba ang'iing'i guwosi dea Ghaydit bea Aseetta.”

⁷⁰ Ghwasha Yeesu nea gwayeeshsha, “Aniini miidagwalneegwa nea gowoschi damaniyyeenya, nea siyagi aba jeedeang'wa ea mii meang'nyeandeendea?”

⁷¹ Nea abeeda gabaloola badayda Yuuda, balleanda Simon Iskariyotte, aba gideaba niny gaba jeedeaba ginealangiga attamaniyyeenyean, ak ea dea jea ghwala bwadawi.