Yohaana 5 - NEAJEEDA EESH BEA BUUNEESSEAN

Giheapta siida aba ghuutta dabascheanda

¹ Ng'atta damandida ghwahidu ghwelmeeda fuga Yahuudi, nea abeeda ghwascheang'da Yeesu gawa Yerusaleemu.

² Aba hoowa bea Yerusaleemu neekkeewa gidaghuutta gisilgean gwanda dabascheanda suguura aba iitta Ebraniya Betsada, nea gwandeawa dodonung'weak muut.

^3-4 Gwanda jeani fuga saang'a miyeani nea gwalil, fuga ng'oowwi, ea fuga badoojiga, ea fuga abittu damealga.

⁵ Abeeda gwanda hoowa siyagi ghayi miyaan geannyeew diktam ea damassis.

⁶ Hean daa Yeesu siitta nea gwalil aba hoowa ak ghwanal gideaba niibiida hoowa gili geaw, ghoanyaash nea gwayeeshsha, “Gigasayi haabwa?”

⁷ Ghwasha siitta miyaaniin nea gwayeeshsha, “Siida mureeda, aniini meandeawani siichchea ghoobuuttanaan jeeda dabaschcheanda iing'atta ging'oolda beega, iissa iyeagasayi daabitta jeeda goosheeda siinuut ghoabitta.”

⁸ Gwayeeshsha Yeesu niny, “Ng'eada, geanda muundaang'u ak guwi.”

⁹ Miighoaw gil ghahaap siidida ak gageanda muundaannyi ak ghang'eat gawa. Nea abeeda eaweettida ea Sabattohi.

¹⁰ Iiduw gwayeeshsha Fuga Yahuudi siitta sihhabiin, “Askweareani eaweetta Sabatto gil, ak ea mammiiseey gideaba gaysareana muundaang'u.”

¹¹ Ghwasha niny nea gwayeeshsha, “Siida ghwanyawa ahaabwan dea eshshinean, ‘Sareana muundaang'u ak guwi.’”

¹² Geannyaash niny, “Siida eshshineey, ‘Sareana muundang'u ak guwi ng'eaha?’”

¹³ Amwanala niny siida ghwanyawa ahaap, aba gideaba Yeesu aba damandida ning'amwa hoowa aba gideaba nibassa geat hoowa emeeda.

¹⁴ Iiduw ghwanyasa Yeesu niny jeeda gheeda sibatta Aseetta ak gwayeeshsha, “Asi daaha nihaabi! Adagudubiikta sina ring'eeda, adiiduw gabiikta ghwanyasnyi ng'asheanda muy naawa nii.”

¹⁵ Gawa Siidida ak gwarukusa fuga Yahuudi gideaba siida ahaabwan Yeesu gil.

¹⁶ Hean ghoaw gidasawassa fuga Yahuudi Yeesu, aba gideaba gwasin ng'asheanji eaweetta Sabatto.

¹⁷ Ng'atta gwayeeshsha Yeesu saawa, “Bwaabwa gudugagadiyi eara ghamneawa, ak earaniini geagadiyi.”

¹⁸ Iiduw appadaydeaba ng'asheesu gagasa Fuga Yahuudi naweeda jea gwanuusa; nea meakna gideaba gwanuus deaweedeeda Sabatto akghwahit, ghabwada gideaba gwayi Aseetta ghwaan gil, aba sareani hean ea niideennyi geaw sea Aseetta.

Gheambalmeeda Balleanda

¹⁹ Gwayeeshsha Yeesu saawa, “Aba huumwa, aba huumwa, geayeeshshineegwa, Balleanda mwoammu gwasin gida nea gaba geaw ghoammu gwasin gitta daa nea gwasin Ghwaaniin; aba gideaba gitta sin Ghweandean, eara Balleanda abeeda gaygwasin.

²⁰ Aba gideaba Bwaabwa ghabwariiy Balleanda, ak iissa gohiimsa haleanjeessean sin niny, ak abeeda gaygohiimsa ng'asheega hees madeenachcheewana suh, ak abeeda gajahamwa ng'eanyi.

²¹ Gawuurji gitta aduuttideayda Bwaabwa fuga meewa ak gabiikta ghoadaw eaweegean, eara Balleanda iissa ghoadaw eaweega fukka gassean.

²² Bwaabwa maygorgweaksa eara siida, ng'asheega sean bea girgweaksinda buuneeda niyiin geattinga Balleanda,

²³ abeeda gwasissa buuneessean mureeda Balleanda gawuurji gidasinnisiinda mureeda Bwaabwa. Siida masissiina Balleanda mureeda masissiina mureeda Bwaabwa ghayi ajeagu niny.

²⁴ “Aba huumwa, aba huumwa, geayeeshshineegwa, siida iiy ng'asheanji itteanyuun, ak ghamwas siida ghayi ajeaknean, gwandeawa eaweega manda muudeanooda; nea majergweaksa eara hay aba gideaba ninaawa miyeeda ak gawa jeeda eaweega.

²⁵ Aba huumwa, aba huumwa, geayeeshshineegwa, ghwaan damanda ak ghamneawa gwanda, ak gaygabiissa ghwayiiy fuga nimeewa ghuutta Balleanda Aseetta, amaduw fukka jeagwayiing'shiin gayghwanyas eaweega.

²⁶ Gawuurji gitta mideeyeatta Bwaabwa eaweega aba jeadaannyiin, gwasnu niidaw Balleanda eaweega aba jeadaannyi,

²⁷ ak gabiissa ghoadaw gheambalmeeda jea gorgweaksiina buuneeda, aba gideaba niny Balleanda Siida gil.

²⁸ Adaghahameagwa ng'eanyi appadaydeaba ng'asheesu; aba gideaba ghwaan damanda jea ghwayiinya buuneessean mida jeesinga bung'eadinga ghuuttaannyi

²⁹ abeeda gaygwaduuttu fukghayi sina ng'asheega miyaas ak ghwanyas eaweega, ak gaygwaduuttu fukghayi sina ng'asheega munyas ak gergweaksa.”

Mushoodiga Yeesu

³⁰ “Aniini mwammuusi dasin gil aba gheambalmeedeanyu nea geabwageaw; aniini geargweakkiisi buuneeda aba gidayiinyi, nea girgweageedeanyu adoabiiwaat, aba gideaba meagassi dasin gideagasayi aniini geaghus dasin gidagasa siitta ghayi ajeakneaniin.

³¹ Iyeamuuwwu ng'asheegeasu, aniini abeeda muuwwunoodeanyu ea maba huumwa;

³² ak gwanda siinut muuwwu ng'asheega badaydeanyu, ak ghaanalli gideaba ng'asheega sean muuwwu appadaydeanyu gaba huumwa.

³³ Agooga ghayi gochcheakti Yohaana, ak gamuuwwu ng'asheega huumwa.

³⁴ Aniini mwaakghusi muuwwuunooda buuneeda; geargu ng'asheesu aba gideaba geagasayi anyasa lealeanooda.

³⁵ Niny ghayi gheabong'nyeanda yeat ak ghoabwaay gil, amaduw ghoabwariinyi agooga weeshindaannyi gil nuwaas.

³⁶ Amaduw muuwwunooda eandeawi ahaweewa dea Yohaana; aba gideaba gadiyoojiga easinnyi gea ghayi goonan Bwaabwa dasini, ak ea gadiyoojiga ghamneawa easinnyiin gil, ak gamuuwwu gideaba ghayi gojeaknean Bwaabwa.

³⁷ Ak eara Bwaabwa ghayi ajeaknean gamuuwwu ng'asheega badaydeanyu. Ak ea moang'ngwa ayiinya ghuuttanyi nea niny ea moang'ngwa adaaha;

³⁸ nea eara ng'asheadaannyi ghanyeamanda jeesingeagwa, aba gideaba moamwasi siida ghayi ajeagu.

³⁹ Agooga gosikkideawi ng'oruutka nea ghoaghayi gili aba jeannyaawa gondeawi eaweega manda mudeanooda; ak ea dea muuwwu ng'asheega badaydeanyu.”

⁴⁰ “Eara agooga ghanyeamogassi apkaani hedeanyu ak ghoanyaschi eaweega.

⁴¹ Aniini mwaanyasi gigheambiitta aba heeda buuneeda.

⁴² Ak ghaanalli gideaba agooga manda jeesingeagwa bariinyeega Aseetta.

⁴³ Aniini ghaawuni gheawunga Bwaabwa, ak ea moadeaptanaan; amawuh siinuut aba gheawungaaschi niny gajadeapta.

⁴⁴ Abeeda gajamwastaan, siida nyasa gigheambiitta hichpa siinuut ak ea magassa gigheambiitta leabu heeda Aseetta?

⁴⁵ Adiiduw goyeeshshi geat aniini gaydahaktaneagwa aba heeda Bwaabwa; Muusa siida jea ghoahaaktaneegwa gil, nea siida ghayi oararji.

⁴⁶ Inyeeda ghayi ghoamwachchi Muusa ghwanyawa gajamwasaan earaniini, aba gideaba ghang'waar ng'asheega badaydeanyu.

⁴⁷ Amaduw imoamwasi ng'asheega ghayi ng'waar, abeeda gajamwastaan ng'asheegeasu?”