Mattayo 8 - NEAJEEDA EESH BEA BUUNEESSEAN

Yeesu ghoahaap siida

¹ Iiduw nea ghwararang'aana giijeeda, ghwaat geeshta emeetuw;

² hean ghwahidu siida bearji udamusuura ak gwatkuyi aba madeadaannyi ak gwayeeshsha, “Ng'uttamiida iigasayi gimmuusi amminnaan.”

³ Ghoahakta geadi ak ghawaasa nea gwayeeshsha, “Geagasayi; miinni.” Deagheatta ghahaabwa udamusuura.

⁴ “Adaaha, adiiduw giruksi sih gil; ng'eada una, ak gihimsi geaw ashoohoochcheanda, ak giidaydi haleanjeeda sisappa geadi bea ghadoweeda gawuurji gida ghayi rukuteayda Muusa, ak abeeda ghwanal buuneeda.”

Yeesu ghoahaap soomjeanda shirikkarajeanda haw bea Ruumi

⁵ Iimuchchu nea gawa Yeesu jeeda mujiineeda Gapernaumu, gawa headaannyi shirikkarajeanda haw bea Ruumi,

⁶ ak gamearmearani nea gwayeeshsha, “Ng'uttamiida soomjeandeanyu gwalil aba ghoah goobittu damealga nea gwasawana muuchchi.”

⁷ Gwayeeshsha niny, “Gaydoan dahaap.”

⁸ Gwayeeshsha shirikkarajeandida hawiin, “Ng'uttamiida aniini mammisean gideaba gaynyuunyi jeedeaba gheenyu; ang'iing'i rukuni ng'asheanda akghwahit, ak gayghahaap soomjeandeanyu.

⁹ Aba gideaba eara aniini geewoschi siida ghayi mida hing'eadayda gheambalmeeda, mida hing'eadaydeanyu shirikkara, ama eayeeshshi nii, ‘Una,’ gawa, ghana nii ‘Beenni,’ ghwaan, ak eara soomjeandeanyu iyeayeeshshi ‘Sina gili,’ gwasin.”

¹⁰ Iiy Yeesu ng'asheesu, ghahamng'eanyi ak gwayeeshsha fukwachchi aat geeshta, “Aba huumwa geayeeshshineegwa, miidadaah aba jeeda ng'eanyiida Israeeli siida mideawa masaweega uurji nih.

¹¹ Asi geayeeshshineegwa, gayghapka fuga saang'a jea gwaleabu heeda ghayeawa ea heeda biyeara ak gaygoobiitpiit ak gweagiischi sea Abrahaamu, ea Isakka, ea Yakkobo aba jeeda sugoochcheandumeeda humng'eeda,

¹² amaduw balloojiga sugoochcheandumeeda gajeehisa jeeda misaneeda jarooda; heeda jeagwanda shookka ea giwirrooda geeshatka.”

¹³ Ng'atta gwayeeshsha Yeesu shirikkarajeandida hawin, “Una; ak gagasa ghoaw gitta imwasiin.” Ghahaap soomjeandaannyi bea gadiyeeda aba damandida.

Yeesu ghoahaap fuga saang'a

¹⁴ Iiduw nea gawa Yeesu jeeda gheeh Betro, ghwadaa gheamatta agweaji Betro nea gwalil aba badayda bulaliida nea gabearji sheagheeda;

¹⁵ ghawaasa Yeesu geattindaannyi, ak goosha sheagheeda, ak ghang'eat gagadiyeesa.

¹⁶ Iiduw nea niiw shing'ada geeyeassa fuga saang'a bearji meangeenda; gooruutta meangeenda aba ng'asheanda, ak ghoahaap buuneessean miyeani.

¹⁷ Nii abeeda gayghoahiit ng'asheanda ghayi rugu sibaneeda suguura Isaaya nea gwayi, “Ghwasar niny munyasnachcheakkaasa ak gageanda miyeannyeakkaasa.”

Fuga gasa ghwaat geeshta Yeesu

¹⁸ Hean ghwadaa Yeesu emeetuw nea gwaneaweesa, ghwanung' ghoaghaaw ginealanga.

¹⁹ Gaweesa Ng'orshoochcheanjagi ak gwayeeshsha, “Ginealshoochcheanda, gaydeadu geashtaang'u heechea una sean.”

²⁰ Gwayeeshsha Yeesu, “Fureayoonga gwandeawa shoomeanga, dariidakka gwandeawa ghoorajeega; nea Balleanda Siida ea mandeawana heechea ghwayiin uhuudannyi.”

²¹ Gwayeeshsha nuut aba jeeda giinealangaaschi, “Ng'uttamiida, goonean beatta ghannyi dawa dabuy Bwaabwa.”

²² Ak gwayeeshsha Yeesu, “Eanni geeshteanyu, nung'waada fuga nimeewa gabuy muscheekka nyaawa.”

Yeesu ghwanung' ghahawda siilakghta basooda

²³ Hean nea gwading'da maleambooda gamaseaw giinealangaaschi.

²⁴ Deagheatta, ghwahidu siilakghta ng'waan bea basooda, ak gooyuuk maleambooda laweajajeega; nea abeeda gwalil.

²⁵ Gaweay heeda giinealangaaschi ak ghwaheat nea geeyeeshsha, “Ng'uttamiida laalneasa sishsheali.”

²⁶ Gwayeeshsha Yeesu, “Anda nung'udeagwa muuwda, Ea fuga mwanang' masawi.” Ghang'eat ak gwareekusa jeammeeda ea basooda ak ghahawuda basooda ea gwayi saw.

²⁷ Ghahamng'eanyi buuneeda nea gwayi, “Siisi siidurjiini, awal gheang'da basooda ea jeammeedean?”

Yeesu ghoahaap fii iyyeenya bearji meangeenda

²⁸ Iiduw nea nuwa gigheawda mida ng'eanyiida Gadarene gwaroonnyi fii iyyeenya bearji meangeenda, nea gwaleabu heeda subunnyiisa buuneeda. Fiisu abeeda ea ng'weani ea eeyi bwak ea ghoawal buuneeda sigoodeaba naweetta.

²⁹ Ng'ulla Goojuur nea gwayeena, “Geendeayeesi naaha sea ang'iing'i, Ea Balleanda Aseetta? Guwuni sawaneasa nea miighwahidu damandeanya?”

³⁰ Abeeda gwanda hawannyeanda ukkurmajeega nea sheagi nea ghoajeada.

³¹ Gamus meangiga bea endean nea gwayeeshsha, “Iiruuttaneasa ginung'waadi eeweaya eappitta jeedeaba hawandida bea ukkurmajeegean.”

³² Gwayeeshsha, “Aweayeena;” Gwaritteawa fukka. Gaweay ak ghoabitta jeeda ukkurmajeega; ak ghoabuuttaawa geat rakghraghooneeda ak gwajaksa geat basooda ak goosha sean.

³³ Ghwahal geat haghweadoodiga ak gaweay mujiini ak ghoadaarda iitteaba ng'asheesu seaniin sea iitteaba fukka bearji meangeendean.

³⁴ Hean gaweay Buneassean bea mujiineetteani roonyeeda Yeesu, geeyi bwak amadaah geemus gideaba ng'amwana ng'eanyiideanya.