Yohaana 16 - NEAJEEDA EESH BEA BUUNEESSEAN

¹ “Ng'asheesu nearukuneegwa sean ak ea adoappeadi.

² Gaygohelleweegwa Buuneeda ghorajeega sinnealshachcheewa; aba huumwa, aba gideaba ghwaan damanda ama siida nuseegwa jeaghaghay gili bwat Aseetta.

³ Gaygwasmaneegwa ng'asheesu aba gideaba mwanala Bwaabwa ak amwanalan eara aniini.

⁴ Asi nearukuneegwa ng'asheesu aba gideaba ihidu damandida abeeda ghoapkaachchi gideaba nearukuneegwa. “Ng'asheesu ghayi meabay darukuneegwa ammwadi aba gideaba gendeayi.

Gadiyeeda Gurorooda Ghaydit

⁵ Ak ghamneawa geawi heeda dea ajeaknean; ak ghanyea manda eara siyagi aba jeedeang'wa anyaashan nea gwayi, ‘Gigali yeenu?’

⁶ Ghamneawa ea nearukuneegwa ng'asheesu ak aning'ut jeesingeagwa giseaneega.

⁷ Ak ghamneawa gearukuneegwa huumeanda, ak gajanyagaada iyeawi, aba gideaba iimeawani ea mayghwahidu Weedaneeda heedeang'wa; ama eawi, gaydanung' ghwaan heedeang'wa.

⁸ Nea abeeda iihidu gaygoodeajiisa ng'eanyiida ng'asheega ring'eeda, ea doobiiwnatta ea girgweaksiinda;

⁹ aba ng'asheega ring'eeda, aba gideaba mwamwasaan;

¹⁰ aba ng'asheega doobiiwnatta, aba gideaba geawi heeda Ghweanda, abeeda ea maygudabiikta adaahan;

¹¹ aba ng'asheega girgweaksiinda, aba gideaba siida ambaliischi bea ng'eanyiida sirgweaksa.

¹² “Ea guttandeawa ng'asheega saang'a jea darukuneegwa, ak ghamneawa amwajoammuusa ghamneawa oang'ng'waanya.

¹³ Amahidu Gurorooda huumeanda gayghoadoabiweagwa ea ghoahittaneagwa jeeda humeanda sean, aba gideaba maygabaloola gheambalmeadaannyi, niny gaygwarukuneegwa ng'asheega iiy ak gay gwarukuneegwa ng'asheega jea ghwahidu.

¹⁴ Niny gayghoaghambiidan, aba gideaba gaygageanna heedeanyu ak gwarukuneegwa.

¹⁵ Haleanjeessean mideawa Bwaabwa geasu gil; ak ghoaw gidearukuni gideaba gaygageanna heedeanyu ak gwarukuneegwa.

Giseaneega ea hoseaneega

¹⁶ “Gudughwashoada ghaadi nuwaas ak ea maygudadaahaan, gichcha gudughwashoada gheadi nuwaas, ak gajabiikta adahaan.”

¹⁷ Ak gonyeari geat Ginealangaaschi mwaatkwa nea gwayi, “Ak gwarukunaneasa naaha gideaba, ‘Gudughwashoada ghaadi nuwaas ak ea maygudadaahaan, ak gabiikta gwayi gichcha, gudughwashoada gheadi nuwaas ak gajadaahaan; aba gideaba geawi heeda Ghweanda?’”

¹⁸ Gaba nii eeshsha niirja, “Ak gideabedeaba ng'asheanji aayi, ‘Gudughwashoada ghaadi nuwaasiin gidaabwa?’ Aseasa meanali eara girrugu.”

¹⁹ Gwajeeng'u Yeesu gideaba geegasa eanyaash niny; ng'atta gwayeeshsha saawa, “Gonnyearayi geat ng'asheega gwachchi eargu bea gideaba, ‘Gudughwashoada ghaadi nuwaas ak ea maygudadaahaani, ak ghwashoada gheadi nuwaas ak gajadaahaani?’

²⁰ Aba huumwa, aba huumwa, geayeeshshineegwa, agooga gajooyyeawda nea goguttu heareega ak gaygang'weela ng'eanyiida, gajoogiisana amaduw gayghwayamwa giseaneegeagwa ak ghoaw hoseaneega.

²¹ Gatmooda iissa iihidu damanda jeatta gagiisan aba gideaba nihidu damandaannyi, amaduw nea niji jeepta, ea maygudughoapkaat sawanadeeda gwachchi aba hoseaneega gideaba siji jeepta aba jeeda ng'eanyiida.

²² Ghamneawa gondeawi giseaneega ak gaydabiikta dadaheagwa ak abeeda gaygahoosan guroruunatkeagwa, nea hoosaneegeagwa ea manda siida jea gageandeawa heedeang'wa.

²³ Eaweettida manda ng'asheanda jea oannyaashaan. Aba huumwa, aba huumwa, geayeeshshineegwa, gidawassean oomushchi Bwaabwa gaygagoneegwa aba gheawungeasu.

²⁴ Eara ghamneawa miyoomusa ng'ashaan aba gheawungeasu; amusa, ak gajanyasa ak abeeda ghwahit hooseaneegeagwa.

Najoarji ng'eanyiida

²⁵ “Ng'asheesu gearukuneegwa nea ghawaaghannyi; ak ghwaan damanda jea eamayguttargu ng'asheega nea ghawaaghannyi, gaydargu iitta Bwaabwa nea ghaabwadakti.

²⁶ Eaweettida gajamusa aba gheawungeasu; ak ea maydayeeshshineegwa gaydamwaash Bwaabwa appadahukkeagwa;

²⁷ aba gideaba Bwaabwa niny ghabwariinyeagwa agooga aba gideaba agooga noabwariinyaan aniini nea noamwaschaan gideaba gealeabu heeda Bwaabwa.

²⁸ Aniini gealeabu heeda Bwaabwa, ak ghaawuunnyi jeeda ng'eanyiida; gichcha, ak ghamneawa ghabeawi ng'eanyiida ak geawi heeda Bwaabwa.”

²⁹ Gwayi Ginealangaaschi, “Asi ghamneawa nurgu ng'asheega nea gibwadakti!

³⁰ Asi ghamneawa aseasa sinalli gideaba ang'iing'i ginali haleanjeessean, ak ghanyea mudugwanda siida jea ghoanyaashnyi gil, asi ghamneawa sumwaschi gideaba ang'iing'i gileabu heeda Aseetta.”

³¹ Ghwasha Yeesu nea gwayeeshsha, “Heappi ghoamwaschi ghamneawa?

³² Ghwaan damanda, aba huumwa ea nihidu, dea jea adarda oagasean ak gaba siisi weah gheannyi, ak gajanung'usean heeda nea gabwageaw; nea ghana aniini amwabwageaw, aba gideaba gendeayi sea Bwaabwa.

³³ Ng'asheesu gearukuneegwa nea geagasayi abeaha hoyyoo aba jeedeanyu. Aba jeeda ng'eanyiida gajanyasa sawanadeeda; asi oahhang'waanya jeesingeagwa, aba gideaba aniini najoarji ng'eanyiida.”