Mattayo 6 - NEAJEEDA EESH BEA BUUNEESSEAN

Ginealshooda weetta fuga barbari

¹ “Ashageada adiidu goosinnyi alooheedeang'wa aba madeeda buuneeda nea goobaysiini ghwadaheagwa saawa, aba gideaba iyosinindunu ea mwajanyasa giimearda aba heeda Ghweandeang'wa mida humng'eeda.

² Asi ang'iing'i iidaydi haleanjeeda iiweadi fuga barbari adidiing'u geaw ak gisindi gidasinniida fuga ammiitu geat aba jeesinga ghorajeega siinnealshachcheewa ea ghuusiga naweadinga, gagwarsa buuneeda. Aba huumwa, geeyeeshshineegwa suuh ninyas gimearda nyaawa.

³ Asi ang'iing'i iidaydi haleanjeeda iiweadi fuga barbari eara geattindaang'u ghaadaam adaghwanal gisiin geattindaang'u bea dugwa.

⁴ Haleanjeedaang'u iiweadi fuga barbari adaydaawana makcheameeda, ak Ghweandaang'u deaha makcheamuutka gay gooheanneey.”

Ginealshooda mooshtta Aseetta

⁵ “Asi iyoamwaashchi Aseetta, ea adoowurjeewi fugiga ammiittu geadiin; saawa ghabwariiy ghamwaash Aseetta nea ghaminaada aba jeesinga ghorajeega siinnealshachcheewa ea ghuusiga naweadinga, ghwadaa buuneeda. Aba huumwa, geayeeshshineegwa, nigeawiit ghwanyas gimearda nyaawa.

⁶ Nea ang'iing'i iimwaashi Aseetta, guwi jeeda ghooriidaang'u hoowa bea gahiin ak giradi gidaghuut ak gimwaashi Aseetta aba heeda Ghweandaang'u mida makcheameeda; ama abeeda Ghweandaang'u deaha makcheamuutka gaygooheanneey.

⁷ Agooga iyoamwaashchi Aseetta ea adoochuurayi awuurjeewana fuga emoojiga; saawa ghaghay gili jea gooleeysiit aba ng'asheega nyaawa saang'a.

⁸ Asi adoowuurjeewi saawa, aba gideaba Ghweandeang'wa ghwanal gidoogasayi nea miyoomsa.

⁹ Asi amwaashtunu Aseetta: Ghweandeanya mida humng'eeda, Ghaawungaagu eakghambiida.

¹⁰ Sugoochcheandumeadaang'u nung' ghwahidu, Gidigasayi gagasa eesin, aba hiji bea ng'eanyidean gawuurji gissisinniida aba hoowa bea humng'edean.

¹¹ Goaneasa Askweareeni daghwardeanya;

¹² Samseasa siileenigaasa, gawuurji gidasisammisiindi fuga mideawa siileenigaasa.

¹³ Adigealleasa jeeda simsimda, ak gighuhaneasa gitta muyiin.

¹⁴ Aba gideaba iyoosammiisi gidinyeannyeekka buuneeda, eara Ghweandeang'wa mida humng'eeda gaygwasamseegwa agooga;

¹⁵ ama moosammisiini gidinyeannyeekka bunneeda, eara Ghweandeang'wa maygwasamseegwa gidinyeannyeekkeagwa.”

Ginealshooda iitta giluuldeaydeaba geaw

¹⁶ “Gichcha iyoolluuldi geat, ea adoowuurjeewi fuga ammittu geat, saawa iissa gookkaroomnyi gheamamuunatka nyaawa ghoahiimu geat ghwadaa buuneeda gideaba niluudi geaw. Aba gideaba geayeeshshineegwa suuh ninyas giimearda nyaawa.

¹⁷ Asi iluuldi geaw, giyeashi uhuudaang'u ak gihuuni gheamamdaang'u,

¹⁸ amwanala buuneeda gideaba giluuldi geaw ak ghwanal Ghweandaang'u mida makcheameeda. Abeeda Ghweandaang'u ammu ghwadaa makcheameeda gayghoamwaarnyi.”

Meanang'oochcheandumeeda humng'eeda

¹⁹ “Adootiiwsi gheaseedeang'wa badayda ng'eannyida ammu ghwaak muguyga ea girgweatka nea ghapka mareanghooga ak gwanyarja ak gwajagwadiin,

²⁰ asi ootiiwa gheaseedeang'wa aba humng'eeda heeda mwoammu ghwaak muguyga ea girgweatka, ghana gwanyarja mareanghooga ak gwajagwat.

²¹ Aba gideaba heeda mida gheaseadaang'u heeda jea gwanda guroroadaang'u.”

Gheabong'nyeanda saseeda

²² “Gheabong'nyeanda saseeda gheang'da gil. Ama majeek gheang'daang'u, abeeda eara saseadaang'u sean gajea eesh;

²³ ama miimajeek gheang'daang'u, abeeda eara saseadaang'u sean gaygwanda jeeda misaneeda. Abeeda weeshindida mida jeadang'uun imisana, ada misaneani gajea mii misaneeda!”

Aseetta ea baruureega

²⁴ “Manda siida ammu gagadiyeesa fiisu hees iyyeenya. Aba gideaba gayghwasit agi nea ghabwariiy niirja, ghana ghoang'ngwaay geat sea nii ak gafool niirja. Majoammuusa agadiyesiina Aseetta ea baruureega.”

²⁵ “Aba sareani geayeeshshineegwa, adoodeawiissi eaweegeagwa, aba gichchea ayaaga ghana gichchea aleaha, ghana gichchea ookwealsiina sasanuukeagwa. Heappi eaweega mwang'ala hamitta, nea saseeda amwang'ala hangweakka?

²⁶ Ang'ulla dariidakka mida humng'eeda: mahissiida nea malachcha booga gabiissa ea meaweamsiina gijigoonga, eara saawa ghoarear Ghweandeang'wa mida humng'eeda. Heappi agooga! Moang'ali saawa?

²⁷ Ng'eaha gil aba jeedeang'wa ammu goodeawiit geaw ak ghoahaat geawundaannyi eara ea geattinagi gil?

²⁸ Ama hang'weakka ghoanung' goodeawideegwa nea naha? Oopkaada deakghweeda mida dareabeetta, gida heettiiideayda; ea masinna gadiyeeda nea mamanmanna;

²⁹ ak geayeeshshineegwa, eara Sulemaani aba jeeda miyeenoadaannyi sean miyeekwa muuchchi ea gawuurji deakghweanagi aba jeedeaba suh.

³⁰ Asi iinung' Aseetta gookwealsheattunu nyeega mida dareabeetta, mida askwareani ammuchchu ea niyaak beasta, heappi maygookwealshooweegwa muuchchi agooga ea fuga mwanang' masawi?.

³¹ Asi adoodeawiichchi nea gooyeennyi, ‘Gajeayaaga naaha?’ ghana ‘Gajealeaha naaha?’ ghana ‘Gajeekkweala naha?’

³² Aba gideaba haleanjeeni gagaseadayi fuga emoojiga; aba gideaba Ghweandeang'wa bea humng'eeda ghwanal gideaba googasayi suuseaniin.

³³ Anyoo ghannyi oshsheeda agassa sugoochcheandumeadaannyi ea doobiiwnattaannyi, ak abeeda gajeehheaneegwa haleanjeeni seaniin gajea geagwa.

³⁴ Asi adoodeawiissi ng'asheegeaba numuji, aba gideaba numuji gaygwadeawiissa geaw. Giliwas eaweechcha ghoahiit deawiitmeadaannyi.”