Yakkobo 5 - NEAJEEDA EESH BEA BUUNEESSEAN

Reekusiinda meanang'oodiga

¹ Asi ghamneawa meanang'oodiga, oyyeawda nea gokkuulli aba sawanadeeda jea gwahisseegwa.

² Meanang'oochcheandumeedeang'wa nimealu, nea hang'weakkeagwa aniyaak ng'weerajeega.

³ Lagheangeagwa meeng'meeng'i ea lappiyeedeang'wa ning'ut girgweatka, nea girgweatka nyaawa gaygamuuwwu ng'asheega badahuukkeagwa ak gayghwaak sasanuukkeagwa gawuurji beasta. Gowweamsi haleanjeeda heeda ottiiwshachcheewi aba eawoojiga huydean.

⁴ Ang'ulla, gidageattinda fuga gadiyeeda lach madameegeagwa, ghayi oaweachchi aba milimilanda, oyyeawda; nea shookka fuga lach ea nihitta iidiga Ng'uttamiida bea lugooda.

⁵ Agooga noppiidi jeeda ng'eanyiida nea goomnyeennyi nea gohoosannyi; ak ea noanung' gwariisha guroruunatkeagwa aba eaweetta jea ghwahinna nuusta.

⁶ Agooga norgweaksi, ak gonuuschi siida doabiiwaat; nea niny ghanyea miighoadealeagwa.

Milikghteayda ea mooshta Aseetta

⁷ Asi fuga eaduupcheewi, amilikghta ea ghwahitta damanda jea ghwahinna Ng'uttamiida. Ang'ulla, siida bwar ng'eanyi iissa gafurda haghweega ng'eanyiida bea sheayeeda haw, iissa ghamilikghta ea ghanyi ghwanyas roopta madeeda ea dea huydean.

⁸ Eara agooga amilikghta. Ommajeega guroruunatkeagwa, aba gideaba hinnooda Ng'uttamiida nineekkiit.

⁹ Fuga eaduupcheewi, adonnikkiisi geat, aba gideaba gajiiduw gergweakseegwa; ang'ulla siida laja girgweaguutka ghamiinaada aba gidaghuudajeega.

¹⁰ Aba gideaba gichchea agalana was sawanadeeda ea milikghteayda, fuga eaduupcheewi, oapkaada sibanga ghayi rugu ng'asheega aba gheawunga Ng'uttamiida.

¹¹ Ang'ulla, geguuri fiisu fuga mideawa ng'wanaweega aba gideaba ghamilikghta. Ak ea noayiinyi iitta milikghteayda Ayuubu, ak ea noadaayi gidabaysiina Ng'uttamiida gwandeawa baydeayda nea garbabu.

¹² Fuga eaduupcheewi, aba haleanjeessean, adiiduw giyaagi habeawooda, aba humng'eeda ghana aba ng'eanyiida, ghana aba habeawooda wassean, iyoyeennyi eah gagasa ghoaw eah, nea iyoyeennyi manda gagasa ghoaw manda, ak abeeda ea moppedeaysiini jeeda girgweaksiinda.

¹³ Siida ghaheang'wa nubussa sawanadeeda? Gagasa ghamwaasch Aseetta. Gwandeawa hooseaneega wasseani? Ea dasarmana duumda duumsheesiinda.

¹⁴ Aba jeedeang'wa gwanda siida miyaani? Daguursiina gweargwa ganiisa, ak abeeda ghamwaash Aseetta appadaydaannyi, ak ghoamwaara nagheeda aba gheawunga Ng'uttamiida;

¹⁵ nea mooshta Aseetta aba masaweega gaygwalealu siida miyaan, ak gaygagatkat Ng'uttamiida; amadeeppa ea nisin ring'eega, abeeda gajeesamsa.

¹⁶ Daba siisi duukkuuna ring'eemba nuut, nea gaba siisi mwaash Aseetta appadayba nuut, ak abeeda geahhaabeagwa. Siida doabiiwaat imwaash Aseetta gwandeawa uurda haw sin gadiyeeda.

¹⁷ Eliya niny siida gil mideawa searoojiga uurji sea gaasa, ak ghamwaash Aseetta muuchchi amwaroabwana roopta, ak ea maroabwana roopta gweannyeew samwagu ea shealah.

¹⁸ Gabiikta gichcha ak ghamwaash Aseetta ak ghwaroabwan, ak gwaji ng'eanyiida haghweagaaschi.

¹⁹ Fuga eaduupcheewi, siida wassean aba jeedeang'wa ineeyi ea gwasheagiida huumeanda ak godeelu sih nuut gabiigu,

²⁰ abeeda ea danala gideaba siida adeelu siida ring'eeda ea gwarinna jeeda ramaseanda naweadaannyi gaygwalealna guroroadaannyi miyeeda ak gaygwadukuta seang'ayda ring'eega.