Mattayo 25 - NEAJEEDA EESH BEA BUUNEESSEAN

Gissigala haweega attamanamughuush

¹ “Abeeda sugoochcheandumeeda humng'eeda gaygawuurji sea haw damanamughuush geanu gheaboonyaanga nyaawa akkaweay ghwadeapta siida geeshi.

² Aba jeannyaawa ea dasheahi haw muut nea suurja gea ammuut ea weaghoodi.

³ Haweekka ammuut dasheahiin ghwaat gheaboonyanga nyaawa nea mwayiina jeesinga nagheeda;

⁴ duukku haweekka mideawa weaghumeedean gageanu nagheeda ak ghwayiin jeeda haleanjeeda sea gheaboonyanga nyaawa.

⁵ Iiduw nea ghwashing'da siida geeshshi geeyi bwak ea ghang'utta ghaat ak gwalil.

⁶ Bugusta eaweeda agweena ghwanya sideechcheekka nea gwayi, ‘Asaghayneawa, nihidu siida geeshi! Aweayeena deepteayda.’

⁷ Ghang'eat ng'eat haweegiga seaniin aba geeshangiga ak gwasissin gheaboonyanga nyaawa.

⁸ Gwayeeshsha haweegiga dasheahiin gea weaghoodi; ‘Agoaneasa nagheedeang'wa suung'ay aba gideaba gheaboonyangaasa iissa gamis.’

⁹ Gwayeeshsha giikka mideawa weaghumeedean, ‘Manda mayghoahideasa aseasa ea agooga! Ghang'wana ghoang'ng'waanyi naweeda ak gooweesi fuga sheahida nagheeda ak ghoashaayi.’

¹⁰ Ng'eat ng'eat haweekka dasheahiin gaweay ghwasha nagheeda, goobeeru siida geeshshi ak goodeayi jeeda gheeda haweekka hidaat bay ea niding'ding'dean ak gaweay jeeda gheeda nyeangiida amang'atta gearat gidaghuut.

¹¹ Iiduw ghwahidu eara haweaga suurja ak gaguurriida aba gidaghuut nea gwayeenniissa, ‘Ea Ng'uttamiida, ea Ng'uttamiida, eaniyean jassseasa.’

¹² Ghwasha nea gwayeeshsha; ‘Aba huumwa, geayeeshshineegwa, agooga mwanaleagwa.’

¹³ Hean gwayeeshsha, asi oang'ng'wearni, aba gideaba mwoanali eaweetta jea gawaseewa ghana damanda.”

Gissigala soomju samwagu

¹⁴ Damandida gaygawuurji sea siida gasa gawa bareannyeekka, gaguursa soomjoogaaschi ak goodeaga haleanjeedaannyi;

¹⁵ gageanu ak gaba siisi adaw haleanjeeda heeda ammu ghoadaw siyagi lappiyeeda suguura dalanta muut, ak ghoadaw niirja iyyeenya, ak ghoadaw niirja agi, amahit ghang'eat gawa bareannyeekka.

¹⁶ Gageanu siitta heetta siittaw dalantaji muudiin amang'atta googeakshi ak gabiikta gwayi dalantaji muut gichcha.

¹⁷ Eara siida heetta sittaw dalantaji iyyeenya googeaksheatta ak gabiikta ghwanyas dalantaji iyyeenya suuk.

¹⁸ Dukku siidida siittaw agiin gawa amahitta ghaghurghur shoomanda ak ghafuy lappiyeeda siida bea gadiyeeda.

¹⁹ “Muchchu nea nigeawiit rudeaydaannyi gabiigu siidida haw bea soomjoogigeani amahidu gwayiida haleanjeedaannyi.

²⁰ Ghwaan siitta ghayi siittaw dalantaji muudiin nea gweadu dalantaji muut suuk amahidu gwayeeshsha, ‘Siida haw, ang'wearda ghayi gugoonnyean dalantaji muut ak ghamneawa ea naahaachchi suuk dalaantaji muut.’

²¹ Gwayeeshsha siitta hawiin, Ghwadoabiiw soomjeanda miy doabiiwaat; nuwosi doabiwaat aba haleanjeeda ng'ayi, gajambala gasaang'a, benni apteada nea gihoosani sea siida haw.

²² Ghwahidu eara siitta ghayi siittaw dalantaji iyyeenyean nea gweadu dalantaji iyyeenya ahaada ak gwayeeshsha, ‘Siida haw, ghayi gugoonnyean dalantaji iyyeenya; sukwa nanyaschi suuk iyyeenya gea niihaada.’

²³ Gwayeeshsha siidaannyi haw; ‘Ghwahit soomjeandeanyu miy doabiwaat; nuwosi doabiwaat aba haleanjeeda ng'ayi, gajambala gaasaang'a beenni apteada nea gihoosani sea siidaang'u haw.’”

²⁴ “Ghwahidu siitta ghayi siittaw dalanteenagiin ak gwayeeshsha, ‘Siida haw, aniini ghanalli gideaba guwosi siida hang'waay, iissa gilaji heeda mihisani, ak giimughuushi aba heeda mileelsiini;

²⁵ ghabealli ak geawi dafuy dalanteadaang'u aba jeessigeeda. Asi ang'ng'waanya gea was gaagu.’

²⁶ Ghwasha siidaannyi haw nea gwayeeshsha, ‘Ang'iing'i guwosi soomjeanda muy bea ghaleehooda! Ginali gideaba iissa ghaalaji heeda ghayi meahisani ak ghamughuushchi aba heeda ghayi mealeelsiini?

²⁷ Abeeda mammiiseeyi eaditta lappiyedeanyu heeda fuga jea goodiing'u nea abeeda ghwanyawa gaydanyas lappiyedeanyu ea gea jea ghoahaada.

²⁸ Asi oarreada siisi dalanteani ak ghoattawji siitta mideawa dalantaji damanamughuushiin.

²⁹ Aba gideaba siida nyoo googar gil gajeeheassa ea ghwanawda; amaduukku siitta meagara giliin, eara gitta mwanang' mideawean gajearreat.

³⁰ Duukku soomjeanji marachchi giliin, ajaksiina jarooda jeeda misaneeda; hoowa gaygwanda shookka ea giiwiirrooda geeshatka.’”

Girgweageeda huydean

³¹ “Damanda jea ghwahinna Balleanda Siida aba jeeda gigheambiittaannyi, nea goodeana malaykajeega, hean gaygoopteada aba uhuuda hoorgda giigheambiittaannyi.

³² Gaygabassa geat Emoojiga sean mwadeadaannyi ak gaygooheeldooscheatta gideajusu aheeldooscheatta jeagiischoochcheanda gisilga ea nooga,

³³ akkayghwayiin gisilga meatkweadaannyi bea geattinda dugwa akghwayiin nooga meatkweadaannyi bea geattinda ghadaam.

³⁴ “Ng'atta gaygwayeeshsha sugoochcheanda fukka mida meatkweadaannyi bea geattinda dugwean, ‘Abeenni agoogeeda ghayi nugooneegwa Bwaabwa ghawooda ahearana sugoochcheandumeeda ghayi sibay erarseegwa ghang'eada dea ghayi subwada ng'eanyiida;

³⁵ aba gideaba geabearjeewi jalooda ak googoonnyean gichchadaak, geabearjeewi muwooshta ak googoonnyean beega jea dali, geabissi dawos rabascheanda ak goollullean,

³⁶ geabissi dawos dawiish ak gookkweallean, ghamnyaannyi ak ghoapkannyi ollong'sean, geandi ghealooniga ak ghoapkannyi allong'sean.’

³⁷ Aba damani gaygwayeeshsha fukka doobiiweadiin, ‘Ng'uttamiida, nii gajea andamwani sidayeay nea gibearjeewi jalooda ak geegoonnyeey gichchaaga, ghana bearjeewana muwooshta ak geegoonnyeey beega jaaleaha?

³⁸ Ak nii gajea aneaweechcha gil jea ea sidaayeay nea guwosi rabascheanda ak geadeaptaanyeey, ghana woosa dawiish ak geakwealleey?

³⁹ Nii gajea anndamwan gil jea ea sidahaneay nea gimnyaani, ghana midana ghealooniga ak geapkaannyi ellong'seey?’

⁴⁰ Ghwasha Sugoochcheanda nea gwayeeshsha, ‘Aba huumwa gaydayeeshineegwa, gili wassean noosissi siyagi aba jeedeaba orjoosu bea giyeanya manang'iin goosinnean aniini.’

⁴¹ “Iiduw gaygwayeeshsha fukka mida meatkweadaannyi bea geattinda ghadaamiin, ‘Oang'amwana madeedeanyu, fukghayi sumwaashta, aweayeena jeeda beasta manda mudeanooda ghayi sibay eerarsa Meang'nyeandeenda ea malaykajeegaaschi;

⁴² aba gideaba geabearjeewi jalooda ak ea moogoonean gichchadaak, geabearjeewi muwooshta ak ea moogoonean beega jaadali,

⁴³ geewoschi rabascheanda ak ea moollulean, geewoschi dawish ak ea mookweallean, ghaamnyaannyi nea geandi ghealooniga ak ea moapkaani oolloong'sean.’

⁴⁴ Abeeda gayghwasha saawa nea gwayeeshsha, ‘Ng'uttamiida, nii gajea aneaweechcha gil sidaahaneey nea gibearjeewi jalooda, ghana muwooshta ghana wosa rabascheanda ghana wosa dawiish, ghana miyaana ghana midana ghealooniga, ak ameaweadeay?’

⁴⁵ Ak gaygwayeeshsha niny, gaydayeeshshineegwa, ‘Aba huumwa, ghayi iissa iyoaheawi asissiina ng'asheesu siyagi aba jeedeaba orjoosu manang'iin, abeeda ghoaheawi asinnean aniini.’

⁴⁶ Abeeda fiisu gaygaweay jeeda ghoorjooda manda mudeanooda, nea fukka doobiiweadiin gaygaweay jeeda eaweega manda mudeanooda.”