Mattayo 27 - NEAJEEDA EESH BEA BUUNEESSEAN

Yeesu geayaat madeeda Bilatto

¹ Imuchchu nea ghaghar gayeew gagasa Ashoohoodiga hees ea gweargwa gichchea gwanuusta Yeesu.

² Geerada aba biingu ak geayaat heeda Bilatto nea siida ambal ng'eanyiitta gil.

Miyeeda Juuda

³ Iiduw nea ghwadaa Yudaayda heetta lah bwadaw Yeesu gideaba sirgweaksa, ghang'ut giseaneega ak googuumsa ashoohoodiga hees ea gweargwa shilingajeekka attiktam ea damanamughuushiin.

⁴ Gwayeeshsha, “Neadiinyi aba gideaba ghadaydi siida manda gidinyeanda ennus.” Gwayeeshsha Saawa, “Neada ghwadaseasaani aseasa? Ng'asheanji gabeachcheeweey ang'iing'i.”

⁵ Hean gwahisa niny shilingajeekka jeeda gheeda sibatta Aseetta, ak ghang'eat gawa amwahitta ghwaratta geaw.

⁶ Gageanda ashoohoodiga hees shilingajeekka nea gwayi, “Mammisiina gideaba gajeayiina jeeda gheaseeda aba gideaba suu lappiyeeda foojeanda gil.”

⁷ Gwaneaji ak ghwashaaha lappiyeetta madamnyeamba siisi sineadayyi dahuundiga ak ghoaw heeda jea ebunnyiisa rabasta.

⁸ Ghoaw gida duueguureewa madamnyeandida madamnyeanda foojeanda ea ghwoaw ghamneawa.

⁹ Ak gwasa ng'asheega ghayi rukuta sibaneeda suguura Yeremiya gideaba, “Gageanda lappiyaji diktaam ea damanamughuush moonneeda ghayi bea siida mwas fuga Israeeli gideaba gayghoadayda,

¹⁰ ak ghwashaaha madamnyeanda siida sina dahuundiga gawuurji gidaghayi eshshindanean Ng'uttamiida sinnda.”

Bilatto goonyeari Yeesu ng'asheega

¹¹ Geanung' ghaminaada Yeesu aba madeeda siida haw bea ng'eanyiitta. Hean ghoanyaash Siitta haw bea ng'eanyiidean nea gwayeeshsha, “Ang'iing'i guwosi sugoochcheanda fuga Yahuudi?” Gwayeeshsha Yeesu, “Girgu ang'iing'i.”

¹² Nea aba damandida argweaksiina ashoohoodiga hees ea gweargwean ghanyea mwasha eara ng'ashaan.

¹³ Hean gwayeeshsha Bilatto, “Miyiinyi ng'asheesu sean sumuwwunaneeyiini?”

¹⁴ Ghanyea mwasha Yeesu eara ng'ashaanjagi ea ghahamng'eanyi siitta haw bea ng'eanyiittean muuchchi.

Yeesu gergweaksiina miyeeda

¹⁵ Iissa eaweeda ghweelmeeda gageanu siida haw bea ng'eanyiida ak goottin siyagi wassean mida ghealooniga gasa emeeda.

¹⁶ Aba damandida gwanda siisi nalaat muuchchi was siida ghealooniga suguura ghawungaaschi Baraaba.

¹⁷ Hean iiduw nea ghabwat geat buuneeda ghoanyaash Bilatto gideaba, “Googasayi deattin ng'eaha, Baraabahi ghana Yeesuuyda suguura Gristo?”

¹⁸ Ghoanyashtaydunu nea ghwanal gideaba geayaat headaannyi aba lachng'eanyiida.

¹⁹ Damanda mideawa Bilatto uhuuda hoorgeeda argweachcha goojeakta gatmoadannyi siida weah gwayeeshsha, “Adiiduw gighasi geaw siisi doabiiwaadiin, aba gideaba geesawanan muuchchi aba jeeda girgweatka appadaydaannyi.”

²⁰ Gageanu ashoohoodiga hees ea gweargwa ak ghaghoash buuneeda nea gwayeeshsha, amsa ettinneegwa Baraaba ak geenuus Yeesu.

²¹ Ghoanyaash siida haw bea ng'eanyiitta nea gwayeeshsha, “Googasayi deattin ng'eaha aba jeedeaba fiisu assiyyeenyean?” Gwasha saawa, “Baraaba.”

²² Gabiikta Bilatto ghoanyaash nea gwayeeshsha, “Ghamneawa googasayi dahindaan Yeesuyda suguura Gristo?” Gwayeeshsha sean, “Anngoora.”

²³ Ghoanyaashta Bilatto nea gwayeeshsha, abwanaaha? Neada ea nidiinya naaha? Gabiikta saawa ghoaraanya gijuureanda nea gwayeeshsha, “Angoora”

²⁴ Daa Bilatto gideaba mwanyasa gil ghoahaada nyarasta, gageanu beega ak goohuun geattingaaschi aba madeeda emeeda ak gwayeeshsha, “Aniini manda gichchea ghwaagan aba foojeadeaba siisi asawsiina agooga nea goobwageat.”

²⁵ Ghwasha Buuneessean nea gwayeeshsha, “Nung'waada foojeandeaba siisi ghapka badahuukkaasa ea gea diibigaasa!”

²⁶ Hean gageanu ak goottissa Baraaba, hit bayiiga Yeesu aba mughoowooda ghoadayda Yeesu enngoorsa uhuuda beehiida.

Shirikkara gwajuuga Yeesu

²⁷ Gageanu shirikkarajeanda siida haw bea ng'eanyiitta ak ghwaat Yeesu jeeda gheeda sugoochcheanda, ak gabassa geat shirikkareeda sean.

²⁸ Geafwakta hang'weakkaschi ak geekkwealsa hang'da oomu.

²⁹ Geanap shiipka halaghweenga, ak geayiin uhuuda Yeesu, nea geegeanu muudeanda ak geayiin gattindannyi bea dugwa. Iissa geetkuy ammwadeadaannyi nea geejuuga nea geeyeeshsha, “Seayu, Sugoochcheanda Yahuudi!”

³⁰ Geeng'ng'urriisa ng'usheega nea geegeanu muudeanda ak geabwara uhuuda.

³¹ Iing'atta jukkooda geegeanda hang'dida ak geeshuup hang'weakkaaschi hii geayaat engoor.

Yeesu gengoor

³² Iiduw nea gaweay geadaah siyagi suguura Simoneeda ng'eanyiida Girene, ak geediing'sa ghwasar behiidaannyi.

³³ Sihitta hiji suguura Golgootta (nea gideaba dea Geapkeeda Uhuuda gil,)

³⁴ geattaw difwayeeda sikkuuyi sea gidang'weanda, hean samu niny ghaheawa ghwali.

³⁵ Iiduw nea ning'atta gingoorda geelaja hang'weakkaschi nea geeng'alealleesa;

³⁶ gobiitpiit nea gafur.

³⁷ Geayiin deascheeda uhuudaannyi ng'asheega siihaaktaaw sung'waardunu, “Nii Yeesu gil sugoochcheanda Yahuudi.”

³⁸ Abeeda gwanda fii iyyeenya was mareanghooga siingoruudayi sea niny, dea manda meatkweadaannyi bea geattinda dugwa, niirja gwanda meatkweeda geattinda ghaadaam.

³⁹ Iissa fuga ng'atta aba naweeda goong'eawi nea goodiindiil iheenga nyaawa nea gwayeeshsha,

⁴⁰ “Ang'iing'eeda jea gwanyarja gheeda sibatta Aseetta ak ghwadeas aba eawooji samwagu, asi lealni geaw! Iiwosi Balleanda Aseetta, girarang'aanani uhuuda beehiida.”

⁴¹ Gwasunu eara ashoohoodiga hees ea ng'oorshoodiga ea gweargwa, gabarra budeay nea gwayeeshsha,

⁴² “Gwalealu suurja ak amwoammu gwalealu geaw. Niny sugoochcheanda Israeeli gil; asi dararang'aanana uhuuda behiida ghamneawa ak abeeda earaseasa gajeamwasa.

⁴³ Niny ghaghus Aseetta ea dalealna ghamneawa iigasa, aba gideaba gwayi, ‘Aniini Balleanda Aseetta.’”

⁴⁴ Eara Fukka was mareanghooga singooruuday sea ninyiin gong'eawi.

Miyeeda Yeesu

⁴⁵ Ghang'eada aseetteaba lah ea ghwahitta aseetteaba shageash gwadukta ng'eanyissean misaneeda.

⁴⁶ Iiduw nea nihitta aseetteaba shageash gooyyeawuda Yeesu nea gooheedu daghatta nea gwayi, “Eloyi, Eloyi lama sabaktani?” Nea gideaba, “Aseetteanyu, Aseetteanyu, anda nunung'usean heeda?”

⁴⁷ Iing'shi fukka gwachchi miinaada aba hoowean ng'asheesu gwayeena gaguursa Eliya.

⁴⁸ Ghafwach Siyagi ak gageanu ghabuscheanda ak ghoannyit beega ng'weani ak ghwayiin uhuuda muudeanda ak ghoadaw ghwali.

⁴⁹ Gwayeeshsha buuneeda mwaatkwa, “Oommeasa eadaaha ea jea ghwaan gwalealu.”

⁵⁰ Gabiikta Yeesu gooyyeawda nea gooheedu daghatta amang'atta ghoabitta gurorooda.

⁵¹ Ghabwaasha, hang'da subwaasha gheeda sibatta Aseetta nibiyyeenya, ghang'eada humng'eeda ea gagul ng'eanyi, gwasim geaw ng'eanyiida ak gabearshachchi lagheanga hees;

⁵² ghwajaada ghuusiga bung'eadinga ak ghang'eatng'eat sasanuukka saang'a bea fuga ghayi lil.

⁵³ Rinna jeesinga bung'eadinga nyaawa ing'atta dunnoadaannyi, gaweay jeeda mujiineeda ghaydit ak goohiimsa geat fuga saang'a.

⁵⁴ Hean daa shirikkarajeanda haw ea fukwachchi fur Yeesu gidasimda geaw ng'eanyiida ea ng'asheekka ghwanyawa bunuun, ghabeal muuchchi nea gwayi, “Aba huumwa siisi Balleanda Aseetta gil!”

⁵⁵ Abeeda aba hoowa gwanda gadeemga saang'a ng'ula nea sheagi. Suh gadeemga ghayi eadu geeshta Yeesu nea gwaleabu Galilaaya nea gagadiyeesa.

⁵⁶ Aba jeannyaawa gwanda Mariyaayda suguura Magdaleena ea Mariya gheamatta Yakkobo ea Yoseefu, ea gheamatta oorjooga Sebedaayo.

Bunyitta Yeesu

⁵⁷ Iiduw nea ghoaw shing'ada ghwahidu siyagi was meanang'oochcheanda bea ng'eanyiida Arimattaya suguura Yoseefu. Nea abeeda eara niny ea giinealaneeda Yeesu gil.

⁵⁸ Gawa heeda Bilatto ak gamus saseeda Yeesu, hean ghwanung Bilatto eattawa.

⁵⁹ Gageanda Yoseefu saseeda Yeesu ak gookwealsa hang'deesh miy.

⁶⁰ Ak ghwayiin jeeda bung'eadaannyi eesh ghayi gurgursa jeeda harearacheanda amwahit gooreakreaksa lagheaneeda haw ghuutta bung'eeda ak gawa.

⁶¹ Damandida goobitpiit Mariyaayda Magdaleena ea Mariya niirja nea goofuursa jeesinga nyaawa bung'eeda.

Furitta bung'eeda

⁶² Hitta eaweetteaba iyyeenya was eaweeda giding'ding'deayda, gabassa geat ashoohoodiga hees sea Farisayajeega heeda Bilatto,

⁶³ gwayeeshsha, “Ea Siida mureeda, sipkaachchi gidaghayi rugu siitta milmiliin damanda mii ghameawa gideaba, ‘Ing'atta eawooji samwagu gaydaduudu.’

⁶⁴ Asi nung' eefur bung'eeda muuchchi ea ghang'atta eawooji samwagu, aba gideaba gajiiduw ghapka giinealangaaschi ak gwajagwat amaduw gwayeennisa buuneeda, ‘Niduunna miyeeda,’ Rengaweega huydean gayghwalaabwa hoowa dea madeeda.”

⁶⁵ Gwayeeshsha Bilatto saawa, “Goondeawi furiischoodiga aweayeena afra muuchchi aba gidoammuusti.”

⁶⁶ Hean gaweay ak gafur muuchchi heeda sibunnyiisa buuneeda nea geerroor lagheaneetta ak geayiin furiischoochcheanda.