Yohaana 18 - NEAJEEDA EESH BEA BUUNEESSEAN

Ging'ng'ooyda Yeesu

¹ Hean iyahiit Yeesu rukunoodeaba ng'asheesu gawa gigheawda moang'wachchiyda Gedaroni sea ginealangaaschi, abeeda hoowa gwanda madamnyeanji mwanang', hean gawa Yeesu jeeda sea ginealangaaschi.

² Nea abeeda Yuudayda jea ghwalabwadaw ninyiin, abeeda ghwanal hoowa; aba gideaba eajusu iissa gabadiini hoowa Yeesu sea ginealangaaschi.

³ Ng'atta gageanu Yuuda gharmuchcheanda shirikkara ea furischoodiga leabu heeda ashoohoodiga hees ea heeda Farisayajeega, ak godeana nea gwandeawa gheaboonyanga ea dabitta ng'uchcheeda.

⁴ Hean jeeng'u Yeesu ng'asheanda jea ghwahidu, ng'atta ghoahiimda geaw ak ghoanyaash nea gwayeeshsha, “Gogaseadayyi ng'eaha?”

⁵ Ghwasha Saawa nea gwayeeshsha, “Yeesuuyda Nasareetti.” Gwayeeshsha Yeesu saawa, “Ada aniini.” Nea abeeda Yuudayda jea ghwalabwadaw ghaminaada aba hoowa sea saawa.

⁶ Hean nea gwayeeshsha saawa, “Aniini gil,” gabiikta bwadaw ak gobedeaysa ng'eanyi

⁷ Gabiikta ghoanyaash, “Gogaseadayyi ng'eaha?” Gwayeeshsha saawa, “Yeesuuyda Nasareetti.”

⁸ Ghwasha Yeesu nea gwayeeshsha, “Neada ea mearukuneegwa gideaba aniini gil; asi iyogassean aniini abeeda ghoanung'waadi fiisu gaweay.”

⁹ Gwarukutta ng'asheesu ak abeeda gwasa ng'asheega ghayi rugu bea gideaba, “Fukghayi ugonnyean mii dahutta eara akkalealla.”

¹⁰ Abeeda gwandeawa Simon Betro bwaanga, goseelu ak ghwalach iitta geattinda dugwa bea ging'ng'oonyaneeda ashoohoochcheanda haw. Nea ging'ng'oonyaneedida geguura ghawungaaschi Malko.

¹¹ Gwayeeshsha Yeesu Betro, “Adealda bwangeadaang'u jeeda labaldaannyi; heappi, gajamwaleaydani bayookta ghayi goonan Bwaabwa?”

Yeesu aba madeeda Anaasi

¹² Ng'atta ghoang'ng'waay Yeesu gharmuchcheandida bea Shirikkaraan sea shirikkarajeanda haw sea furiischoodiga Yahuudi ak geerada.

¹³ Ak geshsheeda eayaat heeda Anasi; abeeda gweargweeda agweaji Gayafa gil nea abeeda Gayafa ea ashoohoochcheanda haw gil gweaydida.

¹⁴ Nea Gayafeeni ea siida ghayi rukusa fukka bea Yahuudiin gideaba ghang'wana ghami siyagi appadahuukka buuneedeani.

Betro ghwashaang' Yeesu

¹⁵ Iiduw ghwaat Simon Betro geeshta Yeesu sea ginealana nuut. Nea abeeda ginealaneeni ghwanal muuchchi ashoohoochcheanda Haw, hean gawa jeeda dodooda gheeda ashoohoochcheanda Haw nea godeayi Yeesu,

¹⁶ nea Betro niny abeeda ghaminaada aba jarooda nea neekkeewa gidaghuut. Iiduw gwardu jarooda ginealaneedida nal ashoohoochcheanda Hawiin ak gobalool huda fur gidaghuut, ak ghwaat Betro gah.

¹⁷ Hean ghoanyaash Hudida ghwanyawa fur gidaghudiin Betro nea gwayeeshsha, “Muwosi siyagi aba jeeda ginealangeaba siisi?” Gwayeeshsha, “Meawosi.”

¹⁸ Aba damandida anughwar beasta ghuurga soomjooga sea furiischoodiga aba gideaba ghwaraanya gorogeeda, hean ghamiinaada nea gwaju beasta; aba damandida eara Betro ghaminaada aba hoowa nea gwajohudayi beasta saawa.

Ashoohoochcheanda Haw gonyeari Yeesu ng'asheega

¹⁹ Ng'atta ghoanyaash ashoohoochcheanda Haw Yeesu iitta ginealangaaschi ea iitta ginealshoodaannyi.

²⁰ Ghwasha Yeesu nea gwayeeshsha, “Aniini eajusu iissa geabalolli ng'eanyiida aba eeshpwara; nea iissa geanealshi aba jeeda ghoorajeega sinnealshachcheewa ea jeeda gheeda sibatta Aseetta galeagassean, heeda roondooscheesa fuga Yahuudi sean; nea moang'ng'wa darukuta ng'asheanda wassean aba makcheameeda.

²¹ Ghwasaan anda ginyaashchchaan aniini? Anyaasha fukka ghayi iiy ng'asheega earukusiin; saawa ghwanal ng'asheega ghayi earukusi.”

²² Ing'atta rukunoodeaba ng'asheesu ghwalas madeang'da Yeesu Furiischoochcheanji ghwanyawa minaada aba hoowa nea gwayeeshsha, “Nii gidurukusiindi ashoohoochcheanda hawi?”

²³ Ghwasha Yeesu nea gwayeeshsha, “Ineargu ng'asheanda muy abeeda gimuuwwu munyindaannyi ea ng'asheanda was, ama ghwanyawa earugu ng'asheanda nea ghwadoabiiw, abeeda gilaksean naaha?”

²⁴ Hean ghwanung' Anasi eerada ak geayaat heeda Ashoohoochcheanda Haw was Gayaafa.

Betro gabiikta ghwashaang' Yeesu

²⁵ Aba damandida Simon Betro gudughamiinaada nea gwaju beasta. Hean geannyaash nea geeyeeshsha, “Heappi earang'iing'i muwosi siyagi bea jeeda ginealangaaschi?” Ghwashaang' niny nea gwayeeshsha, “Meawosi.”

²⁶ Abeeda gwanda siisi was soomjeanda aba gheeda ashoohoochcheanda haw, nea siisi gaba ghaawagi sea siitta lach Betro iittean, ghoanyaash, “Heappi aniini mii dadeakseeyi jeeda madamnyeanda mwanang' sea niny?”

²⁷ Gabiikta ghwashaang' Betro gichcha ammii ghoaw gil goguul nghaghooda.

Yeesu aba madeeda Bilatto

²⁸ Ng'atta gegeanda Yeesu aba gheeh Gayaafa ak geayaat gheeda abiitta sugoochcheanda nea gudea beashatta gil ak ea maweayi saawa jeedeaba gheetta aba gideaba amwang'udana geat ririnyeanda ak abeeda ghwaak hamitta Basakka.

²⁹ Hean gawa Bilatto ghwanyasa saawa jarooda ak gwayeeshsha, “Gondeawi girgweageamba naaha appadaydeaba siisi?”

³⁰ Ghwasha Saawa ak gwayeeshsha, “Siisi inyeetta ghwanyawa ea masinna ng'asheega munyas ea majeeyeanna headaang'u.”

³¹ Gwayeeshsha Bilatto saawa, “Asi adabeeda ghoayaachchi agooga ak gorgweaksi aba deaweedeedeang'wa.” Gwayeeshsha Fuga Yahuudi niny, “Mammiiseasa aseasa gideaba gajeenuusa siida.”

³² Ak abeeda gwasa ng'asheanda ghayi rugu Yeesu nea ghoahiimu miyeeda jea ghami giduurji.

³³ Gabiikta Bilatto jeeda gheeda sugoochcheandumeeda ak gaguursa Yeesu ak ghoanyaash, “Ang'iing'i guwosi sugoochcheanda Yahuudi?”

³⁴ Ghwasha Yeesu nea gwayeeshsha, “Ng'asheesu girgu ang'iing'i ghana rukuneey buuneeda iitteanyu?”

³⁵ Ghwasha Bilatto nea gwayeeshsha, “Neada aniini geawoschi siida Yahuudi? Ang'iing'i gweanneey heedeanyu fuga emeedeang'wa sea ashoohoodiga hees. Neada eanisni naaha?”

³⁶ Ghwasha Yeesu nea gwayeeshsha, “Sugoochcheandumeedeanyu maba badaydeaba ng'eanyiini; ama inyeetta sugoochcheandumeedeanyu gaba badaydeaba ng'eanyiini, ghwanyawa gaygang'uchchi soomjoogeasu aba meatkweedeanyu ameayiinan geattinga fuga Yahuudi; amaduukku ghamneawa sugoochcheandumeedeanyu ea maba ng'eanyiini.”

³⁷ Hean gwayeeshsha Bilatto niny, “Asi ghamneawa ang'iing'i guwosi sugoochcheanda?” Ghwasha Yeesu nea gwayeeshsha, “Girgu ang'iing'i gideaba aniini geawoschi sugoochcheanda. Aniini geejiilan appadaydeaba nii, nea appadaydeaba nii ghawunnyi jeeda ng'eanyiida, gideaba gaydamuuwwu huumeanda. Siida wassean mida jeeda humeanda iissa goleeysiit ghutteanyu.”

³⁸ Gwayeeshsha Bilatto niny, “Humeanda naaha gil?” Ing'atta rukunoodeaba ng'asheesu gabiikta gichcha heeda fuga Yahuudi mida jarooda ak gwayeeshsha, “Aniini mwadaahi gidinyeandeaba siisi.

Yeesu gergweaksiina miyeeda

³⁹ Iiduw gondeawi agooga seareeda ghaheang'wa iissa googasayi deattinneegwa siyagi mida ghealooniga damanda ghwelmeeda Basakka; asi googasayi deattineegwa sugoochcheanda Yahuudi?”

⁴⁰ Gabiikta gojuur nea gwayeeshsha, “Mii siisi, geegasayi Baraaba!” Nea Baraaba abeeda goreedi buuneeda haleanjeeda.