Mattayo 3 - NEAJEEDA EESH BEA BUUNEESSEAN

Girrukkwiida Yohaaneeda Abattiisachchi

¹ Askwearjoojikka ghwahidu Yohaaneeda Abattiisachchi, ak gwarukkwiida ng'asheega Aseetta aba dareapcheeda Yudeeya, nea gwayeenniisa;

² “Aduukkuunana, aba gideaba sugoochcheandumeeda humng'eeda nineekkiit.”

³ Aba gideaba nii dea ghayi rugu sibaneeda suguura Isaaya gil nea gwayi, “Ghuutta siida nyearra dareapcheeda Asna naweeda Ng'uttamiida Olleappa naweadinngaaschi.”

⁴ Nea abeeda Yohaana gookkweali eaghwada sisna buudeega ngamiya nea gwarattiisa manandaannyi ghealooda; hamittaannyi ea deashamga gil ea maleeda ghamiilalga.

⁵ Ak gaweesa Yerusaleemu, ea ng'eanyiida Yuudeeyeeda sean, ea daroorakka sean bea murdajeega Yordan,

⁶ ak geeppattiisan aba jeedeenda Yordan nea ghamwas gideaba nisin ring'eega.

⁷ Hean nea ghwadaa Farisayajeega saang'a ea Sadukayajeega nea ghapka headaannyi goobattiisan, gwayeeshsha, “Ee dayeega udang'usheega! Gwareekuseeng'wa ng'eaha ea amng'awana nyarasta jea ghwahidu?

⁸ Asi ajiila haghweega miisa duukkuunooda,

⁹ nea adootteemsheesi geat aba jeesingeagwa gideaba, ‘Geandeawi ghweanda nea Abrahaamu,’ aba gideaba geayeeshshiineegwa, Aseetta ghoammu gagatkat lagheang'su ghoaw diibiga Abrahaamu.

¹⁰ Nea joommooda asiyiin guumsheakka geediga, ak geetta maji haghwega miyaas gajealach ak geejaksa jeeda beasta.

¹¹ Geabattisananeegwa beega aba dukkuunooda, nea dea jea ghwaduupnaan geash gaburdeawean uurda, nea mammisean eara sareenda geakkaaschi; niny gaygoobattiisananeegwa Gurorooda Ghaydit ea beasta.

¹² Niny gidaannyi alleeliida gwanda geattindaannyi, ak gaygoobuus muuchchi bugharjeandaannyi, ak gooweamsa nganoadaannyi gijigooda, nea looyda gayghaghwarda aba beesta maygamis.”

Giibattiisanda Yeesu

¹³ Damandida ghwaan Yeesu nea gwaleabu Galilaaya ea ghwahitta Jordaani heeda Yohaana, eebaattiisan.

¹⁴ Hean gagasa Yohaana ghaheawa nea gwayeeshsha, “Geagasayi aniini gideaba gajabaattiisan ak giwuni ang'iing'i heedeanyu?”

¹⁵ Ghwasha Yeesu nea gwayeeshsha, “Mwasa ghamneawa; aba gideaba nii gidamiisindaneasa gil sinooda ng'asheega sean doabiiw.” Ak ghamwas Yohaana.

¹⁶ Ng'atta giibaattiisanda Yeesu, nea gwascheeng'na jeeda beega; hean ng'ulla ghwajaada humng'eeda ak ghwadaa Gurorooda Aseetta nea gwashubeanda gharibajeanda, ak goobissa uhuudaannyi;

¹⁷ deagheatta, ghwanya ghuutta nyaasha humng'eeda nea gwayi, “Nii Balleandeanyu abwariinyi, ahoosanani.”