Yohaana 11 - NEAJEEDA EESH BEA BUUNEESSEAN

Miyeeda Lasaaro

¹ Ghayi gwanda siisi miyaan suguura Lasaaro bea ng'eanyiida Bettaniya, nea gharang'da geaba Mariya gil ea huda ghaamwat suguura Marta.

² Mariyaheani diitta ghayi easha Ng'uttamiida nagheeda ng'andit ama ng'atta gobuus geeshanga aba budeagaaschiin gil, nea abeeda ghamnyaan oorjeeda ghaamwat suguura Lasaaro.

³ Hean gojeaksa Haweega ghaamwat nea geyeeshsha, “Ng'uttamiida, siida ibwariinyi ghamnyaan.”

⁴ Iiy Yeesu ng'asheanji gwayeeshsha, “Geeyoani maygweadu miyeeda, gaba gigheambiitta Aseetta, miyeanji geebaysiina gideaba abeeda gajeakghambiit Balleanda Aseetta.”

⁵ Yeesu abeeda ghabwariiy Marta ea huda ghaamwat ea Lasaaro.

⁶ Iiduw nea ghwanyas Yessu iitta gideaba ghamnyaan, gopteada aba hoowa ea ghang'atta eawoji iyyeenya.

⁷ Iimuchchu nea ghang'atta ng'asheesu gwayeeshsha ginealangaaschi, “Aniyean ebiikta eeweaya Yudeeya.”

⁸ Hean ghoanyaash Ginealanga nea geyeeshsha, “Rabi, migageawiit damanda gasseewa fuga Yahuudi gaftaneey lagheanga ak ghamneawa gigasayi biikta gichcha hoowa?”

⁹ Ghwasha Yeesu nea gwayeeshsha, “Heappi robuutka aseetta aba jeedaskwearda mii damaniyyeenya? Asi siida iweelweel askweari ea mwoammu ghwalas geeshta gil aba gideaba ghwadaa weeshinnda ng'eanyiida.

¹⁰ Duukku siida iweelweel eawa ghoammu ghwalas geeshshta gil aba gideaba manda jeadaannyi weeshinda.”

¹¹ Iiduw nea ghoahiit Yeesu rukunoodeaba ng'asheesu gwayeeshsha saawa, “Siida siduupcheewi was Lasaaro nilil, ak gaydawa daheat.”

¹² Ghwalamda Ginealanga ak gwayeeshsha, “Ng'uttamiida ibeachchi ruweanga, gayghahaap.”

¹³ Nea Yeesu gabaloola iitta miyeadaannyi, ak ghaghay saawa gili baloola iitta ruweanga.

¹⁴ Hean gwarukusa Yeesu nea ghoadajiit, “Lasaaro nimi;

¹⁵ ak ghamneawa geahosannyi appadahukkeagwa ak anighaas heetta ea meandani hoowa ak abeeda ghoamwaschi. Asi eweaya headannyi.”

¹⁶ Gwayeeshsha Domasooyda suguura Saleaygweanda ginealanga suurja, “Apkaani eweaya ak geemeewuudayeewi niny.”

Yeesu dunnooda gil ea eaweega

¹⁷ Eaweeda hittaawa Yeesu hoowa abeeda Lasaaro nibiida jeessigeeda eawooji ang'wan.

¹⁸ Abeeda Bettaniya eanekkeewa Yerusaleemu maygwaduulu aseadeanagi hitteayda.

¹⁹ Nea abeeda anupka Fuga saang'a bea Yahuudi heeda Marta ea Mariya egeandeawa salgheang'da aba miyeeda oorjeeda ghaamwat.

²⁰ Hean iiy Marta gideaba ghwaan Yeesu gawa roonnyeeda nea Mariya geanung'wa ghoah.

²¹ Gwayeeshsha Marta Yeesu, “Ng'uttamiida inyeeda heetta gindi hiji ghwanyawa oorjeeda giyeanya gajea miighami.

²² Eara ghamneawa ghaanalli gideaba iimusi Aseetta gidawassean gaygagoonnyi.”

²³ Gwayeeshsha Yeesu niny, “Oorjeeda geamadu gaygwaduudu gichcha.”

²⁴ Gwayeeshsha Marta niny, “Ghaanalli gideaba gaygwaduudu gichcha eaweetta jea gwaduttuuna buuneeda eaweeda huydean.”

²⁵ Ghwalamda Yeesu ak gwayeeshsha niny, “Aniini geawoschi dunnooda ea eaweega; siida iimwasan eara ghami gajeamajeek,

²⁶ nea siida majeek ak ghamwasan ea mayghami earahay. Ghamneawa gumwasi ng'asheanji?”

²⁷ Gwayeeshsha niny, “Huumwa gil Ng'uttamiida; aniini ghamwaaschi gideaba ang'iing'i guwosi Gristo, Balleanda Aseetta, jea ghwahidu jeeda ng'eanyiida.”

Yeesu goyyeawda

²⁸ Iing'atta rukunoodeaba ng'asheanji, gawa ak gaguursa huda ghaamwat suguura Mariya, ak gameang'sheesha nea gwayeeshsha, “Nukkwa Ginealshoochcheanda gwanda hiji nea gaguuru.”

²⁹ Iiy ng'asheanji gotkweal ak gawa headaannyi.

³⁰ Abeeda Yeesu mii ghwahidu gharang'dida, gudugwanda heeda ghwanyawa depteaysa Marta.

³¹ Hean daa fuga Yahuudi ghwanyawa mideayi aba jeeda gheeda nea gageanda salgheang'da, gidang'eatta ak gidalamwaajaadayda Mariya nea gwaritta jarooda, ghwaat geeshta, nea ghaghay gili wea heeda bung'eeda goyyeawda.

³² Hitta Mariya heeda mida Yeesu ghwadaa ak gwatkuy aba madeadaannyi ak gwayeeshsha, “Ng'uttamiida, heetta inyeeda gindi hiji orjeediyya gajea mii ghami.”

³³ Daa Yeesu gidayyeawudeayda nea eara fuga Yahuudi ghwanyawa adeana earaga goyyeawda ghang'ut giseaneega nea gwasawana guroroodaannyi;

³⁴ ng'atta gwayeeshsha, “Ghoayiinnyi yeenu siida?” Geyeeshsha niny, “Ng'uttamiida benni daaha.”

³⁵ Goyyeawda Yeesu.

³⁶ Hean gwayi fuga Yahuudi, “Adaaha gidabwariiyda!”

³⁷ Amaduw gwayi mwaatkwa aba jeannyaawa, “Assiisi ghayi jaat gheanyanga siida ng'oawiin ghwaraay ghwanung' amwami siisi?”

Lasaaro gettuudu

³⁸ Iiduw nea nigiisan Yeesu aba jeadannyi ghwahitta heeda bung'eeda; abeeda bung'eeni gwaleeda nea gedukutteawa lagheaneeda.

³⁹ Gwayeeshsha Yeesu, “Ageanda lagheaneeda.” Ghwasha Martaayda was huda gheamatta siida heetta meahiin ak gwayeeshsha niny, “Ng'uttamiida, gajeanimealu aba gideaba nii eaweedeaba ang'wani aba miyeeda.”

⁴⁰ Hean gwayeeshsha Yeesu niny, “Heappi midarukuneeyi gideaba iimwasi gaydaaha gigheambiitta Aseetta?”

⁴¹ Hean gegeanda lagheaneetta. Ng'atta gong'weersa Yeesu humng'eeda ak gwayi, “Geabadischoweey Bwaabwa aba gideaba iissa giyiinyi gideargu.

⁴² Ghaanalli gideaba iissa gileysean iit galeagasean. Ak ghamneawa gearukuni ng'asheanji badahukkeaba fiisu minaada aba hijiin, ak abeeda gayghamwas gideaba gijeaknean.”

⁴³ Ng'atta rukunoodeaba ng'asheesu gaguurda aba ghuutta haw, “Lasaaro, Rinni jarooda.”

⁴⁴ Gwardu jarooda siitta heetta meahiin, nea radaat geeshanga ea geattinga aba weageakka nea gheamamdaannyi ea sudukutta aba hang'da. Gwayeeshsha Yeesu saawa, “Ottina, ak ghoanung'waadi gawa.”

Geamwaal gichchea enuusta Yeesu

⁴⁵ Hean iiduw Fuga saang'a bea Yahuudi heetta hidu heeda Mariya idaah gitta siniin, ghamwas niny;

⁴⁶ gaweay Fuga mwaatkwa heeda Farisayajeega ak ghoadayda iitta ng'asheanda sin Yeesu.

⁴⁷ Gwasin Ashoohoodiga hees sea Farisayajeega girgweageeda nea gwayi, “Gajeesna naaha? Anda siisi iissa gwasin gwadeagwajeega saang'a muuchchi.”

⁴⁸ “Gajiiduw isunung'waadi gwasnu gayghamwas buuneessean, ak gayghapka fuga Ruumi gwanyarja horgeedeanya ghaydit ea emedeanya.”

⁴⁹ Ng'atta gwayeeshsha siyagi suguura Gayafa was ashoohoochcheanda haw gweaydida, “Agooga moanali gil;

⁵⁰ agooga moanaali gideaba ghang'wana ghami siyagi aba jeedeang'wa appadahuukka buuneeda, mwasamwa gideaba gajealas uhuuda eameassean.”

⁵¹ Siisi marukunana uhuudannyi ng'asheesu, gwarukuna gideaba niny ashoohochcheanda haw gil aba gweaydida, niny gwaramoorssa gideaba Yeesu gayghami appadayda eameeda,

⁵² ak ea mii badaydeaba eameani gil akghwahit, ghabwada gideaba gagasa gonyeaschi diibiga Aseetta nigeawiit ghwadarda ak ghoaw gilagi.

⁵³ Ghang'eada eaweedida gagasa gheatta gichchea gwanuusta.

⁵⁴ Hean eamudu gwaneayeewa Yeesu bugusta fuga Yahuudi nea ghabwadakta, ghabeawa hoowa ak gawa ng'eanyiida neekkeewa dareapchcheenda jeeda mujiineeda suguura Efraimu; ak gobiida hoowa sea ginealangaaschi.

⁵⁵ Abeeda ea ninekkiit Basakkeeda fuga Yahuudi, gaweay fuga saang'a beawa daroorakka ak gaweay Yerusaleemu ghoammiidu geat nea mii ghwahidu Basakka.

⁵⁶ Hean iissa geegasa Yeesu. Ak ghabwat geat aba gheeda sibatta Aseetta ak gonyeari geat gideaba, “Gawurjiin? Mayghwaan jeedeaba ghwelmeeni?”

⁵⁷ Abeeda ea niidayda Ashoohoodiga hees ea Farisayajeega iitta gideaba siida deeppa ghwanal heeda mida Yeesu ea darukusiina ak abeeda geang'ng'waay.