Yohaana 4 - NEAJEEDA EESH BEA BUUNEESSEAN

Yeesu ea gatmooda Samariya

¹ Iimuchchu nea ninal Ng'uttamiida gideaba niyiiy Farisayajeega gideaba Yeesu ninyas ginealanga saang'a burdeawa Yohaana nea gobattiisan

² (nea Yeesu niny ea migobattiisan buuneeda, gobattiisan ginealangaaschi),

³ ghabeawa ng'eanyiida Yudeeya ak gabiikta gichcha Galilaaya.

⁴ Aba beadi gaygwasik jeeda ng'eanyiida Samariya.

⁵ Ghwahitta mujiineeda Samariya suguura Sikkaari, nekkeewa madamnyeanda ghayi adaw Yakkobo balleandannyi suguura Yoseefu.

⁶ Abeeda gwanda hoowa healadeeda Yakkobo, hean ea nibur Yeesu aba beatta, ak gopteada aba murdeeda healadeeda. Nea abeeda gaba aseetta lah.

⁷ Iiduw ghwahidu gatmoomba Samariya ghwaram beega. Gwayeeshsha Yeesu niny, “Gonean beesu aleayi.”

⁸ Abeeda aba damandida nuweay ginealangaaschi mujiini ghwasha hamitta.

⁹ Gwayeshsha Gatmootta bea Samariyahiin niny, “Ang'iing'i guwosi siida Yahuudi, nea aniini geawoschi gatmooda Samariya gimmustiin gideaba gaymusean beega?” Aba gideaba fuga Yahuudi maguuyi haleanja sea fuga Samariya.

¹⁰ Ghwasha Yeesu nea gwayeeshsha niny, “Inyeeda ghwanyawa ginali haleanjeeda goona Aseetta ak ea ng'eaha gil siida eshshiineey, ‘Gonean beega jaadali,’ ghwanyawa gaymusa niny ak gaygagoonnyi beega mideawa eaweega.”

¹¹ Gwayeeshsha Gatmootta niny, “Ea siida mureeda ang'iing'i mindeawani geammooda jea ramnana beega, ak ghabwada nii healadeeda easheagi jii; abeeda gaygeannana yeenu beesu mideawa eaweegean?

¹² Neada ang'iing'i guwosi haweewa ghweandeanya was Yakkobo goaneasa healadeani nea ghwali niny beega sea diibigaaschi ea dugwaaschi?”

¹³ Gwayeeshsha Yeesu gatmootta, “Siida wassean nyoo ghwali beesu gaygabiikta ghwaak muwoash,

¹⁴ amadukku sichchea ghwali beega jadaadaw aniini mayghwaak muwoash earahay; aba gideaba beekka jea dadawiin gayghoaw aba jeadaannyi gheang'deenda nea goobeakbeaksa eaweega manda mudeanooda.”

¹⁵ Gwayeeshsha Gatmootta niny, “Siida mureeda, aniyean gonean beesu, ea mabiikta ghwaagan muwoash gichcha nea meabiikni hiji daram beega.”

¹⁶ Gwayeeshsha Yeesu niny, “Una, gursiina siyeadaang'u ak gideani hiji.”

¹⁷ Gwayeeshsha gatmoodida niny, “Meandeawani siyeeda.” Gwayeeshsha Yeesu gatmootta, “Asi girgu huumwa gideaba, ‘Mindeawani siyeeda;’

¹⁸ aba gideaba nindeawi siyeenat muut, ak ghamneawa nii indeawiin ea mii siyeadaang'u gil. Asi aba hiji girgu huumwa.”

¹⁹ Gwayeeshsha Gatmoodida niny, “Siida mureeda, aniini iyeang'ulayi guwosi sibaneeda.

²⁰ Ghwanigaasa ghayi iissa ghaghadoawan Aseetta aba uhuudeaba gijeeni, amaduw goyeennyi agooga heeda miisa ghadoawanda Aseetta Yerusaleemu gil.”

²¹ Gwayeeshsha Yeesu gatmootta, “Iyya, mwasaan ghwaan damanda jea ea majaghadoawana Bwaabwa aba uhudeaba gijeeni, ghana hoowa bea Yerusaleemuun.

²² Agooga iissa ghoaghadoawannyi gida mwoanali, duukku aseasa geanalli gida sighadoawannyi, aba gideaba lealeanooda gwaleabu heeda fuga Yahuudi.

²³ Ak ghamneawa ghwaan damanda, nea damanda gwanda, nea fuga ghadoawan bea huumwa gayghadoawan Bwaabwa aba gurorooda ea huumwa, aba gideaba Bwaabwa gagaseadayyi ghaghadoawan fuga sunu.

²⁴ Aseetta gurorooda gil nea fuga ghadoawan niny gammiisa ghaghadoawan aba gurorooda ea huumwa.”

²⁵ Gwayeeshsha Gatmoodida niny, “Ghaanalli gideaba gayghwahidu Masiyeeda (suguura Gristo), eaweetta hinna gayghoahiimneasa ng'asheega sean.”

²⁶ Gwayeeshsha Yeesu gatmootta, “Aniineani ghamneawa abaloolnyiin niny gil.”

²⁷ Deagheatta ghapka Ginealangaaschi ak ghahamng'eanyi idaah nea gobalool gatmooda, ghanyi ea manda siideeshsha, “Gigasayi naaha?” ghana “Ghwasaan anda gibalooli sea gatmooda?”.

²⁸ Gwanung'usa Gatmoodida sirbiidaannyi heeda ak gawa mujiini amahitta gwarukusa buuneeda gideaba,

²⁹ “Apkaani adaaha siida rukunean ng'asheegeasu sean ghayi easinnyi! Siisi gajea mii Gristohi?”

³⁰ Ghabeawa buuneeda mujiini ak gaweay headaannyi.

³¹ Aba damandida gamearmearani Ginealangaaschi nea gwayeeshsha, “Rabi, agischeena.”

³² Hean gwayeeshsha niny saawa, “Aniini geandeawi hamitta jea daak moanali agooga.”

³³ Hean gonyeari geat Ginealanga gideaba, “Gwadeappa gwanda siida niyeassa hamitta?”

³⁴ Gwayeeshsha Yeesu saawa, “Hamitteanyu sinooda gidabwariiy siida ghayi ajeaknean gil, ak ghahiichchi gadiyeadaannyi.

³⁵ Neada ea moyeeni agooga, ‘Ghwashoada sheeh anng'wan ak ghwahit, ak gay ghwahidu damanda lajitta booga?’ Ak geayeeshshineegwa aniini, oang'ng'weerda ak ghoadaayi beadooda madameega nigeawiitt gaweeriidi aba lajitta.

³⁶ Siida lach booga ninyas mushahareadaannyi, nea iissa ghoawaam haghweega aba eaweega manda mudeanooda, ak abeeda gaygahoosan duwaawi siida heetta hista ea daalach.

³⁷ Ak ghoaw huumwa ng'asheanda ghayi surgu bea gideaba; ‘Gwahista siyagi ak gwalach siinuut.’

³⁸ Aniini geajeaktaneegwa alaja booga mii agadiyeesiina, ghayi gagadiyi fii suuk ak ghamneawa agooga ea noweayi jeeda gadiyeeda nyaawa.”

³⁹ Ghamwas fuga saanga bea Samariya niny aba jeedeaba mujiineetta appadayda muuwwunoodeaba gatmoodida, bea gideaba, “Gwarukunean ng'asheega sean ghayi easinnyiin.”

⁴⁰ Gaweay fuga Samariya heeda ak gamus gwandeayi saawa, ak goobiida hoowa eawooji iyyeenya.

⁴¹ Ghamwas fuga saang'a muuchchi appadayda ng'asheandaannyi.

⁴² Gwayeeshsha saawa gatmoodida, “Aseasa meamwasi aba ng'asheagaagu irgu, aseasa siyiinyi, ak geanalli gideaba aba huumwa siisi lealnochcheanda ng'eanyiida.”

Yeesu ghoahaap balleanda siida haw

⁴³ Iing'atta eawooji iyyeenya ghabeawa hoowa ak gawa ng'eanyiida Galilaaya.

⁴⁴ Aba gideaba Yeesu gamuuwwu gideaba sibaneeda mwoammu ghwanyas mureeda aba ng'eanyiidaannyi.

⁴⁵ Hean hitta Galilaaya, ghwadeapta Fuga Galilaaya, aba gideaba eara saawa abeeda gwanda jeeda ghwelmeeda, ak ea nidaah ng'asheega sean sin aba Yerusaleemu damandida bea ghwelmeedean.

⁴⁶ Gabiikta gichcha mujiineeda Gaaneeda Galilaaya heeda ghayi yamwa beega ak ghoaw difaayeeda. Abeeda gwanda Gapernaumu siisi haw mideawa baleanda miyaan.

⁴⁷ Iiduw nea ghwayiiy siidida gideaba Yeesu nuwuna ng'eanyiida Yudeeya ak anihidu Galilaaya gawa heeda ak gamus gideaba beenni ahaabwa balleandeanyu ghabwar miyeeda.

⁴⁸ Ak gwayeeshsha Yeesu, “Iimwoadaahi gwadeagooda ea haleanjeeda deamdeameadi ea mwajamwasa.”

⁴⁹ Gwayeeshsha Siitta hawiin niny, “Siida mureeda, aniyean nung' eweaya heeda miighameawa jeepteanyu.”

⁵⁰ Gwayeshsha Yeesu niny, “Una; balleandaang'u eamajeek.” Hean ghamwas Siidida ng'asheega Yeesu ak ghang'eat gawa.

⁵¹ Damandida duuw ghwararang'aadawaan, gwaroonnyi sea soomjoogaaschi ak geerukusa gideaba balleandaannyi eamajeek.

⁵² Ghoanyaashta niny damanda haabwa balleanda, gwayeeshsha saawa, “Ghabeawa sheagheeda heetta askweari nea gaba aseetta ispwa.”

⁵³ Iiduw ghoapkaat ghwaan gideaba damandida rukusina Yeesu gideaba, “Balleandaang'u eamajeegiini;” hean ghamwas niny, sea fugeaba gheannyi sean.

⁵⁴ Nii gwadeagoodeaba iyyeenya sin Yeesu gil damanda leapna ng'eanyiida Yudeeya nea gawa Galilaaya.