Yohaana 13 - NEAJEEDA EESH BEA BUUNEESSEAN

Yeesu gohuun geeshanga ginealangaaschi

¹ Hean nea mii ghwahidu ghwelmeeda Basakka nea ninal Yeesu gideaba damandaannyi jea ghabeawa ng'eanyiida gawa heeda Bwaabwa nihidu, niny nea ghabwariiy fugaaschi mida jeeda ng'eanyiida, ahuumwa gil ghabwariiy ea ghwanaawda.

² Damanda agiischooda bea shing'ada, nea abeeda ea niyiin meang'nyeandeenda jeeda Yuudaayda Iskariyotte, was balleanda Simon gichchea ghwalaapta bwadaw niny,

³ abeeda Yeesu ghwanal gideaba niyiin Bwaabwa geattingaaschi halaneassean, ea gideaba niny gwaleabu heeda Aseetta ak gaygabiikta heeda Aseetta,

⁴ hean ghang'eat aba heeda agiischeewa, ak ghaghatghat hang'wakkaaschi ak gageanu hang'da mwanang' ak gwaradiischeewa.

⁵ Ng'atta gageanu harakta ak ghwayiin beega, ak gohuun geeshanga ginealanga, ak gobuus aba hang'dida mwanang' radischewean.

⁶ Iiduw ghwahitta heeda Simon Betro; amahit gwayeeshsha Betro niny, “Ng'uttamiida gajahuuna geeshangeasu?”

⁷ Ghwasha Yeesu nea gwayeeshsha, “Ang'iing'i minali gideasinnyi ghamneawa ak gaynala iiduw.”

⁸ Gwayeeshsha Betro, “Ang'iing'i majahuuna geeshangeasu earahay.” Ghwasha Yeesu nea gwayeeshsha niny, “Iimeahuuni geeshangaagu ea meguyeeni.”

⁹ Hean gwayeeshsha Simon Betro, “Ng'uttamiida, adabeeda ea mii geeshangeasu gil akghwahit, eara geattingeasu ea uhuudeanyu!”

¹⁰ Gwayeeshsha Yeesu niny, “Siida inihuushshi ea manda gichchea gohuun geaghus geeshangaaschi, aba gideaba nimmiidu saseessean; agooga gowoschi miyaas, ak ea mii oagaseani.”

¹¹ Abeeda niny ghwanal siida jea ghwala bwadaw; ak ghoaw girrukuna gideaba, “Agooga mowosi miyaas oagasean.”

¹² Ng'atta nea Niiiit gihuunda geeshanga, nea nibiikta gookwa hang'weakkaaschi, gabiikta gobideada aba heeda gwachchi, ak gwayeeshsha saawa, “Noanalli ng'asheanji easinneegwean?

¹³ Agooga gogurewanean Ginealshochcheanda ea Ng'uttamiida; ak ghwadoabiiw, aba gideaba geawoschi.

¹⁴ Asi aniini iyeawoschi Ginealshochcheanda ea Ng'uttamiida ak gajoohhuuna geeshangeagwa, asi gammiiseegwa earagooga gideaba ohhuunna geeshangeaba geat.

¹⁵ Asi neagonnyeegwa gichchea agalana iissa abeeda eara agooga gosindi gidaghamneawa easindi aba hedeang'wa.

¹⁶ Aba huumwa, aba huumwa, geayeeshshineegwa, soomjeanda mii haweawa siidaannyi haw, ghana siida sichcheakta mii haweawa siida ajeakta.

¹⁷ Asi iyoonalli ng'asheesu abeeda ghang'wana iyoosinnyi.

¹⁸ Meabaloolani badahuukkeagwa oagasean; aniini ghanalli gea aloachchi; ak abeeda gwasa ng'oruutka, ‘Siida akk mukkatteaydeanyu niyamgeaw ak ghwalaabwan bwadaw.’

¹⁹ Nearukuneegwa ng'asheesu ghamneawa nea mii gwasa, ama eaweeda seameewa abeeda ghoanalli gideaba aniini niny.

²⁰ Aba huumwa, aba huumwa, geayeeshshineegwa, Siida deapta dea eajeagu abeeda ghwadeaptanaan aniini, nea siida deaptanaan aniini abeeda ghwadeapta dea ajeaknean.”

Yeesu ghwaramoar gichchea ealaapta bwadaw

²¹ Ahiit Yeesu rukunodeaba ng'asheesu gwasawana guroroodaannyi, ak gamuwwu nea gwayi, “Aba huumwa, aba huumwa, geayeeshshineegwa, siyagi aba jeedeang'wa gayghwalaabwan bwadaw.”

²² Hean gong'wearsa geat ginealanga ak amwanala siida baloola.

²³ Nea ginealaneanagi bwariiy Yeesu abeeda eaneekkeewa daghatta Yeesu;

²⁴ gageanu Simon Betro ak ghaghoash ginealaneetta nea gwayeeshsha, “Heappi anyaasha gabaloola badaydeabeang'a.”

²⁵ Hiji duu gwadiiwa geaw ginealaneedida aba daghatta Yeesuun, ghoanyaash nea gwayeeshsha, “Ng'uttamiida siida ng'eaha?”

²⁶ Ghwasha Yeesu ak gwayeeshsha, “Niny siitta jea dang'utta murmurjeanda ak ghadawjiini.” Ghang'utta murmurjeanda, ak ghoadaw Yuuda balleanda Simon Iskariyotte.

²⁷ Ing'atta ging'ng'ooyda murmurjeanda ghoabitta Shattaani jeedaannyi. Gwayeeshsha Yeesu niny, “Gitta igasayi sinodean lamwaja sina.”

²⁸ Abeeda ghanyea manda eara siyagi aba jeedeaba fukka agiischiin dea jeeng'u gidarukusiina niny ng'asheandida.

²⁹ Aba gideaba Yuuda abeeda siida adiinng'iida sandakkwajeanda lappiya gil, hean ghaghay ginealanga mwaatkwa gili eeshsha Yeesu shaaha haleanjeeda sigasa eaweetta ghwelmeeda, ghana gideaba gwayeeshsha adawa fuga barbari haleanjeeda.

³⁰ Ing'atta geandeayda murmurjeanda gwaritta jarooda aba geeshangiga, nea damandida ea eawa gil.

Digheandeesh

³¹ Iiduw nea ghang'eat gawa, gwayi Yeesu, “Asi ghamneawa Balleanda Siida sikghambiit ak eara Aseetta ea sikghambiit aba jeadaannyi.

³² Abeeda isikghambiit Aseetta aba jeadaannyi, abeeda gayghoaghambiit niny aba jeadaannyi, ak gaybay ghoaghambiit.

³³ Diibiga manang'i, aniini gajeendeayeena gil nuwaas. Gajagassean; ak gaydarukuneegwa gidaghayi earukusi fuga Yahuudi, ‘Heedeawi aniini mwajoammusa apkaani.’

³⁴ Geagonnyeegwa digheanda eesh, abwariinnya geat, ak ghoabwariiydi geat gida abwariiydaneegwa.

³⁵ Ak abeeda gayghwanal buuneessean gideaba gowoschi ginealangeasu iyoobariinyayi geat agooga.”

Yeesu ghwaramoar sheang'da Betro

³⁶ Hean gwayeeshsha Simon Betro niny, “Ng'uttamiida, gigali yeenu?” Ghwasha Yeesu nea gwayeeshsha, “Heedeawi mwajammuusa eanni geeshteanyu ghamneawa; geaghus eanni geeshteanyu iiduw.”

³⁷ Gwayeeshsha Betro niny, “Ng'uttamiida, neada ghwasaan inyas mwaydaammu deadu geashtaang'u ghamneawa? Aniini gaydaghaashta eaweegeasu appadaydaang'u.”

³⁸ Hean ghwasha Yeesu nea gwayeeshsha, “Gajaghaashta eaweegaagu appadaydeanyu? Aba huumwa, aba huumwa, geayeeshshineey, damanda migoguula nghaghooda gajanishaang'nyaan niba samwagu.