Mattayo 22 - NEAJEEDA EESH BEA BUUNEESSEAN

Gissigala ghweelmeeda nyeangiida

¹ Gabiikta Yeesu gichcha goobalool buuneeda aba galeega nea gwayeeshsha,

² “Sugoochcheandumeeda humng'eeda gawuurji sea sugoochcheanda gasa gageesheesa balleandaannyi,

³ hean goojeakta soomjoogaaschi gaguursa fukka sirariin ghapka nyeangiida, amaduw fukka sirariin ghaheawa ghapka.

⁴ Gabiikta gichcha goojeakta soomjoogaaschi suuk ak gwayeeshsha, ‘Ayeeshshiina fuga heetta sirar apkaani aba gideaba, Ang'ulla neanuuschi heewgeasu ea muhooga risheadi nigeawiit ghwahit sean, apkaani nyeangiida.’

⁵ Ghanyea maduuppa, ghang'eang'eat gaweay, gawa akkaleala madamnyeandaannyi niirja gawa giigeakshoadaannyi,

⁶ nea gea abit ghoang'ng'waay soomjookka ak geesissa ghwarjeeda, ama ng'atta geabwar gameewa.

⁷ Hean ghwanyareas sugoochcheanda ak goojeakta shirikkareadaannyi ghwalas uhuudeaba fukka bara buneedean nea geang'uda mujiineeda nyaawa beasta.

⁸ Ng'atta gwayeeshsha soomjoogaaschi, ‘Nyeangiida nigeawiit ghwahit ama duw fuga heetta sirar ea mudu gwadeaschi.

⁹ Asi ang'eatng'eada aweayeena guyeeda naweadinga ak googuursi fuga oadaayi sean aguursiina ghapka nyeangiida.’

¹⁰ Gwaritta soomjookka ak gaweay bearsheeda naweadinga ak gooweamu gilinyoo ghwadaa gea, munyas ea gea miyaas, ea ghwannyiit gheeda rabasta.

¹¹ Iiduw gawa sugoochcheanda gah ghwadaa rabastaannyi, ghwadaa siyagi miigookwa hang'weakka nyeangiida;

¹² ghoanyaash sugoochcheanda nea gwayeeshsha, ‘Siideaduupcheewi, guwundiin jeedeaba gheawi nea mindeawani hang'weakka nyeangiida?’ Geerukusa ak ghwaroat ghuutta.

¹³ Gwayeeshsha Sugoochcheanda fuga gadiyeeda, ‘Arada geattinga ea geeshanga, ak ghoayaachchi ak goojaksi jeeda misaneeda jarooda, aba hoowa gaygooyyeawda nea goowiiri geeshatka aba sawanadeeda.’

¹⁴ Aba gideaba gea suguursa aasaang'a, nea gea siloat ea ng'ay.”

Ginyeashteayda girutteayda gwaadi

¹⁵ Ng'atta gaweay Farisayajeega ak gabaloola gichchea ghaghasta Yeesu aba ng'asheagaaschi.

¹⁶ Iiduw goojeakta giinealanga nyaawa headaannyi ea gea Heroode geannyaash nea geeyeeshsha, “Giinealshoochcheanda, Aseasa geanalli gideaba ang'iing'i guwosi siida huumwa, ak gibwadi nii giinnaali buuneeda naweeda Aseetta aba huumeanda, nea ghanyea miduuppi hawunda siida aba gideaba ming'ulli ratooda buuneeda.

¹⁷ Heappi, rukuneasa aba ang'iing'i gidaaktiini. Ghwadoabiiwi gideaba geattawji Gaysaari gwaadi ghana mwadoabiiwa?”

¹⁸ Gwajeeng'u Yeesu munyasnachcheekka nyaawa ak gwayeeshsha, “Anda googasayi asimsimean ea fuga ammitu geat?

¹⁹ Oahimni heappi lappiyeeda ottayiideawi gwaadi.” Gageanu buuneeda ak geattaw shiliingajeanda.

²⁰ Ng'atta ghoanyaash Yeesu nea gwayeeshsha, “Gili gawuurji ng'eaha, ak gheawung'su gabeang'a?”

²¹ Geeyeeshsha, “Gaba Gaysaari.” Gwayeeshsha saawa, “Haleanjeeda Gaysaari oattawa Gaysaari, ak gea Aseetta ghoattawji Aseetta.”

²² Geeyi bwak ama iiy ng'asheesu ghahamng'eanyi ak gaweay.

Ginyeashteayda dunnooda miyeeda

²³ Eaweettida gaweay heeda Yeesu Fiisu suguura Sadukkayajeega eena manda duunnooda ak ghoanyaash,

²⁴ nea gwayeeshsha, “Giinealshoochcheanda, ghayi gwayi Muusa, ‘Siida iimeah, nea mwoabuuda diibiga, gayghaghi masiing'eandida ittannyiin oorjeeda ghaamwat, ak gwanyaksa oorjeeda ghaamwat diibiga.

²⁵ Asi aba hiji bea ghaheanyean gwanda oorju ispwa bea ghaamwadagi; gageeshshi dea madeeda ak ghami nea miighwanyas diibiga ak gwanung'usa gatmoadannyi oorjeeda ghaamwat.’

²⁶ Gwasnu earaba oorjeedeaba iyyeenya, ea oorjeedeaba samwagu, ea ghwahitta ispeennyaawa.

²⁷ Aba huydeandeaba sea eara gatmootta ghami.

²⁸ Aba jeeda duunnooda gay ghoaw gatmoodeabeang'a aba fiisu as ispwaan? Aba gideaba nindeayi sean.”

²⁹ Ghwasha Yeesu nea gwayeeshsha saawa, “Agooga ghoaramwaschi aba gideaba mwoanali Ng'ooruutka ghana uurda Aseetta.

³⁰ Aba gideaba eaweetta siduttuuna majeegeeshshi nea mwajeaghi aba gideaba gaygawuurji malaykajeega humng'eeda.

³¹ Ama duukku iitta dunnooda miyeeda, ea miyoassoamwana gidaghayi rukuneegwa Aseetta, ghayi gwayeeshshineegwa,

³² ‘Aniini geewoschi Aseetta Abrahaamu, ea Aseetta Isakka, ea Aseetta Yakkobo?’ Asi niny mii Aseetta fuga nimeewa gil, niny Aseetta fuga majeekcheewi.”

³³ Iiduw nea gwayiing'shi emeeda ghahamng'eanyi aba ginealshoadaannyi.

Digheanda haw

³⁴ Iimuchchu gheeda nea ghwayiiy Farisayajeega gideaba nirat ghuusiga Sadukkayajeega, ghabwat geat ak gabalool.

³⁵ Ghoanyaash diinagiida nea gwasim.

³⁶ “Ginealshoochcheanda, digheanda haw aba jeeda deaweeda anneeda?”

³⁷ Gwayeeshsha niny, “Bwariinya Ng'uttamiida was Aseattaang'u aba guroroadaang'u sean, ea aba jeadaang'u sean, ea aba fughareadaang'u sean.

³⁸ Nii digheanda hawi ak gabiissa ea dea madeeda gil.

³⁹ Deaba iyyeenya gawuurji sea nii, bwariiyda siida ischeayeewi gidubwariiydi geaw.

⁴⁰ Aba digheannyeeksu assiyyeenyean gwadiyeewa deaweedajeega sean ea sibanga.”

Ginyeashteayda iitta Gristo

⁴¹ Iiduw nea ghabwatgeat Farisayajeega ghoanyaash Yeesu nea gwayeeshsha,

⁴² “Iing'ullayi Gristo ea ng'eaha? Heappi ghoanung' ghoaw balleandeabeang'a?” Ak gwayeeshsha Saawa, “Balleanda Dawdihi.”

⁴³ Ak gwayeeshsha saawa, “Abeada ghwasaan iiduw inyas gwayeeshsha Dawdi aba Gurorooda, Ng'uttamiida, nea gwayi,

⁴⁴ ‘Ng'uttamiida gwayeeshsha Ng'uttamiideanyu, apteada aba meatkweedeanyu bea geattinda dugwa, bwak ea dayiin weajoadigaagu jeeda baneaguukka geashangaagu?’

⁴⁵ Abeeda Dawdi iiguura Ng'uttamiida, abeeda ghoammu ghoawdaan ballaandaannyi?”

⁴⁶ Aba hiji ghwaroat siida jea gwarukusa ng'asheanda. Ghang'eada eaweettida ghwaroat sichchea ghoanyaash gichcha ng'asheanda.