Mattayo 4 - NEAJEEDA EESH BEA BUUNEESSEAN

Gidasisimsimda Yeesu

¹ Ng'atta ghwaat Yeesu Gurooorooda ea ghoahiitta dareapcheeda ak gwasimsim meang'nyeandeenda.

² Goluulda geaw eawooji haradam, eawa ea askweari, amaduw huydeanda ghwayeachchih.

³ Ghwahidu headaannyi gichchea gwasimsim ak gwayeeshsha, Iiwosa Balleanda Aseetta giyami lagheangsu ghoaw mukkatte.

⁴ Ghwasha nea gwayeeshsha, “Geang'war gideaba, ‘Siida mwoammu goobiideewa ng'eanyiida mukkatte akghwahit, geaghus ng'asheanda rinna ghuutta Aseetta.’”

⁵ Ng'atta ghwaat Meang'nyeandeenda mujiineeda Ghaydit ak goodiing'da uhuuda gheeda Sibatta Aseetta heeda geaw

⁶ ak gwayeeshsha, “Iiwosi Balleanda Aseetta, gijaksi geaw ng'eanyi; aba gideaba geang'waar, ‘Gaygoojeagu malaykajeagaaschi aba badaydaang'u; ak gayghwadeabwaneey geattinga nyaawa amwalasa geashtaang'u lagheaneeda.’”

⁷ Gwayeeshsha Yeesu, “Geang'waar gichcha gideaba, ‘Adisimsimi Ng'uttamiida was Aseettang'u.’”

⁸ Ng'atta ghwaat gichcha Meang'nyeandeenda ak goodiing'da uhuuda giijeeda geaw muuchchi, ak goohiimsa daroorakka sean bea muunda ng'eanyiida ea miyeanoadaannyi,

⁹ gwayeeshsha, “Haleanjeeni seaniin gaydagoonnyi iibeadi ak gighadoawannyaan.”

¹⁰ Hean gwayeeshsha Yeesu, “Ng'amwana hiji Shattaani! aba gideaba geang'war, ‘Ghadoawana Ng'uttamiida was Aseattaang'u ak gibwadi niny nea gaba geaw.’”

¹¹ Hean ghwanung'wa heeda Meang'nyeandeenda ak ghapka malaykajeega ak gagadiyeesa.

Yeesu ghoang'eat gadiyeedaannyi aba Galilaaya

¹² Hean nea ghwayiiy gideaba Yohaana gwanda ghealooniga, gawa Galilaaya;

¹³ ghabeawa Nasareetti ak gawa goobiida Gapernaumu mida ghuutta basooda, mida ng'eanyiida Sablon ea Naftaali,

¹⁴ ak abeeda gwasa ng'asheanda ghayi rugu sibaneeda suguura Isaaya nea gwayi;

¹⁵ “Ng'eanyiida Sablon ea ng'eanyiida Naftaali, Naweeda gal basooda, gigheawda Jordaani, Galilaayeeda Eemoojiga.

¹⁶ Fukka ghayi abiitta jeeda misaneedean nidaah weeshinda haw, Nea gea ghayi abiitta ng'eanyiida ea jirooneeda miyeeda, ea niibwaay weeshinda.”

¹⁷ Ghang'eada damandida ghoang'eat Yeesu rukkwiideayeayda ng'asheega Aseetta nea gwayi, “Adukkuunana aba gideaba sugoochcheandumeeda humng'eeda nineekkiit.”

Yeesu gaguursa fii ang'wan leallu ghweayeega

¹⁸ Damanda neayeewa aba ghuutta basooda Galilaaya, ghwadaa oorju iyyeenya bea ghaamwadagi, nea Simoneeda suguura Betro gil ea oorjeeda ghaamwat suguura Andereya, nea ghoabuutta gheareedanga nyaawa jeeda basooda; aba gideaba fuga leallu ghweayeega.

¹⁹ Gwayeeshsha, “Ayeanni geeshteanyu ak gaydanung' ahuuwa fuga jea gwaleallu buuneeda.”

²⁰ Deagheatta gwanung'sa heeda gheareedanga nyaawa ak ghwaat geeshta.

²¹ Gawa mwadi ak ghwadaa oorju iyyeenya bea ghaamwadagi, suuk Yokkobo balleanda Sebedaayo ea Yohaana oorjeeda ghaamwat, nea gwanda jeeda maleambooda sea Sebedayooyda was ghweanda nyaawa nea gwasin gheareedanga nyaawa, ak gaguursa.

²² Deagheatta gwanung'usa heeda maleambooda ea ghweanda nyaawa ak ghwaat geeshta.

Yeesu goonealshi nea gwarukkwiida ng'asheanda Aseetta nea ghoahaap fuga miyeani

²³ Gwaneayeewa jeeda ng'eanyiida sean bea Galilaaya, nea goonealshi aba jeeda ghoorajeega nyaawa siinnealshachcheewa, nea gwarukkwiida giijasta miy bea sugoochcheandumeeda, nea ghoahaap geeyoonung'weakka sean ea sawanaduutka mideawa buuneeda.

²⁴ Gageawiit iittannyi aba ng'eanyiisean bea Sirya, geeyeassa fuga sean miyeani, bearji heeluutka geeyoonung'weakka ea gea mideawa sawanaduutka, ea gea bearji meangeenda, ea gea ahiili, ea gea abittu damealga, ak ghoahaap.

²⁵ Ghwaat geashtannyi emeetuw leabu ng'eanyiida Galilaaya ea Dekapoli ea Yerusaleemu ea Yudeeya ea gigheawda Jordaani.