Yohaana 2 - NEAJEEDA EESH BEA BUUNEESSEAN

Nyeangiida mida Gaana

¹ Iimuchchu eaweetteaba samwagu gwanda nyeangiida Gaaneeda mida Galilaaya, eara gheamatta Yeesu abeeda gwanda hoowa;

² nea eara Yeesu ea ginealangaaschi ea suguursa ghapka nyeangiini.

³ Iiduw nea ning'at difaayi gwayeeshsha gheamatta Yeesu niny, “Mudugwandeawa difaayi.”

⁴ Gwayeeshsha Yeesu ghaamwat, “Ea iiyya, ang'iing'i gendeayeasi naaha? Damandeanyu miighwahidu.”

⁵ Ghwalamda Gheamatta ak gwayeeshsha soomjooga, “Agooga asna gilinyoo gwargu niny.”

⁶ Abeetta gwanda hoowa sirbaji lah ghayi sisna lagheanga, ak geyiina beega ahunniida fuga Yahuudi aba gimminnoodeaba geat, aba heesinnyeekka jeesinga nyaawa gwalassa galanajeega diktam ghana diktam ea damanamughush.

⁷ Gwayeeshsha Yeesu saawa, “Oannyiida sirbajeesu beega.” Hean geannyiit ea ghwanaawnaawda.

⁸ Ng'atta gwayeeshsha saawa, “Asi aramni ak goyeassi siida haw ang'aatta buuneeda.” Hean geyeasa.

⁹ Iiduw nea gwasamu Siidida ang'aatta buuneedean beegiga, aniyamwa ghoaw difaayi, nea abeeda niny amwanala heeda leabu, (nea soomjookka ghwanyawa ramu beegean ghwanal), gaguursa Siitta ang'aatta buuneedean siida geeshshi

¹⁰ ak gwayeeshsha, “Eajusu buuneeda inyeessa ghanyi goshoohu difaayi miyaas; amadaa beadi nileeshi buuneeda muuchchi, hean gabiissa goruudu gea munyas; ang'iing'i nukkwa gudumideawana difaayi miyaas eara ghamneawa.”

¹¹ Gwadeagooni diitta ghayi sin Yeesu bea madeedean gil aba Gaaneeda Galilaaya nea abeeda ghwanung' eadaah gigheambittaannyi; eara ginealangaaschi hean gabiissa ghamwas niny.

¹² Iing'atta ghangeat ghwararang'aada gawa Gapernaamu nea godeayi ghaamwat ea oorjooga ghaamwat ea ginealangaaschi; gobiida hoowa askwearjoojusu ng'ay.

Yeesu gawa jeeda gheeda sibatta Aseetta

¹³ Abeetta gwanekiidean ghwelmeeda Basakka bea fuga Yahuudi, hean ghwascheang'da Yeesu gawa Yerusaleemu.

¹⁴ Ghwanyasa jeeda gheeda sibatta Aseetta buuneeda; heeda mwashaayda heewga suurja ghwashaayda gisilga nea suurja ghwashaayda ghariibajeega, ea gea nyarja lappiyyeeda gadiyeatta.

¹⁵ Hean gwasin ghealooda, amahit ghahoan buuneesean mideawa gisilga ea heewga aba jeeda gheeda sibatta Aseetta; ak ghoahiida lappiyeeda fuga nyarja lappiya nea gobimbineada measajeega nyaawa.

¹⁶ Gwayeeshsha fugiga ghwanyawa sheahhiida gharibajeegean, “Oang'aamwana dugusu hiji; adoonung ghoaw ghooriida Bwaabwa ghoariida sikkeakshachcheewa.”

¹⁷ Ghoapkaat ginealangaaschi gideaba geang'waar. “Barinyeegeasu aba gheang'u gayghwaagan.”

¹⁸ Ghoanyaash fuga Yahuudi nea gwayeeshsha, “Gaysina ana gwadeagu jea eadaaha gideaba gisni ng'asheesu?”

¹⁹ Ghwasha Yeesu nea gwayeeshsha, “Anyarja gheawi sibatta Aseettean ak gaydadeas aba jeemba askwearjooji assamwagu.”

²⁰ Hean gwayeeshsha Fuga Yahuudi, “Gheawi sibatta Aseettean ghayi destaannyi gageanu gweannyeew haradam ea lah, ak gaydeasa aba jeemba askwearjooji samwagu?”

²¹ Nea abeeda Gheeda sibatta Asseetta rugu ea saseadaannyi gil.

²² Iiduw nea niduunna miyeeda, ghoapkaat ginealangaaschi gideaba ghayi nurgu ng'asheesu, ak ghamwas ng'oruutka ea ng'asheega ghayi rugu Yeesu.

Yeesu ghwanal ng'asheega mida jeesinga buuneeda

²³ Damanda mideewa Yerusaleemu aba jeeda ghwelmeeda Basakka, ghamwas fuga saang'a gheawungaaschi idaa gwadeagooda sin;

²⁴ nea Yeesu amwamwasa fugiga aba gideaba nisikkideawa sean,

²⁵ aba gideaba niny ghwanal buneassean ak ea magassa gideaba gaygamuuwwu sih; aba gideaba niny ghwanal gidamida jeessiida.