Mattayo 23 - NEAJEEDA EESH BEA BUUNEESSEAN

Yeesu gwayeeshsha buuneeda ashageada ng'oorshoodiga deaweeda ea Farisaayajeega

¹ Ng'atta gwayeeshsha Yeesu emeetuw ea giinealangaschi,

² “Ng'oorshoodiga ea Farisayajeega goobiitpiida hoorgeeda Muusa;

³ asi ng'asheega jea gwarukuneegwa sean oang'ng'waanya nea goosinnyi ak ea adoogali sinaweega nyaawa ea adoosinnyi aba gideaba saawa gwarukkwiida nea masinna.

⁴ Saawa iissa ghwarat sareennyeekka durmani ak ghoasari buuneeda ghwaada hamarjoojiga, nea magassa eara gideaba gayghwasat eara aba monneeda.

⁵ Gichcha sinaweega nyaawa sean inyeessa gwasin ghwadaa buuneeda aba gideaba iissa gooheettu barawajeegeagwa bea mooshta ghawooda, nea googeawiidi seapseata nyaawa.

⁶ Fuga bwariiy goobitpiida hoorgajeegeaba mwadi eaweetta ghwelmeeda, nea ghabwaariiy goobiida mwadi aba jeesinga ghoorajeega sinnealshachcheewa.

⁷ Iissa ghabwariiy gideaba gajeeyeenniisa seayu aba naadajeega nea gaguura buuneeda Rabi.

⁸ Ak agooga ea adagaguureeweegwa sih Rabi, aba gideaba Ginealshoochcheandeang'wa aa akkalealla amaduw agooga goobeayi ghaamwadagi.

⁹ Nea adooguuri siida, Bwaabwa aba ng'eanyiida aba gideaba, Ghweandeang'wa aa akkalealla nea gwanda humng'eeda.

¹⁰ Biissa gichcha ea adeeguureeweegwa fuga hees, aba gideaba, siida haw aakkalealla, nea Gristo gil.

¹¹ Siida haw aba jeedeang'wa gayghoaw soomjeandeang'wa.

¹² Siida adiing'u geaw gajeahiing'u, nea deahiing'u geaw gajeettiing'u.”

Yeesu gwanyareeksa gimmittuunoodeaba geat

¹³ “Eamuy deang'wa ng'oorshoodiga ea Farisayajeega, ammiittu geat! Aba gideaba ghoakghuumi buuneeda gidaghuutta sugoochcheandumeeda humng'eeda, nea mooweayeeni jeeda, nea fuga jea gaweay ea moosiksiini gaweay jeeda. [

¹⁴ Ashageada agoogeeda was ng'oorshoodiga ea Farisayajeega ammiittu geat! Aba gideaba goyeagiisachcheewi gealga masinung'weega, amaduw aba gimminnoadeaba geat iissa ghoamwaashchi ghawooda nea gokkeawiichchi; asi gajanyasa ghorjooda haw muuchchi.]

¹⁵ Eamuy deang'wa ng'oorshoodiga ea Farisayajeega ammiittu geat! Aba gideaba gooneayeewi jeesinga baskweega ea ng'eanyiida bwadaw nea googasayi siyagi jea ghwalalaan, amaduw nea niiw, ghoanung' ghwoaw jeepta maloonghajeega niba iyyeenya ea ghwanawaneagwa agooga.

¹⁶ Eamuy deang'wa ashoohoodiga ng'oawwi! ‘Agooga iissa gooyeennyi siida iyaksa habeawooda gheeda sibatta Aseetta ea miigili; ama aksa habeawooda lagheanga meang'meang'i mida jeeda Gheeda Sibatta Aseetta abeeda ea nirat geaw aba habeawooni.’

¹⁷ Ea fuga ng'oawwi bissea leekghteega! Aghaloamwaat anneeda lagheanga meeng'meeng'i ghana gheetta sibatta Aseettean nung' ghoaw lagheanga meeng'meeng'i haleanjeeda ghaydidiin?

¹⁸ Nea gooyeenyi, ‘Siida jea gweaksa habeawooda altaari ea miigili; ama aksa habeawooda haleanjeeda sisappa geadi bea ghadooweeda mida badayda altaari, ea nirat geaw aba habeawoani.’

¹⁹ Ea fuga ng'oowwi! Aghaloamwaat muuchchi anneeda, haleanjeetta sisabwa geadi bea ghadooweedean ghana heeda wagiida, nung' ghoaw haleanjeeda sisabwa geadi bea ghadoweeda haleanjeeda ghaydit?

²⁰ Siida aksa habeawooda altaari, gweaksa habeawooda eara haleanjeetta sean mida uhudean;

²¹ nea siida aksa habeawooda gheeda sibatta Aseetta, gweaksa habeawooda nii ea siida abiitta jeeda;

²² nea siida aksa humng'eeda habeawooda, gweaksa horgeeda sugoochcheandumeeda Aseetta habeawooda, ak ghabwada eara siida apteadayyeewa uhuudaannyi.

²³ “Eamuy deang'wa ng'oorshoodiga ea Farisayajeega, ammiittu geat! Iissa ghoanung' ghoadayda buuneeda gilagi aba jeeda damanamughuush aba mwayoah ea ruruukta ea hamuumayga ea seenga ng'andit, nea ghoappuuchchi ng'asheega durmani bea deaweeda was humeanda ea innyeanda jeeda ea baydeayda ea masaweega. Suh ng'asheega ghwanyawa haguuw gideaba gajasna gil, nea mwoanung'waadani ng'asheega suurja.

²⁴ Ea ashoohoodiga ng'oowwi, ammu ghamuush doonyooda ak ghwanukghutta ngamiya!

²⁵ “Eamuy deang'wa ng'oorshoodiga, ea Farisayajeega ammiittu geat! Aba gideaba iissa goohuunnyi badayda bayookta ea dea gweeriida, nea jeeda ghwannyiit haleanjeeda orreedayi buuneeda ea shidoodeaba ghaang'.

²⁶ Ea Farisayajeanda ng'oaw! Nyooh ghannyi asheeda ahuuna jeeda bayookta ak abeeda gayghammiidu eara badayda.

²⁷ “Eamuy deang'wa ng'oorshoodiga, ea Farisayajeega ammiittu geat! Goowurjeewi bung'eadinga siyeasha badahuukka roonghooda, amaduw nea geeng'ulluna bwadaw ea miyaas, nea aba jih ghwannyiit geakka fuga nimeewa ea ririnnyeanda sean.

²⁸ Gwasunu eara agooga ing'ulluunaneegwa buuneeda bwadaw goowoschi fuga doobiiweadi, nea aba jih ghwannyiit munyinnda ea ging'uuchcheeda.”

Yeesu gwargu ghorjooda jea ghwahidu

²⁹ “Eamuy deang'wa ng'oorshoodiga, ea Farisayajeega ammiittu geat! Aba gideaba iissa ghoadeaschi bung'eadinga sibanga, ak iissa ghoattamdaamnyi bung'eadinga fuga miyaas,

³⁰ nea gooyeennyi, ‘Inyeeda ghwanyawa geendi damandida bea gheamba ghwaanigaasa bea garayiin, gwachchi ea majeahhiida foojeanda sibaneeda.’

³¹ Aba sareani goomuuwu gideaba goowoschi balloojiga fuga ghayi nuus sibanga.

³² Asi oannyiida gitta ghayi adeenniida ghweanigeagwean.

³³ Ea ichchipkeega ea dayeega udang'usheega, gajoammustaan amulsiina girgweageeda jea ghwadeagwa heeda maloonghajeega?

³⁴ Ak gaydeajeagu sibanga ea weaghoodiga ea ng'oorshoodiga, mwaatkwa gajanuuseada nea goongoorsi iheenga beehajeega, nea suurja gajabwara aba jeesinga ghoorajeegeagwa siinnealshachcheewa nea ghoahoannyi aba gilinyoo ea mujiini,

³⁵ ak abeeda gayghwahidu badahuukkeagwa foojeanda sean bea fuga doobiiweadi weayeesa badayda ng'eanyiida, ghang'eada fojeanda ghayi sihida bea Habeeli ghayi doabiiwaat, ea gagul fojeanda Sakkariya was balleanda Barakkiya ghayi onuukusi jeeda gheeda sibattiisa Aseetta dageascheeda heeda Ghaydit ea dea heeda heeda wagiida.

³⁶ Aba huumwa geayeeshshineegwa ng'asheesu seaniin gayghwahidu badaydeaba seaygeani.”

Bariinyeega Yeesu bea Yerusaleemu

³⁷ “Ea Yerusaleemu, Yerusaleemooda, inuusay sibanga nea gifutti lagheanga fuga sichcheakseey! Neagasayi dabwada geat diibigaagu niba hada, gawuurji gidahinniida nghaghooda dayeagaaschi aba jeeda meang'eegaaschi ak ghoaheawi!

³⁸ Asi ang'ulla ghaheang'wa sinung'usa heeda ghoaw eemeeda.

³⁹ Asi geayeeshshineegwa, majagudoobiikta adahaan gichcha ea eaghus eeyi bwak ea ayeena, ‘Sittaw ghawooda siida wunna gheawunga Ng'uttamiida.’”