Mattayo 15 - NEAJEEDA EESH BEA BUUNEESSEAN

Ng'asheega siing'ng'wanyaana fugeaba garayi

¹ Hean gaweesa Farisayajeega ea ng'oorshoodiga nea gwaleabu Yerusaleemu ak ghapka heeda Yeesu ak ghoannyash,

² “Ghwasaan anda giinealangaagu maduuppa ng'asheega siing'ng'wanyaana fugeaba garayi bea ghaheanya? Iissa gweagiischi nea meahuuna geattinga.”

³ Ghwasha nea gwayeeshsha, “Anda eara agooga iissa goofoolli diigheanda Aseetta aba ng'asheegeagwa oang'ng'waannyi?

⁴ Gwayi Aseetta; ‘Sissiina mureeda gweanu ea geamadu,’ nea ‘Siida ang'eawi ghwaan ghana ghaamwat ea deenuusa.’

⁵ Ak gooyeennyi agooga, ‘Siida iiyyeeshsha ghwaan ghana ghaamwat, gitta gwachchi jea dagoonnyi, naadawji Aseetta.’

⁶ Asi aba seareeda ghaheang'wa, noanung' ghoaw ng'asheanda Aseetta gidamwadaagha.

⁷ Ea fuga ammittu geat! Nidoabiiw ng'asheanda ghayi ramoaran sibaneeda suguura Isaaya appadahuukkeagwa nea gwayi,

⁸ ‘Fiisu iissa gwasinnean mureeda aba ghuusiga, nea guroruunatka nyaawa ea sheageewean;

⁹ saawa gagadoowannean mwadaagha, nea ghoanaal giinealshooda was ng'asheega buuneeda.’”

Haleanjeeda ng'utta fii ririnnyeanda

¹⁰ Gaguursa emeeda bwat geat ak gwayeeshsha, “Oalleaydiit ak ghoanalli:

¹¹ manda gichchea gwasik ghuut ak ghang'uda siida ririnnyeanda, geaghus gidarinna ghuutta, nii dea jea ghang'uda siida ririnnyeanda.”

¹² Ng'atta gaweay heeda giinealangaaschi ak gwayeeshsha, “Heappi ginali gideaba gwachchi Farisayajeega iyiiy ng'asheandida gwanyareesi?”

¹³ Ghwasha nea gwayeeshsha, “Gilinyoo ea histeannyeanda gil iimahista Bwaabwa bea humng'eeda gajealoatta.

¹⁴ Anung'waada saawa, suu fuga adoobiiwshi ng'oawwi. Nea siida ng'oaw iyadoabiiw siida ng'oaw, gayghoabitta duwaawi jeeda shoomanda.”

¹⁵ Ng'atta gwayeeshsha Betro niny, “Ng'achcha iidigaasa aba galeesu.”

¹⁶ Gwayeeshsha, “Eara agooga mandaneegwa fughareenga?

¹⁷ Miianala eara ghamneawa gideaba gidanyoo gwasik ghuutta siida iissa ghang'atta gawa jeeda, amaduw gwaritta jarooda?

¹⁸ Amaduukku ng'asheega rittuuna ghuutta gwaleappu gurorooda, amaduw ghang'uda siida ririnnyeanda.

¹⁹ Aba gideaba jeeda gurorooda gwarittuuna gittemshajeega munyas, nuusta siida, mealuleega, hiseadayeandumeeda, mareanghumeeda, muuwunooda ng'uyeega, ea beeshta siida.

²⁰ Ng'asheesu seaniin geang'utta siida ririnnyeanda; duukku gideaba geeyeagiischi nea mehhuuna geattinga mwoammu ghang'uda siida ririnnyeanda.”

Gatmooda mideawa masaweega

²¹ Ghabeawa Yeesu hoowa ak gawa meatkwajeega Diro ea Sidooni.

²² Hean ghwahidu headannyi gatmoomba fuga Ganaayo bea ng'eanyiitta goojuur muuchchi, nea gwayeeshsha, “Bwaydanaan, Ng'uttamiida, Balleanda Dawdi, gabearji hudeanyu meangeenda.”

²³ Ea marukusiina eara ng'ashaan. Ng'atta ghwahidu heeda giinealangaaschi ak gamus niny nea gwayeeshsha, “Nung'waada gawa, aba gideaba goojuurra geeshteanya.”

²⁴ Ghwasha nea gwayeeshsha, “Meechcheaksean buuneessean geechcheaksean gisilga roodeadi bea gheeh Israeeli.”

²⁵ Ghwahidu gatmoota ak gwatkuy aba madeadaannyi ak gwayeeshsha, “Ee Ng'uttamiida weadaan.”

²⁶ Ghwasha nea gwayeeshsha, “Miimiy gideaba geegeanu hamitta diibiga ak geejaksa gudajeega.”

²⁷ Gwayeeshsha, “Huumwa gil, Ng'uttamiida, eara gudajeega iissa ghwaak lajanga abitpinna heeda agiischeewa ghweanda nyaawa.”

²⁸ Hean gwayeeshsha Yeesu, “Ea Gatmooda, ang'iing'i masaweagaagu aahaw! Gagasa nyasa gitta igasayiin.” Ghahaap hudannyi aba geeshangiga.

Yeesu ghoahaap fuga saang'a

²⁹ Ghabeawa Yeesu hoowa ak gawa ghuutta basooda Galilaaya, ak gwading'da giijeeda ak goopteada.

³⁰ Gaweay heeda emeetuw nea geeyeassa fuga badoojiga, ea fuga manda geeshanga, ea fuga ng'oawwi, ea fuga manda ghuusiga, ea suuk gasaang'a ak geayiin madeadaannyi ak ghoahaap.

³¹ Ghaham ng'eanyi emeeda idaah nea gabalool fuga manda ghuusiga nea gamajeegiidi fuga badoojiga, nea gawelwel fuga manda geeshanga, nea ghoang'wearda fuga ng'oawwi, ak ghoaghambiit Aseetta Israeeli.

Yeesu ghoang'aatta fii sagalamnyooji ang'wan

³² Gaguursa Yeesu giinealangaaschi ak gwayeeshsha, “Geasamsi emeani aba gideaba neandeawi eawooji samwagu nea mandeawana gilak; mwabwariinyi gideaba gaydasiksa gaweay nea mwaaga gil, gajiiduw goohiil aba naweeda.”

³³ Gwayeeshsha giinealangaaschi, “Aba hiji geendi dareapcheeda gajeanyasana yeenu hamitta jea goolang'u emeeda saang'a deenu?”

³⁴ Ghoanyash Yeesu gideaba, “Goondeawi mukkattaji hada?” Gwayeeshsha, “Ispwa ea ghweayeesu ng'ayi manang'i.”

³⁵ Ng'atta ghwanung' goobiitpiit emeeda aba ng'eanyi,

³⁶ gageanu mukkattajeekka as ispwaan ea ghweayeekka, ak ghamwaash ghawooda ak ghabwanajaada ak ghoadaw giinealanga, ak ghoadaw giinealanga emeeda.

³⁷ Gweagiischi sean ea gwalang'u, ng'atta ghoawaam gheaptanga ak ghwannyiit soscheew ispwa.

³⁸ Nea fuga gwachchi agiischi ea sagalamnyooji ang'wan headiga akghwahit nea meeyiitta gadeemga ea diibiiga.

³⁹ Iiduw gwaheelli emeeda ak gwading'da maleambooda ak gawa meatkweeda Magadaani.