Yohaana 10 - NEAJEEDA EESH BEA BUUNEESSEAN

Gissigala haghweadoochcheanda

¹ “Aba huumwa, aba huumwa, geayeeshshineegwa, siida wassean maska gidaghuut ak gawa jeeda gheeda gisilga amaduw ghamwaasta ak ghwala nawa nuut, siisi mareanghweanda gil nea goreedi fii haleanjeeda;

² duukku siida weah jeeda gheeda nea gwasik gidaghuut, siisi haghweadoochcheanda gisilga.

³ Iissa gwajeassa furiischochcheanda gidaghuut; ak iissa ghwayiiy gisilga ghuuttaannyi, ak iissa gaguursa gisilgaaschi nea gaba niigursiina ghawungaaschi ak goruutta jarooda.

⁴ Ing'atta girutteayda hean goshedeawa ak ghwaat geeshta gisilga aba gideaba ghwanal ghuuttaannyi;

⁵ Mayghwaat geeshta rabascheanda gaygamng'aw aba gideaba mwanala ghuusiga rabasta.”

⁶ Yeesu gwarukuta ng'asheesu awaaghaniin, amaduw eamajeeng'na saawa gitta rukusean.

Yeesu haghweadoochcheanda miy

⁷ Gabiikta Yeesu gichcha ak gwayeeshsha, “Aba huumwa, aba huumwa, geayeeshshineegwa, aniini geawoschi gidaghuutta gisilga.

⁸ Fuga suurja sean ghayi ashooynanean mareanghooga gil ea fuga areedi fih haleanjeeda; ak ea mealeeysiniit gisilga.

⁹ Aniini geawoschi gidaghuut, siida iiweah gah nea gwasku heedeanyu gajeelealu, gaygawa gah nea gwardu ak abeeda gayghwanyas haghweeda.

¹⁰ Mareanghweanda iissa ghwaan gwajawadiischi nea gwanuus nea ghwadattas; aniini ghaawunnyi ghwanyasa eaweega ea ghwanaawda.

¹¹ Aniini geawoschi haghweadoochcheanda miy. Haghweadoochcheanda miy iissa ghoaghaashta aweagaaschi appadayda gisilga.”

¹² “Siida sittaw gidageattinda mawosa haghweadoochcheanda bissa gisilga ea mii gaaschi, idaa suyeanda nea ghwaan, gwanung'usa heeda gisilga ak gamng'aw; ak ghoang'ng'waay suyeanda ak ghoadarda.

¹³ Niny gamng'aw aba gideaba maduuppa ng'asheega gisilga aba gideaba niny siida mushaahara gil.

¹⁴ Aniini geawoschi haghweadoochcheanda miy; aniini ghaanalli geasu ak eara geasu ghwanalan,

¹⁵ gidanaldanaan Bwaabwa, ghaanalli Bwaabwa; aniini ghaghaashti eaweegeasu appadahuukka gisilga.

¹⁶ Geabiissi dandeawa gisil suuk manda seammoodeaba gheawi; asi eara suu gammiisa gideaba gaydaghuumu, ak gayghwayiiy ghuutteanyu. Ak abeeda ghoaw hawannyeanda agi, ak haghweadoochcheanda gajaagi.

¹⁷ Aba sareani Bwaabwa ghabwariinyan, aba gideaba ghaghaashti eaweegeasu, ak geabiikti dageanu gichcha.

¹⁸ Manda siida geandeawanean, ghaghaashti aniini aba uhuudeanyu nea gabwageaw. Geandeawi uurda jea daghashtaawa ak geandeawi uurda jea dabiikta dageanna; nii gidaghayi adeaganean Bwaabwa sinooda.”

¹⁹ Hean gabiikta gichcha ghwadarda fuga Yahuudi appadaydeaba ng'asheesu.

²⁰ Gwayi fuga saang'a aba jeanyaawa, “Siisi gabearji meangeenda, ak ghabwada nii gaba geas; ghwasaan anda golleysiit?”

²¹ Gwayi mwaatkwa, “Ng'asheega sunu maba siida bearji meangeeda. Neada meangeeda ghoammu ghwajaat gheanyanga siida ng'oowi?”

Yeesu geaheawa

²² Abeeda aba hoowa bea Yerusaleemuun gwanda ghweelmeeda sumwanya gheeda sibatta Aseetta;

²³ nea abeeda damandida ea damanda gorogeeda, nea eara Yeesu abeeda gwaneayeewa jeeda gheeda sibatta Aseetta heeda was dodooda Sulemaani.

²⁴ Hean gwaneaweesa Fuga Yahuudi ak gwayeeshsha, “Gaynung'waada eppiidana jeeda hirbabandeeda ea ghoaw eeju? Iwosi Gristo nea huumwa gil girukuneasa nea gidajiidi.”

²⁵ Ghwasha Yeesu nea gwayeeshsha, “Nigeawiit darukuneegwa ak ea mwoamwasi. Gadiyoojiga easinnyi aba gheawunga Bwaabwa gamuuwwunean aniini;

²⁶ iiduw ea moamwasi agooga aba gideaba mowosi gisilgeasu.

²⁷ Gisilgeasu ghwayiiy ghuutteanyu ak ghaanalli saawa ak gweadu geeshteanyu;

²⁸ aniini iissa ghaadawji eaweega manda mudeanooda, ak eara saawa ghanyea maygwarooda eara hay eaghoaw eaweega manda mudeanooda, nea ghanyea manda siida ammu gageandeawa geattindeanyu.

²⁹ Bwaabeedeanyu, goonan ahaweawa sean, ak ghanyea manda siida ammu gageanda saawa aba geattinga Bwaabwa.

³⁰ Aniini sea Bwaabwa gewoschi gilagi.”

³¹ Hean gageanu Fuga Yahuudi lagheanga nea gajeefta.

³² Ghwasha Yeesu nea gwayeeshsha, “Aniini naahimneegwa gadiyoojiga saang'a miyaas leabu heeda Bwaabwa; abeeda ea anneeda gil aba jeedeaba ng'asheesu jea ghwanung' aftean aba lagheangean?”

³³ Ghwasha Fuga Yahuudi nea gwayeeshsha niny, “Majeefteey aba gadiyoojiga miyaas isnayi, gaygweagu ng'asheagagu munyas irukusi Aseetta; aba gideaba gisni geaw Aseetta nea guwosi siida.”

³⁴ Ghwasha Yeesu nea gwayeeshsha, “Miyeang'waari aba jeeda deaweededeang'wa gideaba, ‘Geayeennyi gowoschi aseechcheekka?’

³⁵ Abeeda iiguura aseechcheekka fukka ghayi hinna ng'asheanda Aseettean (nea ng'oruutka ea mayghwayamwa),

³⁶ goobalooli siitta ghayi ammiidu Bwaabwa ak gojeagu ghwaan badayda ng'eanyiidean ak goyeeshshi, ‘Girukuni badayda Aseetta ng'asheega munyas,’ aba gideaba geayeennyi, ‘Aniini geawoschi Balleanda Aseetta?’

³⁷ Abeeda imeasni gadiyoojiga Bwaabwa, ea adoamwaschaan;

³⁸ ama easinnyi earappeadi moamwasaan ghang'wana ghoamwaschi gadiyoojiga ak abeeda gojeeng'u nea ghoanalli gideaba Bwaabwa gwanda jeedeanyu nea geandi aniini jeada Bwaabwa.”

³⁹ Gabiikta Saawa gagasa ghoang'ng'waay amaduw gamul aba geattinga nyaawa.

⁴⁰ Gabiikta Yeesu gawa gigheawda Yordaan heeda ghayi abattisanniisa Yohaana buuneeda ammwadi ak gobiida hoowa.

⁴¹ Gaweayi fuga saang'a headaannyi ak geyeeshsha, “Yohaana miigwasin gwadeagooda, duukku ng'asheega sean ghayi rugu appadaydeaba siisi ahuumwa gil.”

⁴² Iiduw ghamwas fuga saang'a mida hoowa.