Mattayo 18 - NEAJEEDA EESH BEA BUUNEESSEAN

Siida haweewa sean ng'eaha?

¹ Damandida gaweay Giinealanga heeda Yeesu ak ghoanyaash gideaba “Siida haweewa sean ng'eaha aba jeeda sugoochcheandumeeda humng'eeda?”

² Gaguursa niny jeepta ak ghwanung'u ghaminaada aba dageascheeda nyaawa,

³ ak gwayi, “Aba huumwa geayeeshshineegwa, imwoayami geat ea awuurjeewana diibiga, ea majaghannyi aweayeena jeeda sugoochcheandumeeda humng'eeda.

⁴ Siida wassean aatgeaw ngeanyi ea gawuurji jeebi, siisi siida haw gil aba jeeda sugoochcheandumeeda humng'eeda.

⁵ Nea siida wassean jea ghamwas jeabwagi uurji nii aba gheawungeasu, abeeda ghamwasan aniini.”

Simsimda eadu ring'eeda

⁶ “Siida wassean jea ghwanung' gwasin ring'eeda jeabwagi aba jeedeaba diibisu manang'i mwasaniin, ghang'wana gwachchi geerassa gheatta lagheaneeda haw bea ng'ealdeayda ak geejaksa bugusta basooda.

⁷ Eamuy daang'u ng'eanyiida aba simsimda eattu ring'eeda! Aba gideaba simsimda gammiisa hinnooda, abeeda eamuy dea siida jea ghwanung' ghwahidu simsimda!

⁸ Iinung' geattindaang'u adiinya ghanea geashtaang'u, laja ak gijakti asheagiidana geaw; ghang'wana ginyasi eaweega nea gibea badeeda, mwasamwa gideaba gindeawi geattin iyyeenya ea geeshan iyyeenya ak geejakseey jeeda beasta manda mudeanooda.

⁹ Ama nung' gheang'daang'u sina ring'eeda giloatti, ak gijakti asheagiidana geaw; ghang'wana gideaba ginyasi eaweega nea gibea ghaang'agi, mwasamwa gideaba gindeawi gheanyan iyyeenya, ak geejakseey jeeda beasta maloonghajeega.”

Galeega gisilleanda roat

¹⁰ Ang'ulla! Adiiduw goofoolli earagi aba jeedeaba suu manang'iin, asi geayeeshshineegwa aba humng'eeda malaykajeega nyaawa iissa gang'ula galeegasean gheamamda Bwaabwa mida humng'eeda. [

¹¹ Aba gideaba Balleanda Siida ghwoan gwalealu gidaghayi roat.]

¹² Heappi gawurjiin? Siida imideawa gisil bughala, ak ghwaroat agi, maygwanung'usa heeda giikka asseedam ea damwashshageashiin uhuuda gijeeda ak gawa gagasa diitta gwachchi roadiini?

¹³ Amaduw nea ghwanyas, aba huumwa geayeeshshineegwa, gaygang'weeliisa nii muuchchi ea ghwalaabwa hoowa giikka asseedam ea damwashshageash maroottean.

¹⁴ Aso nii mii gidagassida Ghweandeang'wa mida humng'eeda gideaba gayghwaroat jeabwagi aba jeedeaba suu manang'iin.

Iyadiiyseey oorjeeda giyeang'wa

¹⁵ “Iyadiiyseey oorjeeda giyeang'wa, guweesi ak gireekusi nea goobeayi geat. Iimwas gooleeyseey iitta abeeda ea ninyasi oorjeeda giyeang'wa.

¹⁶ Ama heawa gooleeyseey iit gideayeawi siyagi ghaneah fii iyyeenya sea ang'iing'i, aba gideaba ng'asheanda wassean iirugu ammadeeda mushoodi assiyyeenya ghanea samwagu abeeda ng'asheega gaygamajeekcheewiidi.

¹⁷ Ama mealeysiniit saawa, abeeda girukusi ganiisa; ama mealeysiiniit ganiisa, abeeda ginung' ghoaw aba headaang'u siida Emoojiga ea dea ang'ng'waannyi gwaadi.”

Heeheeweega ea gidaydeayda gheatta

¹⁸ “Aba huumwa, geayeeshshineegwa, gida wassean oarachchi aba hiji bea ng'eanyiidean abeeda gajeasirat aba hoowa bea humng'eedean, nea gidoottinnyi aba hiji bea ng'eanyiidean gajeasiittin aba hoowa bea humng'eedean.

¹⁹ Geayeeshshineegwa gichcha, aba jeedeang'wa ineajeesa fii iyyeenya ng'ashaan aba hiji bea badayda ng'eanyiidean ak ghamwaash Aseetta, gayghoadaw Bwaabwa mida humng'eeda.

²⁰ Aba gideaba heeda wassean roonnyeesa fii iyyeenya ghana samwagu aba gheawungeasu, abeeda earaniini gaydanda jeannyaawa.”

Galeega soomjeanda mandeawana samsiinda

²¹ Iiduw gawa Betro heeda ak ghoanyaash nea gwayeeshsha, “Ng'uttamiida, heappi oorjeeda giyeanya iyadiiysean gaydasamsa niba hada? Niba ispwa?”

²² Gwayeeshsha Yeesu niny, “Meayeeshshineey niba ispwa, eara laadam ea damanamughuush niba ispwa.

²³ Aba dascheani sugoochcheandumeeda humng'eeda gawuurji sea sugoochchanjagi gasa gwayiida haleanjeeda sea soomjoogaaschi.”

²⁴ “Hean ang'eat ittooda haleanjeeda, deagheatta geeyeadu headannyi siisi mideewa sileemba lappiyeeda suguura dalantaji sagalamnyooji damanamughuush;

²⁵ siisi abeeda mandeawana eara gichchea ghoadaydawa sileetta; iiduw gwayeeshsha siitta haw was sugoochcheandean, ashaayda niny ea gatmoadaannyi ea diibigaaschi ea halanjeadannyi sean mideawa, ak geattaydaawa sileetta.

²⁶ Ghwalamda Soomjeandida ak gwatkuy aba madeadannyi ak gwayeeshsha, ‘Ng'uttamiida, aaniyean nyoo ghannyi riyeeng'da ak gaydawalu sileadaang'u sean.’

²⁷ Iiduw ghabwayda sugoochcheanda soomjeandida ak gwasamsa sileetta.

²⁸ Gawa soomjeandida ak gwaroonnyi sea siyagi was soomjeanda eajisu mideaydooscheesa gadiyeeda biissa gwandeawa sileadaannyi lappiyaji bughala suguura dinaari. Gang'eessa ak ghoong'ng'waay ak ghoagheat nea gwayeeshsha, ‘Goona sileedeanyu.’

²⁹ Gwatkuy aba madeadaannyi siitta eawoschu mideaydooschi aba gadiyeedean ak gamus nea gwayeeshsha, ‘Eaniyean nyoo ghannyi riyeeng'da ak gaydawalu sileadaang'u.’

³⁰ Ghaheawa ak gwajaksa ghealooniga ea eaghus ea nuwalu sileetta.

³¹ Iiduw nea ghwadaa soomjooga mideaydooschi ng'asheanji gwanyareesi muuchchi, ak gaweay gwarukusa siida bea gadiyeeda iitteaba ng'asheesu sean siin siididean.

³² Ng'atta gaguursa siidida bea gadiyeedean ak gwayeeshsha, ‘Ea soomjeanda muy! Gwachchi ang'iing'i gimuschean gideaba aaniyean nyoo ghannyi bassean ak geasamseey siileetta sean ittaang'uun;

³³ ama ang'iing'i mammisseey gideaba gaybwayda soomjeanda indeaydooscheesi gadiyeeda gawuurji gidagwachchi easamsiindaneeyi?’

³⁴ Ghwanyareas Siitta haw bea gadiyeedean muuchchi ak ghwanung' eayaat eesawan ea eaghus eaniwalu sileetta seaniin.

³⁵ Asi gwasunu eara Bwaabwa mida humng'eeda gaygwahinduneegwa eara agooga iimaba siisi samsa oorjeeda geannyaawa aba jeadaannyi sean.”