Mattayo 28 - NEAJEEDA EESH BEA BUUNEESSEAN

Duunnooda

¹ Iimuchchu nea ning'atta sabatto, nea ghaghar gayeew eaweeda madeeda bea wikkajeanda, gawa Mariyayda suguura Magdaleena ea Mariyaydida bea iyyeenyean ghwadaa heeda sibunnyiisa buuneeda.

² Hean gwasimgeaw ng'eanyiida muuchchi, ak gwashubean malaykajeanda humng'eeda bea Ng'uttamiida leabu humng'eeda amwahit ghoarakghrakghta lagheaneedida sidukuteawa ghuutta bung'eedean ak goopteadawa.

³ Nea gheamamdaannyi ghawaar dadamandeeda nea hang'weakkaschi ea eashish ghawaar gapkeanda.

⁴ Daa furiischoodigiga ghabeal muuchchi nea ghabwaadan ea gawuurji fuga nimeewa.

⁵ Ghwalamda malaykajeanda humng'eeda ak gwayeeshsha gadeemgiga, “Agooga adoabealli; ghanalli gideaba googasayi Yeesuuyda heetta singoor.

⁶ Manda hiji aba gideaba nuduutteayda gidaghayi rukuteayda. Apkaani adaaha heeda heetta siyiin.

⁷ Asi ahalageat ak gooweayi arukusiina giinealangaaschi gideaba niduunna miyeeda, ak ghamneawa ea nisheedeawaneegwa gawa Galilaaya, iyoahitti hoowa gajadaaha. Asi neabean nearukuneegwa.”

⁸ Ghwalamwajaada ghabeawa heeda bung'eeda aba muuwda nea gang'weela muuchchi, gwasalda ak ghoadaw giinealangaaschi iitta.

⁹ Hean gwaroonnyi Yeesu sea saawa ak gwayeeshsha, “Seayu!” Gwaneekkiissa ak ghoang'ng'waay geeshanga ak ghaghadoawan.

¹⁰ Ng'atta gwayeeshsha Yeesu saawa, “Adoabealli! Aweayeena ak goorukusi oorjoogiyya gaweay Galilaaya amahitta hoowa gayaghwadaahan.”

Iitta furiischoochcheanda

¹¹ Damanda beawa, ng'ulla gwanda furiischoojusu weay mujiini heeda ashoohoodiga hees ak ghoadayda iitta ng'asheega sean bunu.

¹² Hean gwaroonnyi sea gweargwa ak gabalool, hit geattaw furiischoodiga lappiyeeda saang'a,

¹³ nea gwayeeshsha, “Ayeeshshiina buuneeda, ‘Ghwahidu giinealangaaschi eawa nea sililli ak gwajagwat.’

¹⁴ Amadeeppa ghwanyas iitta sugoochcheanda bea ng'eanyiida, gajeeppaloola niny ak gajeegeandeawaneegwa shatta.”

¹⁵ Gageanda lappiyeetta amwang'atta gwasinda baloolda gissurukusiinda. Gageawiit iitteaba ng'asheanji aba jeeda fuga Yahuudi ea ghwoaw ghamneawa.

Yeesu gabussa giinealangaaschi

¹⁶ Gaweay Giinealangiga attamwanagiin Galilaaya nea ghoaburbuur heayeeda ghayi rukusa Yeesu saawa.

¹⁷ Hean daa ghaghadoawan, nea mwaatkwa ghamwachmwach jeesinga nyaawa.

¹⁸ Ghwaan Yeesu heannyaawa ak goobalool ak gwayeeshsha, “Sugoonan gheambalmeeda sean aba humng'eeda ea ng'eanyiida.

¹⁹ Asi aweayeena ak ghoanung' ghoaw emoojiga sean giinealanga, nea gobattiisannyi saawa aba gheawunga Aseetta was Bwaabwa, ea gea Balleanda, ea gea Gurorooda Ghaydit.

²⁰ Oannaala ghoang'ng'waay ng'asheega sean eagoonnyeegwa. Ang'ulla aniini geendeayi sea agooga galeega sean ea gagul mudeanooda ng'eanyiida.”