Mattayo 9 - NEAJEEDA EESH BEA BUUNEESSEAN

Yeesu ghoahaap siida abittu damealga

¹ Gwading'da maleambooda ak ghoaghawa basooda ak ghwahitta mujiineeda nyaawa.

² Hean geeyeassa siida abittu damealga nea geeyeanna badayda bulaliida, hean daa Yeesu masaweega nyaawa, gwayeeshsha siitta abittu damealgean, “Nung' gahoosan guroroodaang'u Balleandeanyu; sisamsa riing'eegaagu.”

³ Hean gwayi ng'oorshoodiga mwaatkwa aba jeesinga nyaawa, “Siisi goong'eawi Aseetta.”

⁴ Gwajeeng'u Yeesu gidabaloolda saawa aba jeesinga nyaawa, ak gwayeeshsha, “Ghwasaan anda goobalooli ng'asheega munyas aba jeesingeagwa?

⁵ Awussus anneeda gideaba geeyi, ‘Sisamseey riing'eegaagu,’ ghana eeyi, ‘Ng'eada ak guwi?’

⁶ Geagasayi anala gideaba, Balleanda Siida gwandeawa gheambalmeeda aba badayda ng'eanyiida jea gwasamsiina ring'eega;” ak gwayeeshsha siitta abittu damealgean, “Ng'eada, sareana muundaang'u ak guwi ghoah.”

⁷ Ghang'eat siidida ak gawa gheannyi.

⁸ Daa emeeda siidida ghang'ut muuwda ak ghoaghaambiit Aseetta ghayi adaw buuneeda gheambalmeeda sunuun.

Yeesu gaguursa Mattayo

⁹ Damanda ng'attaawa Yeesu aba hoowa ghwadaa siisi suguura Mattayo nea gwanda jeeda ghoriida sing'ng'oonnya gwaadi; gwayeeshsha, “Eanni geeshteanyu.” Ghang'eat ak ghwaat geeshta.

¹⁰ Iiduw nea goopteada aba ghoah damanda agiischooda, deagheatta ghwahidu Fuga saang'a ang'ng'oonyi gwaadi, ea fuga riing'eega ama hidu goobiitpiit sea Yeesu ea ginealshoodigaaschi.

¹¹ Daa Farisayajeega, gwayeeshsha giinealangaaschi, “Anda giinealshoochcheandeang'wa goombuuchchi fuga ang'ng'oonyi gwaadi ea fuga riing'eega?”

¹² Iiy niny gwayeeshsha, “Fuga majeekcheewi magaseadayyi bwanamwaganga, geaghus fuga miyeani.

¹³ Asi aweayeena ak ghoanaali geat ng'asheesu, ‘Geagasayi baydeayda nea mii haleanjeeda sisappa geadi bea ghadoweeda.’ Aba gideaba mwaawuni daguursa fuga doobiiweadi, ghawunnyi daguursa gea mideawa riing'eega.”

Iitta raditta jalooda

¹⁴ Hean gaweay heeda Yeesu Giinealanga Yohaana ak gwayeeshsha, “Ghwasaan anda aseasa ea Farisaayajeega geeradayi jalooda, nea giinealangaagu ea maratta jalooda?”

¹⁵ Ghwasha Yeesu nea gwayeeshsha, “Fuga suguursa nyeangiida ghoammu gaguuttu heareega nea gwandeawa siida geeshi? Gwanda askwearjoojiga jea ghwahidu jea egeandeawa siida geeshshi jeennyaawa, aba damani gayghwarat jalooda.

¹⁶ Manda siida jea ghawaasa weasteesh hang'da waas. Aba gideaba weasteesh gayghabwaash hang'dida waasiin ak abeeda gayghoahaada seawadeeda.

¹⁷ Eara buuneeda mayiinna difaayeeda miighwaheas jeeda ghadeatka woosi; iisihindunu gaygwanyara ghadeatka, ak gaweay difaayeeda, ak gameewa ghadeatka; buuneeda gwayiina difaayeeda miighwaheas jeeda ghadeatka eashish ak gabaseayu sean.”

Huda siida haw ea Gatmooni waas weleeda Yeesu

¹⁸ Damandida rukuna ng'asheesuun, ghwahidu siisi haw bea emeeda Yahuudi ak gwatkuyi aba madeadaannyi ak gwayeeshsha, “Nimi hudeanyu ghamneawa. Beenni eweaya iina geattindaagu uhuudaannyi ak gaygwaduudu.”

¹⁹ Ghang'eat Yeesu ea giinealangaaschi ak ghwaat geeshta.

²⁰ Ng'atta ghwaan Gatmoonagi beardooschi miyeanda areami foojeanda gweannyeew damaniiyyeenya gweadu geeshta ak ghawaasa weeleeda hang'daannyi;

²¹ aba gideaba gwayi aba jeadaannyi, “Iyaawaaschi weeleeda hang'daannyi gaydahaap.”

²² Ghwasach ghaat Yeesu ak ghwadaa ak gwayeeshsha, “Hudeanyu hoosana nihapnyi masaweega imwaschaan.” Ghahaap gatmoodida aba damandida.

²³ Ng'atta gawa Yeesu jeedeaba gheetta bea sugoochcheandean. Hean ghwadaa emeeda saang'a mida gea ayyeawda nea gaguttu heareega,

²⁴ gwayeeshsha, “Ang'amwana hiji, aba gideaba huda miighami gabeachchi ruweanga.” Geebarra rear.

²⁵ Iiduw nea siing'ng'aamwa buuneeda hoowa, gawa Yeesu jeeda ghoriida ak ghoang'ng'waay geattinda huda ama ng'atta ghang'eat.

²⁶ Gageawiit iitteaba ng'asheanji aba jeedeaba ng'eanyiitta seaniin.

Yeesu ghoahaap fii iyyeenya ng'oawwi

²⁷ Ghabeawa Yeesu hoowa nea damandida beawaan, ghwaat geeshta fii iyyeenya ng'oawwi, nea goojuur nea gwayeeshsha, “Balleanda Dawdi eaniyean bwaydaneasa.”

²⁸ Weah Yeesu jeeda gheeda gamaseaw fugiga assiyyeenya ng'oawwin ak ghoanyash gideaba “Ghoamwaschi gideaba ghammuuschi dahabeagwa?” Ghwasha saawa nea gwayeeshsha, “Geamwaschi Ng'uttamiida.”

²⁹ Hean ghawaas gheanyanga nyaawa nea gwayeeshsha, “Aba gitteenna masaweegeagwa gagasa anyasa.”

³⁰ Ghwajaada gheanyanga nyaawa. Ama ng'atta gwareekusa Yeesu nea ghoang'waniit, nea gwayeeshsha “Adiiduw goorukwsi eara sih ng'asheanji.”

³¹ Ghang'eatng'eat Saawa gaweay ak ghoabwaash iitta Yeesu fugeaba ng'eanyiitta seaniin.

Yeesu ghoahaap siida manda ghuutta

³² Ak gwayeeshsha, “Aweayeena” Hean gwaritteaysa ak gaweay jeeda ukkurmajeega.

³³ Hean siirruutta meangeenda gabalool siidida. Ghaham ng'eanyi eemeeda nea gwayi, “Ng'asheanda sunu miyeadaaha aba jeeda ng'eanyiida Israeeli.”

³⁴ Nea Farisayajeega saawa gwayeena, “Gooruutta meangeenda aba uurda dea haweewa meangeenda.”

Yeesu ghabwayda buuneeda

³⁵ Gwaneayeewa Yeesu jeeda mujiinajeega sean ea gharang'weakka nea goonealshi aba jeesinga ghoorajeega nyaawa siinnealshachcheewa ikkaanyaawa nea gwarukkwiida Giijasta miy bea sugoochcheandumeeda, nea ghoahaap geeyoonung'weakka sean ea gili nyoo ea sawanadeeda.

³⁶ Hean daa emeetuw nea gabadageat ghabwayda aba jeedaannyi aba gideaba ghwadaa gwatemban gawuurji gisilga nyaah jeagischoochchean.

³⁷ Ghwalamda ak gwayeeshsha giinealangaaschi, “Booga asaang'a, ak eang'ay fuga gadiyeeda;

³⁸ asi amwoasha Ng'uttamiida bea booga goojeagu fuga gadiyeeda ghapka ghwalachchi boagaaschi.”