Mattayo 24 - NEAJEEDA EESH BEA BUUNEESSEAN

Yeesu gabaloola nyarjeawda gheeda sibatta Aseetta

¹ Gwaritteawa Yeesu jeeda gheeda sibatta Aseetta ak ghang'eat gawa, ak gaweay heeda giinealangaaschi ak geehiimsa gissideasta gheetta sibatta Aseettean.

² Ghwasha niny ak gwayeeshsha, “Moong'ulli haleanjeeni seaniin? Aba huumwa geayeeshshineegwa, manda eara lagheaneanagi jea ghoabit aba uhuudeaba niirja jea ea majeeng'ng'adeadu.”

Sawanadeeda ea ghabasta

³ Iiduw nea goopteada Yeesu aba uhuuda gijeeda Maseytuunajeega, gaweesa giinealangaaschi aba heeda funyaat ak geanyasa hichpa geaw ak geannyaash gideaba, “Rukuni ng'asheesu gayghoaw eeju? Amaduw hinnoadaang'u gwanda gwadeagooda jea eadaaha ghana dea mudeanooda damanda?”

⁴ Ghwasha Yeesu nea gwayeeshsha, “Ang'ulla adiiduw gwareenganneegwa sih.

⁵ Aba gideaba gayghwahidu fuga saang'a nea gaygaba nii ayi, ‘Aniini geewoschi Gristo,’ ak gaygwareengani fuga saang'a.

⁶ Gajayiinya iitta ng'uchcheeda ea dea ng'uchcheadinga, ang'ulla adaghoabealeagwa, aba gideaba ng'asheesu mayghwashiy hinnooda, amaduukku mudeanooda ea mighoaw.

⁷ Aba gideaba gaygang'uchchi daroar ea daroar nuut, ak gang'uchchi sugoochcheandumeeda ea sugoocheendumeeda nuut, ak gaygwanda geejeeda ea sawooda ng'eanyiida aba hiji ea hiji:

⁸ suu seaniin ghang'eat ghuutta lajooda.

⁹ Iimuchchu gheeda gajealabeagwa bwadaw eesawaneegwa amaduw geenuuseegwa; gayghwasteagwa Emoojiga sean appadaydeanyu aba gheawungeasu.

¹⁰ Ak abeeda fuga saang'a gajeeruusa nea goohheakkiida geat nea gwasta geat.

¹¹ Amaduw gayghwahidu sibanga saang'a bea ng'uyyeega ak gaygwareengani fuga saang'a.

¹² Iiduw nea ghoahaada deambiilaneandumeeda buuneeda, hean gaygabiissa ghamwaning'idaada bariinyeega aba jeesinga nyaawa.

¹³ Abeeda siida jea ghamilikghta ea gammudean ada ea siida jea ghwalalaani.

¹⁴ Gichcha gajeerukkwiida Giijasta Miy bea sugoochcheandumeeda aba ng'eanyissean ghoaw muwwunooda aba emoojiga sean, ama ng'atta abeeda ghwahidu mudeanooda ng'eanyiida.”

Sawanadeeda haw

¹⁵ “Asi iyoadaayi gidamuy jea gweadu nyariida, ghayi rugu sibaneeda suguura Daniyeeli nea niminaada aba heeda ghaydit (dea assoamwa adanala),

¹⁶ abeeda fuga mida ng'eanyiida Yudeeya dasalsiina giijeega;

¹⁷ nea siida mida badayda bulaliida ea adaghwararang'aan gageanu haleanjeeda mida jeedeaba gheannyi;

¹⁸ nea deamida madamnyeanda ea adagabiigu bwadaw ghamwagha hang'daannyi.

¹⁹ Eamuy dea gheamadiga mideawa diibiga ea gea areer diibiga aba damani!

²⁰ Amwaasha Aseetta eamoosaldani eaweetta gooroogeeda ghanea eaweetta Sabattoohi

²¹ Aba gideaba damani gaygwanda sawanadeeda haw manda deadeenna aba deaghayi sisna ng'eanyiida ea ghoaw ghamneawa, ak ea maygudu abiikta adaah sawanadeeda uurji nii earahay.

²² Nea ghwanyawa askwearjoojusu dagheeda ea meannuwaasa ghwanyawa ea maygwanda sichchea ghwalalaan; iiduw geelagu askwearjoojusu appadahuukka fukghayi sibay ealoat.

²³ Asi eaweechcheanji iyeeshshineegwa sih ‘Gristo gwanda hiji!’ ghana ‘Gwanda hoowa!’ Adoamwaschi.

²⁴ Aba gideaba gayghwahidu Gristohajeega ng'uyyeega ea sibanga ng'uyyeega. Ak gayghoahiimu gwadeagwajeega hees deamdeameadi jea ghoammu gahutteawi fuga ghayi bay ealoat.

²⁵ Ang'ulla nigeawiit dareekuseegwa ammwadi.

²⁶ Asi iyeeshshineegwa, ‘Adaaha diida gwanda dareapcheada, ea adiiduw gooritti;’ ghana iisiyi, ‘Gwanda jeeda gheeda,’ ea adoamwaschi.

²⁷ Aba gideaba gawuurji dadamandeetta abwaay heeda ghayeawa ea gagul heeda biyearean nii abeeda gichchea gawuurji hinnooda Balleanda Siida.

²⁸ Heeda wassean mida gumeeda heeda jea gabattiisa geat madoonyakka.”

Hinnooda Balleanda Siida

²⁹ “Iimuchchu nea ning'atta sawanadeedida bea askwearjoojigigeaniin, gajeenung' gamisaniit gheang'da aseetta, nea sheeda ea maygooboong'u, nea miinga mida humng'eeda gaygoobittu, nea uurda humng'eeda gajeettumduum;

³⁰ ng'atta gajeadaah gwadeagooda Balleanda Siida aba humng'eeda, abeeda emoojiga sean bea muunda ng'eanyiida gayguuttu heareega idaah Balleanda Siida nea ghwaan aba badayda shamooghuutka humng'eeda nea gwandeawa uurda ea gigheambiitta haw;

³¹ ak gaygoojeakta malaykajeegaaschi ghaghuut muuchchi durumbeatti ak gaygaweay gooweamu fugaaschi loat aba murdajeega assang'wan bea ng'eanyiida, ghang'eada murdeeda humng'eeda meatkweeni ea gagul meatkweetta.

Gidanaal fih shaboogheechcheanda

³² “Ajeeng'ni ng'asheesu eagali shaboogheechcheandean: ifirfiir damealgaschi ak gwardu seenga, goojeeng'u gideaba damanda domeelda ninekkiit.

³³ Gwasnu eara agooga iyoadaayi ng'asheesu seaniin nean ghwahidu ghoanalli gideaba ninekkiissa gidaghuut.

³⁴ Aba huumwa gaydarukuneegwa gideaba mayghwanawda seaygeani nea miighwahidu suu seaniin.

³⁵ Humng'eeda ea ng'eanyiida gayghang'atta, amaduukku ng'asheegeasu ea mayghang'atta eara hay.”

Manda siida nal askwearjeanda ghana damanda

³⁶ “Dukku iitta askwearjeandida ghana damandida manda siida nal eaweetta jea gawaseewa eara malaykajeega humng'eeda ghana Balleanda geaghus Bwaabwa nea gaba geaw.

³⁷ Aba gideaba gaygawuurji gidaghayi bea damanda Nuuhu, nii gichchea gawuurji hinnooda Balleanda Siida gil.

³⁸ Aba gideaba damandida ghayi miighwahinna roopta hawiin abeeda buuneeda iissa gweagiischi nea gwaleeshi, gageeshi nea geaghi, ea eayi bwak ea gawa Nuuhu jeeda maleambooda,

³⁹ nea majeeng'na ea ghwahidu roopta duw ak gwaduulu buuneessean, nii abeeda gichchea gawuurji hinnooda Balleanda Siida gil.

⁴⁰ Damandida gaygwanda fih iyyeenya madamnyeanda gajeegeanda agi ak geenung'usa heeda niirja.

⁴¹ Gadeem iyyeenya gajeahitta nea gang'ealshi, ak gajeegeanda agi ak geenung'usa heeda niirja.

⁴² Asi oang'ng'wearni aba gideaba mwoanali eaweetta jea ghwahinna Ng'uttamideang'wa.

⁴³ Asi anala ng'asheanji gideaba inyeeda ghwanyawa ghwanal siida bea gheeda damanda eaweeda jea ghwahinna mareanghweanda, gayghoang'wearu nea ghanyea mayghwanung'waada enyarja gheannyi.

⁴⁴ Gwasnu eara agooga asissina geat, aba gideaba Balleanda Siida gayghwahidu damanda morarsiini.”

Soomjeanda doabiiwaat ea dea mii doabiiwaat

⁴⁵ Nii gajea anasihi was soomjeanda doabiiwaat mideawa weaghumeeda, iin siidaannyi haw uhuudeaba gheannyi ak ghoadaw buuneeda daghwarda aba damandaannyi?

⁴⁶ Ghang'wana soomjeandida ama hidu Siidaannyi hawiin ghwahitta nea gwasinda ng'asheega gidaghayi surukusiindean.

⁴⁷ Aba huumwa, gaydayeeshshineegwa, gaygageanu ak ghwayiin haghweeda halanjeadannyi sean.

⁴⁸ Amadukku soomjeandida muyiin iyeeshsha geaw aba jeadaannyi nishing'da Siideanyu hawiin,

⁴⁹ amahit gabiissa ghabwar soomjooga ama ng'atta gweagiischi nea gwaleeshi sea leeydean,

⁵⁰ gayghwahidu Siidaannyi haw bea soomjeandideani eaweetta mararsiina ea damanda mwanala.

⁵¹ Ak gayghwaaga ghorjooda, ak ghwanung' gwandeayi sea fuga ammittu geat; abeeda gaygwanda shookka ea giwiirrooda geeshatka.