Mattayo 20 - NEAJEEDA EESH BEA BUUNEESSEAN

Fuga bwarng'eanyi aba jeeda madamnyeanda misabiibu

¹ “Aba gideaba sugoochcheandumeeda humng'eeda gawuurji siida bea gheeda ritteawa sakteayda duw ak gagasa fuga jea ghabwar ng'eanyi aba jeeda madamnyeandaannyi bea misabiibu.

² Iing'atta nea nineajeesa buuneeda gideaba gayghoadaw lappiyeeda suguura dinaari aba gadiyeeda jeedaskwearda, ghwaat jeeda madamnyandannyi bea misabiibu.”

³ “Gwaritta sakteayda nea gaba aseetta samwagu ak ghwadaa buuneeda suuk nea ghaminaada aba jeeda naada nea mandeawana gadiyeeda;

⁴ gwayeeshsha fukka, ‘Aweayeena eara agooga ak goosinnyi gadiyeeda aba jeeda madamnyeanda misabiibu, ak abeeda gaydagooneegwa gittoobiiwseegwa.’ Ak gaweay.

⁵ Gabiikta gwaritta gichcha siitta bea madamnyeandean nea gaba aseetta lah ea aseetteaba shageash, ak gwasinda gidada.

⁶ Hitta aseetteaba damwanagi gabiikta gwaritta gichcha ak gabiikta ghwanyas fii suuk nea ghaminaada; hean ghoanyaash nea gwayeeshsha, ‘Ghwasaan anda agooga goomineadayyi aba hiji askwearda sean nea moosni gil?’

⁷ Geeyeeshsha saawa, ‘Gweagu gideaba manda siida goaneasa gadiyeeda.’ Gwayeeshsha Siidida saawa, ‘Aweayeena eara agooga ak goosinynyi gadiyeeda aba jeeda madamnyeanda misabiibu.’

⁸ Iiduw nea gamikta aseetta, gaguursa siida bea madamnyeanda siidaannyi ahaaghwa fuga gadiyeeda ak gwayeeshsha, ‘Guursiina fuga gadiyeeda ak giidawi gidageattinda nyaawa, nea ging'eadi siida huuydean, ea gagul siida madeeda.’

⁹ Ghwahidu fukwachchi siittaw gadiyeeda nea gaba aseetta damwanagi, ak gaba siisi siittaw dinaarajaanjagi.

¹⁰ Hidu fukwachchi bea madeeda ghaghay gili jea eattaw lappiyeeda meaji ghwanaawda, amaduw eara saawa gaba siisi siittaw dinaarajaanjagi.

¹¹ Ng'atta ging'ng'ooyda, gooniiksa siitta bea gheedean,

¹² nea gwayi, ‘Fiisu huydeaniin gagadiyi aba jeemba aseadeanagi akghwahit, ak ginung' gwadeennyi lappiyedeanya sea gaanyaawa nea gwachchi aseasa geamilikghti gadiyeeda hang'waay subwadi beasta askwearda sean.’

¹³ Ng'atta gwayeeshsha siyagi aba jeannyaawa, ‘Siideadupcheewi, aniini mwaagi ghanyangaagu; gwachchi meeheelleesiini gideaba gaydagoonnyi dinaari?

¹⁴ Geanda gea was gaaagu akkuwi; ghaabwariinyi gideaba gaydaadaw siisi huydeaniin oyyang'deayyeena.

¹⁵ Neada ea mwadoabiwa haleanjeedeanyu iyeagasayi dahinda gidaabwariiydi? Ghana gishti ghaang' aba gideaba geewoschi innya jihi?’

¹⁶ Asi, gwasunu eara fuga huydean gayghoaw fugeammwadi, nea fugeammwadi gayghoaw fuga huydean.”

Yeesu gabaloola deaba samwagu iitta miyeadaannyi

¹⁷ Muchchu gheeda nea ghwascheang'da Yeesu gawa Yerusaleemu, ghwaat giinealangiga attamaniyyeenyean heeda funyaat ak gwayeeshsha aba naweeda,

¹⁸ “Ang'ulla, ghamneawa geascheang'di geeweayi Yerusaleemu; ak Balleanda Siida gajeang'ng'waay ak geayiin geattinga ashoohoodiga hees ea gea ng'oorshoodiga ak gajeergweaksiina miyeeda,

¹⁹ ng'atta gajeayaat ak geayiin geattinga Emoojiga eeshka, nea geabwar aba mughoowooda, ak geenngoor, ama eawetteaba samwagu gaygwaduudu.”

Gidaghayi mus gheamatta

²⁰ Ng'atta gawa Gheamatta jiilu balloojiga Sebedaayo ak gawa heeda nea goodeayi oorjooga aschi ama hitta gwatkuy ak gamus ng'ashaan.

²¹ Gwayeeshsha niny, “Gigasayi naaha?” Ak gwayeeshsha, “Rukta gideaba orjoosu ikkeasu assiyyeenyean nung' goopteada akkalealla aba gattindaang'u bea dugwa ak ginung' goopteada niirja aba gattindaang'u ghadaam aba jeeda sugoochcheandumeedaang'u.”

²² Ghwasha Yeesu nea gwayeeshsha, “Mwoanali eara gidoomuschi. Heappi! Ghoammuuschi aleayda bayookcheanda jea daleeyda aniini?” Gwayeeshsha, “Geammuuschi.”

²³ Gwayeeshsha Yeesu, “Sawanadeedeanyu gajoomilikghteaysiina, ama duukku giipteadayda geattindeanyu bea dugwa ea geattindeanyu ghadaam, meandeawani uurda jea dagoona, geaghus eattaw fukghayi nibay gwararsa Bwaabwa.”

²⁴ Iiy Giinealangiga attamwanamughuushiin ng'asheesu, gwanyareeksa oorjookka assiyyeenyean.

²⁵ Ng'atta gaguursa Yeesu saawa ak gwayeeshsha, “Moanali gideaba fuga hees bea Emoojiga goombaleegwa aba uurda nea fuga hees ikkanyaawa iissa ghaminghiseagwa.

²⁶ Ea maygwasunu aba heedeang'wa nea siida gasa gwaheedu aba jeedeang'wa, ea doawa soomjeandeang'wa,

²⁷ nea siida wassean aba jeedeang'wa igasa ghoaw siida madeeda ea doawa ging'ng'oonyaneedeang'wa;

²⁸ aba sareani eara Balleanda Siida mwoani egadiyeesa niny ghwaan gagadiyi, ak ghoadayda aweagaaschi ghoaw leadeeda fuga saang'a.”

Yeesu ghoahaap fii iyyeenya ng'oowwi

²⁹ Muchchu nea ghabeawa mujiineeda Yerikko ghwaat geeshta emeetuw.

³⁰ Hean, gwanda ghuutta naweeda fii iyyeenya ng'oowwi nea goobitpiit, hean iiduw nea ghwayiiy gideaba ghang'atta Yeesu ghwaat naweetta, goojuur nea gwayi, “Bwaydaneasa, Balleanda Dawdi!”

³¹ Goowwoowsa emeeda nea geeyeeshsha asiinda; saawa gabiikta goojuur muuchchi nea gwayi, “Bwaydaneasa, Ng'uttamiida Balleanda Dawdi!”

³² Ghaminaada Yeesu ak gaguursa ak gwayeeshsha, “Googasayi dasinneegwa naaha?”

³³ Geyeeshsha niny, “Ng'uttamida, geegasayi ghwajaada ghanyangaasa.”

³⁴ Ghabwayda Yeesu ak ghoong'ng'waay gheanyanga nyaawa ama deagheatta ghwajaada, ak ghwaat geeshta.