Yohaana 3 - NEAJEEDA EESH BEA BUUNEESSEAN

Yeesu ea Nikkodeemu

¹ Asi gwanda siispa Farisaayajeega suguura Nikkodeemu, nea ghoahaaghwa fuga Yahuudi.

² Siisi Gaweesa Yeesu eawa ak gwayeeshsha, “Rabi, aseasa geanalli gideaba ang'iing'i guwosi ginealshochcheanda ak gileabu heeda Aseetta; aba gideaba manda siida ammu gwasin gwadeagwajeesu isinayiin, geaghus siida mideayi sea Aseetta.”

³ Ghwasha Yeesu ak gwayeeshsha niny, “Aba huumwa, aba huumwa geayeeshshineey siida imebiikta eeji deaba iyyeennya ea mayghwadaah sugoochcheandumeeda Aseetta.”

⁴ Gwayeeshsha Nikkodeemu niny, “Iijea ebiikta eeji siida niheedu? Gayghoammu gideaba gaygabiikta jeeda ghaamwat deaba iyyeenya ak geeji?”

⁵ Ghwasha Yeesu ak gwayeeshsha, “Aba huumwa, aba huumwa, geayeeshshineey, siida imiyeejiilna beega ea Gurorooda ea mayghoammu gawa jeeda sugoochcheandumeeda Aseetta.

⁶ Gissijiila saseeda gaba saseeda, nea gissijiila gurorooda gaba Gurorooda.

⁷ Adihami ng'eanyi aba gideaba geayeeshshineey, ‘Siida geaghus eebiikta eeji.’

⁸ Yeammeeda iissa gagal heeda gasa, ak giyiinyi ghuutta ak ea minali helleabu ghana heedagal, ea giduurji siiidida sijiila Guroroodean.”

⁹ Gwayeeshsha Nikkodeemu niny, “Ng'asheesu ijeagwasa?”

¹⁰ Ghwasha Yeesu ak gwayeeshsha niny, “Eara ang'iing'i giwosi ginealshochcheanda Israeeli ak aminali ng'asheesu?

¹¹ Aba huumwa, aba huumwa, geayeeshshsineey, aseasa geerukku gida sinalli ak geemuwwu gidaghayi sidaayi; amadukku agooga ghanyea mwoamwasi ng'asheega simuuwwu.

¹² Asi iyearukuneegwa ng'asheega badayda ng'eanyiida ak amoamwasi, abeeda iyearukneegwa ng'asheega mida humng'eeda gajamwastaan?

¹³ Manda siida ghayi nidiyeada ea gawa humng'eada geaghus Balleanda Siida ghayi rarang'aana humng'eeda

¹⁴ Gawurji gida ghayi attoasta Muusa ichchibooda aba dareapcheeda, gwasnu eara Balleanda Siida gajeattoastunu.

¹⁵ Abeetta siida jea ghamwas niny gayghwanyas eaweega manda mudeanooda.”

¹⁶ Aba gideaba Aseetta ghabwariiy ng'eanyiida ea eeyibwak ea ghoadayda Balleandaannyi assakkalealla, ak abeeda siida wassean mwas niny amwaroada ak abeeda ghwanyas eaweega manda mudeanooda.

¹⁷ Aba gideaba Aseetta ghayi mojeakna Balleanda ghwaan ng'eanyiida, ak gorgweaksa ng'eanyiida, geegasa ghwalalan ng'eanyiida appadaydaannyi.

¹⁸ Siida mwas niny majeergweaksa; nea siitta mwamwasaan ea ning'aatta girgweaksinda, aba gideaba mwamwasa gheawunga Balleanda assakkalealla bea Aseetta.

¹⁹ Ak girgweaksinda ea nihi, ghwahidu weeshinda jeeda ng'eanyiida, ak ghabwariiy buuneeda misaneeda ea ghoadaraam weeshinda, aba gideaba sinaweega nyaawa eamunyas.

²⁰ Siida sina ng'asheega munyas iissa ghwasit weeshinda, nea ghanyea mayghwaan heedeesh aba gideaba gajiiduw geattaajiit sinaweagaaschi munyas.

²¹ Nea siitta sina humeandean gayghwaan heedeesh, ak geesikteawa sinagweegaaschi gideaba ghoawal gheang'da Aseetta.

Yeesu ea Yohaana

²² Iing'atta ng'asheesu gawa Yeesu sea ginealangaaschi ea ghwahitta ng'eanyiida Yudeeya, gobiida hoowa sea ginealangaaschi nea gobattiisan.

²³ Abeeda eara Yohaana gobattiisan aba Aynooni, nekkeewa Saleemu, aba gideaba hoowa gwanda beega saang'a; iissa gaweay buuneeda heeda ak gobattiisan.

²⁴ Aba damandida Yohaana miyeayaat ghealooniga.

²⁵ Iiduw ghoaptu sheang'nyeeda aba jeeda Ginealanga Yohaana ea siispa Yahuudi aba ng'asheega gimminooda.

²⁶ Hean iiduw gaweay heeda Yohaana ak gwayeeshsha, “Rabi, siida heetta indeawi aba gigheawda Yordaan ghayi imuuwwu ng'asheagaaschi eara niny ghamneawa gobattisan, nea gaweay headaannyi buuneessean.”

²⁷ Gwayeeshsha Yohaana, “Siida mwoammu ghwanyas gidawassean geaghus dea siittaw leabu humng'eeda.

²⁸ Nea eara agooga ghoammuuschi amuuwwuni gideaba geayeennyi, aniini meawosi Gristo, aniini gechcheaknean deashoayna niny.

²⁹ Siida mideawa gatmooda bea nyeangiida niny siida geeshshi, amadukku sittuupchi siida geeshshi, iissa ghaminaada nea goleeysiit nea gahoosan muuchchi iyiiy ghutteaba siitta geeshshiin; asi aba sareani hooseanegeasu niheedu.

³⁰ Gammiisa niny gideaba gajea ghaloamwat ak ea meawosi aniini ghaloamwaat.”

Siida leabu humng'eeda

³¹ Siida leabu humng'eeda ahaweewa sean, nea siida mida badayda ng'eanyiida gaba ng'eanyiida, ak gabaloolla ng'asheega ng'eanyiida; nea siitta leabu humng'eedean ahaweewa sean.

³² Niny iissa gamuuwwu ng'asheega daa ea gea iiy, ak ghanyeamanda siida mwas muwwunoadaannyi;

³³ amaduw siitta mwas muwwunoadaannyiin, abeeda eara niny ea niroor gideaba Aseetta huumwa.

³⁴ Aba gideaba siida ghayi ajeagu Aseetta iissa gabaloola ng'asheega Aseetta ak ghoadaw gurorooda nea modeena;

³⁵ Bwaabwa ghabwariiy Balleanda, ak aniyiin haleanjeesean geattindaannyi.

³⁶ Siida mwas Balleanda gwandeawa eaweega manda mudeanooda; nea siitta moawaala gheang'da Balleandean ea mayghwanyas eaweega, abeeda gaygwanda badaydannyi nyarasta Aseetta.