Mattayo 5 - NEAJEEDA EESH BEA BUUNEESSEAN

Girgweageeda uhuuda giijeeda

¹ Idaah emeetuw, gwading'da giijeeda, hean nea gopteada gaweay headaannyi giinealangaschi.

² Ghoang'eat ghuutta giinealshoodaannyi nea gwayi:

Hoseaneega huumwa

³ “Ghang'wana fuga barbari guroruunat, aba gideaba sugoochcheandumeeda humng'eeda daanyaawa.

⁴ Ghang'wana fuga guttu heareega, aba gideaba gayghwanyas hawdeayda.

⁵ Ghang'wana fuga ng'eeni, aba gideaba gaygoombal ng'eanyiida.

⁶ Ghang'wana fuga bearji jalooda ea muwooshta gassooda doobiiwnatta, aba gideaba gajeellang'u.

⁷ Ghang'wana fuga mideawa baydeayda, aba gideaba eara saawa gajeabwayda.

⁸ Ghang'wana fuga mideawa guroruunatka miyaas, aba gideaba gayghwahitta Aseetta.

⁹ Ghang'wana fuga aduptooschi suurja, aba gideaba fiisu gajeeguura diibiga Aseetta

¹⁰ Ghang'wana fuga sisawana aba doobiiwnatta, aba gideaba sugoochcheandumeeda humng'eeda daanyaawa.

¹¹ “Ghoang'wani agooga iyang'eawweegwa buuneeda nea geesawaneegwa nea geerukuna badahuukkeagwa ng'asheega munyas sean aba ng'uyyeega appadaydeanyu.

¹² Ahoosana nea goong'weelayi, aba gideaba gimeardeeng'wa ahaw aba humng'eeda, nii gidaghayi bay gwasawanda buuneeda sibanga ashooynaneegwa.”

Balang'da ea gheabong'nyeanda

¹³ “Agooga goowoschi balang'da ng'eanyiida; ama balang'da iimudugwasamu gil, gajeahindaan iijeagwasamu gil? Mudugwarachchi gil geaghus eahiisa jarooda ak ghoallaplaap buuneeda.

¹⁴ Agooga goowoschi weeshinda ng'eanyiida. Mujiineeda sideeksa uhuuda heayeeda mwoammu afunyaat.

¹⁵ Eara buuneeda meayeetta gheabong'nyeanda ak geedukuteawa dahuuda iissa ghwayiin uhuuda ghamarda ak ghoabwaay buuneessean mida jeeda gheeda.

¹⁶ Asi eara weeshindeang'wa gagasa ghoabwaay buuneessean, amaduw nea ghwadaa gadiyoojigeagwa miyaas ghoaghambiit Ghweandeang'wa mida humng'eeda.”

Ginealshooda iitta deaweeda

¹⁷ “Adoaghannyi gili awunnyi dayam deaweeda ghana sibanga; mwawuni dayam ghawunyi danung' gwasa.

¹⁸ Aba huumwa geayeeshshineegwa; eara ghang'atta humng'eeda ea ng'eanyiida, ghanyeamanda eara hiji mwanang', ghana roobadeanagi mwanang', muuchchi bea deaweeda majeegeanda ea gwasa ng'asheega sean.

¹⁹ Asi siida wasean jea ghwalach diigheanjagi mwanang'eawa sean, aba jeedeaba diigheannyeeksu ak ghoannaaldunu buuneeda, gajeeguura dea mwanang' muuchchi aba jeeda sugoochcheandumeeda humng'eeda; amaduw siitta jea gwasin nea ghoanaal suurjeeniin, nii gajeeguura dea haw aba jeeda sugoochcheandumeeda humng'eeda.

²⁰ Aba gideaba geayeeshshiineegwa, doobiiwnatteang'wa iimaburdeawana dea ng'oorshoodiga ea dea Farisayajeega, majaghannyi aweayeena jeeda sugoochcheandumeeda humng'eeda.”

Ginealshooda iitta nyarasta

²¹ “Ghayi noayiinyi nea geerukusa fugeaba garayi gideaba, ‘Adinuusi siida; siida nuus siida gammiisa girgweaksiinda.’

²² Ak aniini geayeeshshineegwa, siida wassean jea gwanyareeksa oorjeeda ghaamwat gamiisa giirgweaksiinda; ama dea ang'eawi oorjeeda ghaamwaat gamiisa eatta madeeda gweargwa, ama dea eeshsha oorjeeda ghaamwat, ‘Guwosi leekghteanda!’ Gammiisa beasta maloonghajeega.

²³ Asi iyeadu haleanjeeda isabi geadi bea ghadoweeda badayda heeda wagiida ama deagheatta giipkaadi gideaba gwanda gidinndeayeesi oorjeeda geamadu,

²⁴ nung'usiina haleanjeedaang'u isabi geadi bea ghadoweeda badayda altaari ak guwi ghannyi aduupcheena sea oorjeeda geamadu, ama ng'atta gibiigu ak giidaydi haleanjeedaang'u isabi geadi bea ghadoweeda.

²⁵ Bay adupcheewana geaw siida ahaaktaneey, damanda duuandeawana naweeda nea goondaageat heeda ogaleewi gheeda girgweageeda, ammasa gayghwaannyi siida ahaaktaneey heeda siida laja girgweaguutka, ak ghwayiinnyi ada geattinga furiischoochcheanda ak gwajakseey ghealooniga;

²⁶ Aba huumwa geayeeshshineey, mayrinnana jeeni ea eaghus aniidayda heelajeanda huydean.”

Ginealshooda iitta mealuleega

²⁷ “Ghayi noayiinyi nea geeyi, ‘Adiiduw goomealuulli!’

²⁸ Ak ghamneawa geayeeshshineegwa siida jea gang'ulla gatmooda seechmeeda nigeawiit gamealuul aba jeadaannyi.

²⁹ Asi iissa iinung' ghaang'daang'u bea geattinda dugwa adiinya, giloatti ak gijakti gwasheagiit; aba gideaba aamiy ghwashoadeeweey dameallanjagi ak ea meejaksiina saseadaang'u sean jeeda maloonghajeega.

³⁰ Ama nung' geattindaang'u bea dugwa adiinya, gilaji ak gijakti asheagiidana geaw; aba gideaba ghang'wana ghwashoadeweey dameallanjagi ak ea mejaksiina saseadang'u sean jeeda maloonghajeega.”

Ginealshooda iitta nung'wiischooda

³¹ “Ghayi surgu gichcha gideaba, ‘Siida iinung'usa heeda gatmoadaannyi ea dadawa barawajeanda nung'ooda.’

³² Ak aniini geayeeshshineegwa siida wassean nung' gatmoadaannyi, nea mwanung'wa aba gideaba gamealuuli, gayghwanung' gamealuul; ak siida jea ghaghi gatmooda sinung' earada gamealuuli.”

Ginealshooda iitta agitta habeawooda

³³ “Gichcha ea noayiinyi nea geeyeeshsha fugeaba garayi, ‘Adiiduw giyaagi habeawooda ng'uyyeega, ak giihiidi habeawajeegaagu aba heeda Ng'uttamiida.’

³⁴ Ak aniini geayeeshshineegwa, adiiduw ghoayaaji habeawooda eara gili mwanang', earaba humng'eeda aba gideaba horgeeda sugoochcheandumeeda Aseetta gil,

³⁵ ghana earaba ng'eanyiida, aba gideaba horgeeda iina geashangaaschi, ghana earaba Yerusaleemu, aba gideaba mujiineeda sugoochcheanda hawi.

³⁶ Adiiduw giyeaksi habeawooda eara uhuudaang'u, aba gideaba mimmusi yamwa budeanjagi nung' gaweeshiit ghana gwattuudu.

³⁷ Nea ng'asheegeagwa ghoanung' ghoaw ‘Eah’ ghana ‘Manda.’ Gili wassean nyoah ghwanaawda gwaleabu heedeaba diitta muyiin.”

Ginealshooda iitta waldeayda mureandooda

³⁸ “Ghayi noayiinyi nea geergu gideaba, ‘Gheang'da ea gheang'da, ea geeshadeeda ea geeshadeeda.’

³⁹ Ak aniini geayeeshshineegwa, adigali geaw siida muy. Siida iilas madang'daang'u bea geattinda dugwa, giidawi eara meatkweeda niirja.

⁴⁰ Nea siida jea ghoahaaktaneey ak gageanda shatteadang'u, ginung'usi eara hang'daang'u;

⁴¹ siida idiing'seey beatta neekki adeayeewana niba iyyeenya.

⁴² Adawa dea musnyi, dea gasa ghoalaajaneey gida ea adifuursi muwuutta.”

Barinyeega weajoodiga

⁴³ “Ghayi noayiinyi nea geeyi, ‘Bwariinya gischeewoochchaandaang'u ak gisti weajoochchaandaang'u.’

⁴⁴ Ak geayeeshshineegwa, abwariinya weajoodigeagwa amoasha ghawooda appadahuukka fuga sawaneegwa.

⁴⁵ Abeeda gajahuuwa balloojiga Ghweandeang'wa mida humng'eeda; aba gideaba niny iissa daknoadaannyi gooboong'sa fuga munyas ea gea miyaas, ak gooroobassa roopta fuga doobiiweadi ea gea mii doobiiweadi.

⁴⁶ Aba gideaba iyoabwariinyi gea bwariinyeagwa agooga, gajanyasa anagiimwaar? Neada eara fuga ang'ng'oonyi gwaadi saawa ea masinniidunu?

⁴⁷ Ghana iyokkeattoscheewi oorjooga giyeang'wa akghwahit goosinnyi naaha meaji ghwanaawda? Neada eara fuga Emoojiga ea masinniidunu?

⁴⁸ Awosa hidaat awuurjeewana gidahidaatta Ghweandeang'wa mida humng'eeda.”