Yakkobo 4 - NEAJEEDA EESH BEA BUUNEESSEAN

Duupcheeda sea ng'eanyiida

¹ Gweaduuni ng'uchcheeda, ak gweaduuni bearjeeda aba jeedeagwa? Mii ng'asheekka bea geawunda gheang'da ng'uchchi aba sasanuukkeagweani?

² Iissa googasayi haleanjeeda ak ea mondeawani gil; gonuuschi buuneeda. Goolachchi ghuut haleanjeeda ak ea mwajanyasa; iissa gobearji nea goong'uchchi. Mondeawani, aba gideaba moomusi.

³ Eara amusa ghanyea mwajanyasa, aba gideaba gommunyiichchi musooda, ak abeeda goosni gitta ogasayiin.

⁴ Fuga mii doobiiweadi! Moanali gideaba idupcheewi geaw ng'eanyiida ea nihuuwi weajoochcheanda Aseetta? Asi siida wassean gasa goduupchi geaw ng'eanyiida abeeda ea nisin geaw weajoochcheanda Aseetta

⁵ Ghana oaghanyi gilirugu ng'oruutka mwadaagha nea gwayi, “Gurorooni abiitta jeedeanyean iissa gagasseasa nea ghwalajaneasa ghuudi?”

⁶ Amaduw gagoaneasa dagheerjeandumeeda naawda; nea gwayi, “Aseetta iissa ghaheawa fuga adiing'ng'u geat, ak iissa ghoadaw dagheerjeandumeeda fuga eada geat ng'eanyi.”

⁷ Asi asissiina Aseetta mureeda. Oattealla Meang'nyeandeenda, ak gaygamng'aw.

⁸ Aneekkissiina Aseetta ak gaygwaneekkiseegwa agooga. Oammiinni geattingeagwa, ea fuga ring'eega, oammiinni guroruunatkeagwa, ea fuga mabwagi.

⁹ Agiisana nea gonnyahuushshi nea goyyeawdi. Reargeagwa gagasa ghwayamwa ghoaw ginyahushshooda, nea ghoaw hooseaneegeagwa giseaneega.

¹⁰ Ayaada geat ng'eanyi aba madeeda Ng'uttamiida, ak gaygagatkadeegwa.

Reekusiinda ea girgweaksiinda oorjeeda giyeang'wa bea Gristo

¹¹ Fuga eaduupcheewi adoobeerayi geat. Siida beash oorjeeda geannyaawa ghana goorgweaksa oorjeeda geannyaawa, ghabeash deaweeda nea gorkgweaksa deaweeda. Nea irgweaksi deaweeda abeeda ea muwosi siida sina deaweeda abeeda ea nuhuuwi siida laja girgweaguutka.

¹² Gwanda siyagi goona deaweeda nea goorgweakkiisa, ak ghoammu gwalealu ghana gwanuus. Ak guwosi ng'eaha inyas girgweaksi gischewoochcheandaang'u?

Reekusiinda aba ghwarjeeda

¹³ Asi apkaani ghamneawa, agoogeeda oyeenayi, “Askweareani ghana numuji gajeeweaya jeedeaba mujineeni ea mujineeni ak geeppiidi gweayda nea geekkeakshi ak goheadeeseasa haleanjeeda,”

¹⁴ amaduw ea moanali gichchea gapnu numuji. Eaweegeagwa naaha gil? Aba gideaba agooga gowoschi arooshta sidaah aba gheadi nuwaas amang'atta ghwaaroat.

¹⁵ Damanda ghwanyawa jea ayeenana, “Iibwariiy Ng'uttamiida, gajeewosa majeekcheewi ak geesinnyi gili ea gili.”

¹⁶ Ak gwasnu nukkwa ghoaghwarji geat aba ghwarjeedeang'wa. Nea ghwarjeeni sean sunuun eamuy.

¹⁷ Asi siida nal gidadoabiiw sinooda ak ea masna, aba heedaannyi niiw ring'eeda.