Yakkobo 1 - NEAJEEDA EESH BEA BUUNEESSEAN

¹ Yakkobo, was soomjeanda Aseetta ea dea Ng'uttamiida was Yeesu Gristo, Heeda emoojiga attamaniyyeenya dardaawaat: Seayu.

Masaweega ea weaghumeeda

² Anung' ghoaw haleanjeessean hooseaneega, fuga eaduupcheewi, aba isisimsimeegwa aba gilakkil,

³ nea ghoanalli gideaba simooda masaweegeagwa gaygwanyakneegwa milikghteayda.

⁴ Nea alooheeda gagasa gweadu gadiyeeda majeek nea gowoschi, hidaat nea mwashoadeeweegwa gil.

⁵ Asi siida wassean mida jeedeang'wa isuunyeewa weaghumeeda, ea damwaash Aseetta, adawi buuneessean haleanjeeda aba innyeanda jeeda, nea maygwareekusa ak gajeattaw.

⁶ Ak gagasa gamus aba masaweega, nea mamwachmwaja gil, aba gideaba siida machmajiischi gawuurji laweachkweeda basooda aat jeammeeda nea geyyuuk.

^7-8 Nea siida machmajiischi, nea mabwagi nea moapta ng'eanyi aba jeeda naweadingaaschi sean, adaghwarar gideaba gayghwanyas gil aba heeda Ng'uttamiida.

Barbaranda ea baruureega

⁹ Anung'waada oorjeeda giyeanya mwanang' ghaghwar geaw aba jeeda hooseaneagaaschi,

¹⁰ nea meanang'oochcheanda ea sihiing'u, aba gideaba gawuurji deakghweeda seenga gayghang'atta.

¹¹ Aba gideaba aseetta iissa gorearu nea gweadu beasta, ak ghoaghajaam seenga; ak ghoabit deakghweadaannyi, ak goosha aloheeda. Gwasnu eara meanang'oochcheanda gayghaghajaamiit aba naweadingaaschi.

Simsimda ea galaweega

¹² Ng'wanaweagaaschi siida riyeeng'da iisimsim, aba gideaba iing'atta nea nijoar simsimda gayghwanyas shiipka eaweega mammuudeana ghayi bay gwahelleesa Aseetta fukka bwariiy ninyiin.

¹³ Asi adagwayi siida isisimsim, “Aniini gwasimsiman Aseetta;” aba gideaba Aseetta moammu gwasimsim gidamuy ak eara niny ea maygwasimsim siida;

¹⁴ hean giliwas sih iissa geesimsim damanda sigassa nea geaghurghur aba gitta gasean.

¹⁵ Hean gitta gasa siidean iigweayiit gweadu ring'eeda; ama iiduw nea nirir ring'eetta gweadu miyeeda.

¹⁶ Adereenganneegwa, fuga eaduupcheewi abwariinyi.

¹⁷ Gilinyoo eahhaakta miy ea gilinyoo eattayda hidaat gwaleabu heettiyeada, ak ghwararang'aana heeda Bwaabwa weeshinda nea headaannyi ea manda yammoodeaba geaw ghana jironeeda yamitteaba geaw.

¹⁸ Aba gidabwariiyda niny gwajiileasa aseasa aba ng'asheanda huumwa ak gewuurjeewi haghweega madeeda aba jeeda haleanjeedaannyi ghayi sin.

Iing'da ea sinooda

¹⁹ Hean nea ghoanalli ng'asheesu, fuga eaduupcheewi abwariinyi. Asi daba siisi wassean lamajeesa iing'da ng'asheanda, nea goojiileesa baloolda, ak ea miiassas nyaras,

²⁰ aba gideaba nyarasta siida maygwasin doobiiwnatta Aseetta.

²¹ Asi oshsheagiidana geat ririnnyeanda ea gassooda hawunda muy ak ghoang'ng'waanyi aba garbabanda ng'asheandida, ammu gwaleabu guroruunatkeagwean.

²² Nea gagasa ahuuwa fuga sina ng'asheanda, adoobeachcheewi iing'da akghwahit, nea goreenganayi geat.

²³ Nea siida ibeachchi iing'da ng'asheanda akghwahit, nea ghanyea masna, siisi abeeda gawuurji siida ng'ulla gheamamdaannyi aba jeeda giyoo;

²⁴ aba gideaba gang'ula geaw amang'atta gawa heechchea gawa ama deagheatta ea nuroossa giduurji.

²⁵ Nea siida ng'ula deaweedeeda hidaat, jea gweadu giibaldeaba geaw, ak ghwashng'u, adaghoaw siida iing'shi ramasoot gagasa ea siida sina gadiyeeda gil, siisi aba sinoadaannyi bea gadiyeeda.

²⁶ Siida iyeeshsha geaw gideaba gwandeawa diini, nea mwarada ng'ushaptaannyi, nea gwareengani guroroadaannyi, diineedeaba siisi marachchi gil.

²⁷ Diineeda miy manda ririnnyeanda aba madeeda Aseetta was Ghweandean nii gil: bareassiinda bananga gil ea masiinung'weega aba jeeda sawanaduutka nyaawa, nea gufri geaw aba ng'asheega munyas bea muunda ng'eanyiida.