Mattayo 7 - NEAJEEDA EESH BEA BUUNEESSEAN

Girgweaksiinda buuneeda

¹ “Adoorgweakkiisi buuneeda gajiiduw eara agooga geergweakseegwa.

² Aba gideaba gidoorgweakkisiindi buuneeda, abeeda gajeergweaksiinduneegwa agooga, ak gidoottenniidi agooga eara agooga gajeetteeneegwa.

³ Anda ak ging'weersi hararooyeanda mida gheang'da oorjeeda geamadu, nea ming'weersiini geetta mida gheang'daang'u ang'iing'i?

⁴ Ghana gajammusa eshshiindaan oorjeeda geamadu, ‘Nung'u dageanu hararooyeanda mida ghang'daang'u,’ nea ghana gwanda jeeda gheang'daang'u ang'iing'i geetta?

⁵ Ea siida ammiittu geaw, nyoo ghannyi asheeda geanda geetta mida jeeda gheang'daang'u, ak abeeda gajammuusa geanni hararooyeanda mida gheang'da oorjeeda geamadu.

⁶ Adoattawji gudajeega haleanjeeda ghaydidi, ghana ahisana ukkurumajeega booshkeagwa ak ghwadattas, gajiiduw gwayamseegwa geat ak ghwageagwa.”

Muusa, gassa, guurdeawana dooshta

⁷ “Amusa, ak gajeegooneegwa, agassa ak gajanyasa, aguurdeawana dooshta ak gajeejeasseegwa.

⁸ Aba gideaba siida nyoo gamusiischi gajeattaw, ama siida gasiischi gayghwanyas, nea siida guurdeawa dooshta gajeejeassa.

⁹ Heappi gajea ng'eaha aba jeedeang'wa, jea gamus balleandaannyi mukkatte, ak ghwoadaw lagheaneeda?

¹⁰ Ghana iimus ghweayeanda, jea ghwoadaw ichchibooda?

¹¹ Abeeda iyoanalli agoogeeda munyas gideaba gajoattawa diibigeagwa haleanjeeda miyaas, ea mayghwaraanya muuchchi Ghweandeang'wa mida humng'eeda ak ghoadaw gea miyaas fukka ikkaaschi musiini!

¹² Haleanjeeda sean ogasayi gideaba gaygwasinneegwa buuneeda, eara agooga asissiina saawa, aba gideaba nii ng'asheanda was deaweeda ea sibanga.”

Gidaghuutta mwariis

¹³ “Aweayeena ghoah nea goosku gidaghuutta mwariis; aba gideaba gidaghuut aabwara nea naweeda aabwara dea jea gahutteawweegwa ak asaang'a fuga jea gwasik gidaghudeani.

¹⁴ Gidaghuut amwariis nea naweeda amwariis dea jea gagal ghuhooda, ak gajea ng'ay fuga jea ghwadaah.”

Geetta ea haghweagaaschi

¹⁵ “Ashageada sibanga ng'uyyeega fuga iissa ghapka heedeang'wa nea niikwa eagweega gisilga, nea aba jih ea suyeekka ng'weani.

¹⁶ Gajanala aba haghweega nyaawa. Buuneeda ghoammu gabinna haghweega sabiibu geetta halaghweenga ghana haghweega shaboogheechcheanda heeda ng'eamga?”

¹⁷ “Gwasunu eara geetta miy gwajiila haghweega miyaas, nea geetta muy gwajiila haghweega munyas.

¹⁸ Geetta miy mwoammu gwaji haghweega munyas, nea geetta muy amwoammu gwaji haghweega miyaas.

¹⁹ Gili nyoo ea geetta iimaji haghweega miyaas gajealach ak geejaksa jeeda beasta.

²⁰ Asi gajanalana haghweega nyaawa.”

Aniini moang'wa danaleagwa

²¹ “Mii giliwas sih ennisean, ‘Ng'uttamiida, Ng'uttamiida,’ jea gawa jeeda sugoochcheandumeeda humng'eeda, geaghus siida sin gidagasa Bwaabwa mida humng'eeda.

²² Eaweettida gaygwayeeshshinean fuga saang'a; ‘Ng'uttamiida, Ng'uttamiida, miyearamoorana aba ghawungaagu, nea aba ghawungaagu geerruutti meangeenda, ak geesinnyi haleanjeeda saang'a deamdeameadi aba ghawungaagu?’

²³ Abeeda gaydayeeshsha saawa, ‘Aniini moang'wa danaleagwa eara hay, ang'amwana heedeanyu, agoogeeda sina ng'asheega munyas.’

Fii iyyeenya deekshi

²⁴ “Asi siida wassean nyoo ghwayiiy ng'asheegeasu ak gwasin, gajeegala weaghoochcheanda fughareeda, deeksa gheannyi uhuuda harearacheanda;

²⁵ Ghwaroabwan roopta, ak ghwahidu guldeayda, ghwahidu jeammeda ak ghwalas gheedida, ak ea mwoabeada, aba gideaba sindeettannyi geedeeksa uhuuda harearachcheanda.

²⁶ Ama siida was sean iiy ng'asheesu ikkeasuun ak ea masna, gajeegala siida dasha, ghayi deeksa gheannyi uhuuda iseaskweanda;

²⁷ ghwaroabwan, ak ghwahidu guldeayda, ghwahidu jeammeeda ak ghwalas gheedida, ak ghoabeada; ak gibeedeaydaannyi aahaw.”

Gheambalmeeda Yeesu

²⁸ Iiduw nea nihiit Yeesu ng'asheesu, ghahamng'eanyi emeeda aba ginealshoadannyi,

²⁹ aba gideaba goonealsheatta siida mideawa gheambalmeeda, nea mawuurji eara ng'oorshoodiga nyaawa.