Yakkobo 2 - NEAJEEDA EESH BEA BUUNEESSEAN

Reekusiinda appadayda shiitmeeda

¹ Fuga eaduupcheewi, adiiduw ghoahhiimu shiitmeeda nea ghoong'ng'waanyi masaweega Ng'uttamiideanya was Yeesu Gristo, Ng'uttamiida gigheambiita.

² Aba gideaba iiwuh siida mideawa ghuniida lagheanga meeng'meeng'i ea hang'weakka miyaas jeedeang'wa nea noabwachchi geat, eara siida bwarbwar biissa gaba hang'weakka beareadi,

³ amaduw goosissi mureeda siitta akkwa hang'weakka miyaasiin ak goyeeshshi, “Apteada ang'iing'i aba hiji,” ak giyeeshshi siitta bwarbwariin, “Miinaada ang'iing'i aba hoowa,” ghana, “Apteada aba hiji bea geeshangeasuun,”

⁴ abeeda miyoashiida buuneeda aba jeedeang'wa. Ak ghoahuuyi fuga ajiili girgweaguutka munyas fugheeri?

⁵ Oalleaydiit fuga eaduupcheewi abwariinyi. Heappi Aseetta ghayi mii ghwaloat fuga barbari bea muunda ng'eanyiida ak ghwanung' gabaruura masaweega nea gwahearan sugochcheandumeeda ghayi helleesa fuga bwariiyi?

⁶ Nea agooga ea nojakteaysi mureeda siida bwarbwar. Neada meanang'oodiga ea madiing'siineegwa ng'eanyi agooga, nea gongireegwa ea ghwadeagwa madeeda girgweageeda?

⁷ Nea marukunana ng'asheega munyas gheawungiga miyaas ghayi sugoneegwean?

⁸ Hean iyoosinnyi deaweedeedida bea sugoodigean gawuurji ginnyaashta ng'oruutka nea gwayi, “Bwariiyda giischewoochcheandaang'u gidubwariiydi geaw,” abeeda goosinnyi ng'asheanda miy.

⁹ Iiduw iyoashiichchi buuneeda goosinnyi ring'eeda, ak gaygorgweakseegwa deaweeda ak ghoahuuyi fuga adiiy.

¹⁰ Nea siida wassean iyang'ng'waay deaweedajeega sean amaduw gwaruusa ng'asheanjagi nidiiy appadahuukkeaba sean.

¹¹ Aba gideaba siida ghayi ayi, “Adimealuuli,” ghabwada gwayi, “Adinuusi siida.” Earappeadi mii gamealuul ak ea ninuus siida, abeeda ea nihuuwi siida nuus deaweeda.

¹² Asi arukuni ak goosinnyi nea gowuurjeewi fuga jea ergweaksiina deaweedeeda jea gweadu giibaldeaba geat.

¹³ Aba gideaba girgweaksiinda mayghabwayda siida mandeawana baydeayda; asi baydeayda iissa ghwajoar girgweageeda.

Masaweega ea gadiyoojiga

¹⁴ Fuga eaduupcheewi, gayghwaloat naaha, iyayi siida geandeawi masaweega ak ea mandeawana gadiyeeda? Masaweekka ikkaaschiin gayghoammu gwalealu?

¹⁵ Iideeppa adawiish oorjeeda giyeang'wa ghanea huda giyeang'wa gil ak ea mandeawana gichchea ghwaak bea galeagasean,

¹⁶ ak gwayeeshsha siyagi aba jeedeang'wa saawa, “Aweayeena nea gobeayi weayda ak gojooyi beasta ak golang'uuchchi,” nea moattawi haleanjeeda gasa saseeda, gayghwaloat naaha?

¹⁷ Asi gwasnu eara masaweega nea gaba geaw iimandeawana gadiyoojiga aanimi.

¹⁸ Ak gaygwayi siyagi, “Ang'iing'i gindeawi masaweega ak geandeawi aniini gadiyoojiga.” Ahiimnaan masaweegaagu mandeawana gadiyoojiga, ak gaydaahiimneey masaweegeasu aba gadiyoojigeasu.

¹⁹ Ang'iing'i gumwasi gideaba Aseetta aagi; gidoabiiwi. Eara meangeenda ghamwas nea ghabwaadani.

²⁰ Ak gigasayi eahhiimneeyi ang'iing'eeda was siida marachchi gil, gideaba masaweega iimandeawana gadiyeeda ea maygwaji?

²¹ Ghweandeanya was Abrahaamu meattawa doobiiwnatta aba gadiyoojiga, aba damanda adaydaawa balleandaannyi was Isakka iina uhuuda heeda wagiida ehi?

²² Midaahi beadi masaweega ghayi sin adeayi sea gadiyoojigaaschi, ea gideaba masaweekka geemmajeek aba naweetta bea gadiyoojigean,

²³ iiduw gwasa ng'oruutka nea gwayi, “Abrahaamu ghayi ghamwas Aseetta, ak geattaw niny doobiiwnatta,” ak geguura siittuupchi Aseetta.

²⁴ Moadaahi beadi siida sughus eattaw doobiiwnatta aba gadiyoojiga nea meakghusa masaweega akghwahit.

²⁵ Gwasnu eara Rahaabootta hiseadean eara niny meattawa doobiiwnatta aba gadiyoojiga damanda deabwa rabasta ak goruutta jarooda aba nawa nuudi?

²⁶ Aba gideaba gawuurji saseeda iimanda gurorooda animi, gwasnu eara masaweega iimandeawana gadiyeeda animi.