Yakkobo 3 - NEAJEEDA EESH BEA BUUNEESSEAN

Ng'ushapta

¹ Fuga eaduupcheewi, adoohuuyi ginealshoodiga saang'a aba gideaba ghoanalli beadi aseaseeni anealshiin jea eanyasa girgweaksiinda haw ea ghwanaawda.

² Aba gideaba aseasa eesasean iissa gearamwaschi gasaang'a, ama deeppa ea mwaramwasta siida wassean aba ng'asheega rugu abeeda siisi adoabiiwaat, ak ghoammu ghwarat eara saseadaannyi sean.

³ Iissa isiyiinnyi ghealooniga ghuusiga faraasi ak abeeda gwasinneasa mureeda, abeeda geeppalli sasanuukka nyaawa sean.

⁴ Ang'ulla maleambajeega hees ea gwadeenachcha naaha iissa ghwaat jeammeeda ng'waan, iissa geasaja gidamwanang' muuchchi sumwanmwana ak gogeal siida mwanmwan heeda wassean gasa gawa.

⁵ Asi ng'ushapta gidamwanang' gil ak iissa ghaghwar geaw appadayda haleanjeeda hees. Dareabeetta earea haw iissa ghwaak beasta mwanang'!

⁶ Ak ng'ushapta ea beasta. Nea ng'ushapta ea gidamiidoabiiwaat gil aba jeeda fugaasa, iissa ghang'uda saseessean ririnnyeanda, iissa gong'eessa beasta haleanjeedeaba garayi, ak ghoang'eat jeeda beasta hang'weaniidooda.

⁷ Aba gideaba gilinyoo ea heluutka diyeanga gil ea dea dariidakka, ea dea diyeanga badiinna ng'eanyi ea dea haleanjeeda mida jeeda basooda, geammu eefur, ak ea nigeawiit buuneeda ghoahaaghwa.

⁸ Ak ghanyea manda siida ammu ghoahaaghwa ng'ushapta, was munyinda mwahawda, ak ghwannyiit furooda eattu miyeeda.

⁹ Aba nii geebadiischeesi Ng'uttamiida was Ghweandeanya, nea aba nii iissa geamoashti buuneeda, ghayi sisin ea eegala Aseetta.

¹⁰ Aba ghuuttida assagiin iissa gwarinna ghawooda ea mooshteada. Fuga eaduupcheewi, ng'asheesu mwahida gideaba gaygwasnu.

¹¹ Gheang'deenda assakkaleallaan ghoammu gwarinna beega innya ea beega ng'weani?

¹² Fuga eaduupcheewi, heappi shabogheechcheanda, ghoammu gwaji gulageechcheanda, ghana sabiibu ghoammu gwaji shabogheetta? Asi gwasnu eara gheang'deenda moammu goruudu beega mattawi ea gea innya.

Weaghumeeda leabu suutta shamoghuutka

¹³ Nii ng'eaha aba jeedeang'wa mideawa weaghumeeda ea fughareeda? Aba giibindaannyi miy dahiimna gadiyoojigaaschi aba garbabanda ea weaghumeeda.

¹⁴ Nea iyondeawi lajoodeaba ghuut ng'waan ea gassooda shidoodeaba ghaang' aba jeeda guroruunatkeagwa, adoaghwarji geat ak ghoahuuyi ng'uyyeega aba heeda huumeanda.

¹⁵ Abeeda weaghumeeni ea maleapna heettiyeada, nii gaba badayda ng'eanyiida, ak ea maba gurorooda, ak gaba meang'nyeandeenda.

¹⁶ Aba gideaba heeda mida lachng'eanyiida ea gassooda shidoodeaba ghaang', gaygwanda mittagheasta ea giliwas ng'ashaan muy nyoo eesna.

¹⁷ Duukku weaghumeeda leabu heettiyeada gidamadeeda aamiy, nuut gaba weayda, ak ea garbabu, nea iissa goleeysiit ng'asheega buuneeda, nea gwandeawa haghweega miyaas, ak ea mayamiisachchi ghana gwareengani buuneeda.

¹⁸ Nea haghweega doobiiwnatta geehisa jeeda weayda nea gwahisa fuga sina weayda.