Mattayo 14 - NEAJEEDA EESH BEA BUUNEESSEAN

Miyeeda Yohaaneeda Abattiisachchi

¹ Aba damandida ghwayiiy sugoochcheanda suguura Heroode geawunda iitta Yeesu;

² Hean gwayeeshsha soomjoogaaschi, “Siisi gajea Yohaaneeda Abattiisachchi gil, nuduunna miyeeda; ak ghoaw ghamneawa uuri sina ng'asheesuun.”

³ Aba gideaba Heroode ghayi ghoang'ng'waay Yohaana ak gwajaksa ghealooniga, appadayda Herodiyaayda ghayi was gatmooda oorjeeda ghaamwat suguura Filippo;

⁴ nea gweagu ng'asheanda ghayi rukusa Yohaana nea gwayeeshsha, “Mwadoabiiwa gideaba gaymideawana gatmooda oorjeeda giyeang'wa.”

⁵ Gagasa gwanuus Yohaana amaduw ghoawal buuneeda aba gideaba ghwanal buuneessean gideaba Yohaana sibaneeda.

⁶ Muchchu gagul damanda ghwelmeeda eaweetta ghayi sijiila Heroode, ghang'was hudeaba Heroodeya aba madeeda rabasta, ak geeyi bwak ea gahoosan Heroode,

⁷ ak gwaheelleesa nea gweaksa habeawooda nea gwayeeshsha gaydagoonnyi gidawasean ing'allaan.

⁸ Aba damandida gagwarsa ghamwat ak gwayeeshsha, “Goonean uhuuda Yohaaneeda Abattiisachchi iina jeeda harakta.”

⁹ Gagiisan Sugoochcheanda; amaduw nea ghoapkaat habeawooda ghwanyawa akk ea gheanyanga rabasta ghwanung' eattaw;

¹⁰ goojeakta siida gawa ghealooni ak ghwalach gheatta Yohaana.

¹¹ Geeyeanna uhuudannyi jeeda harakta ak geattaw hudida, ak ghwaat niny heeda ghamwat.

¹² Ghwahidu giinealangaaschi ak gageanda musta ak gabuy; ama ng'atta gaweay ghoadaw Yeesu iitta.

Yeesu ghoang'aatta fii sagalamnyooji muut

¹³ Ng'atta iing'da iiy Yeesu ng'asheesu, ghabeawa hoowa nea ghwaat maleambooda ak gawa heeda manda sih. Nyas iitta emeetuw ghabeawa geeshanga gamaseaw niny nea ghabeawa mujiinajeega nyaawa.

¹⁴ Hitta Yeesu ghuutta basooda ghwadaa emeetuw ak gwasamsa amaduw ghoahaap geeyoong'ng'weakka nyaawa.

¹⁵ Iiduw nea niiw shing'ada, gaweay heeda Giinealangaaschi ak gwayeeshsha, “Hiji sindiin heeda manda sihi, adawa eemeeda beatta gaweay gharang'weakka gwasheaysa geat gichchaghwaak.”

¹⁶ Gwayeeshsha Yeesu “Manda gichchea ghwaat, oattawa agooga gichchaghwaak.”

¹⁷ Geeyeeshsha niny, “Geendeawi aba hiji mukkattaji muut ea ghweayi iyyeenya.”

¹⁸ Gwayeeshsha, “Ayeanni heedeanyu.”

¹⁹ Gwayeeshsha anung' goobiitpiit emeeda aba heeda mida nyeega; ng'atta gageanu mukkattajeekka ammudiin ea ghweayeekka assiyyeenyean ak gang'ula humng'eeda, ak gang'ushsha, ng'atta ghabwanajaada mukkattajeegiga ak ghoadaw giinealangaaschi, amahit ghoadaw giinealanga emeeda.

²⁰ Gweagiischi sean ea gwalang'u. Ghoawaam gheaptanga ak ghwannyiit soscheew damaniyyeenya.

²¹ Moonneeda fuga siing'ng'aatta ea sagalamnyooji muut headiga, nea meeyiitta gadeemga ea diibiga.

Yeesu ghabeawa badayda beega

²² Iiduw ghwanung' goosheeda giinealangaaschi gaweay gigheawda basooda nea ghoaghaawa maleambooda, nea gahuydean niny aba gideaba migwaheelli sea emeeda.

²³ Hean heelli emeeda gwading'da giijeeda heeda funyaat ghamwaash Aseetta. Iiduw ghoaw shing'ada nea gaba geaw aba hoowa,

²⁴ nea aba damani maleambooda gwachchi ea nihitta bugusta basooda, nea goodeawiit laweajajeega aba gideaba gwaroonnyi jeammeeda.

²⁵ Huuw gheatta beashatta gawa nea ghabeawa badayda beega nea gaweesa.

²⁶ Daa giinealanga nea ghabeawa badayda beega, ghabeal nea gwayi, “Nii maloonghajeanda!” Googuul aba muuwda.

²⁷ Deagheatta gwayeeshsha saawa, “Oappida ng'eanyi adoabealli siida aniini.”

²⁸ Ghwasha Betro nea gwayeeshsha, “Ng'uttamiida iyang'ing'i gil ginung' doan headaang'u nea ghabeawi badayda beega.”

²⁹ Gwayeeshsha, “Beenni.” Ng'atta ghwararang'aada Betro aba jeeda maleambooda ak gawa appadayda beega nea gagal heeda Yeesu;

³⁰ hean daa jeammeeda, ghabeal ak gwalik beega, ak googuul nea gwayeeshsha, “Ng'uttamiida lealnean.”

³¹ Deagheatta ghoahaakta Yeesu geattindaannyi ak ghoang'ng'waay nea gwayeeshsha, “Ea siida mwanang' masawi, ghwasaan anda gibeali?”

³² Ding'da duwaawi maleambooda ghahawda jeammeeda.

³³ Hean ghaghadoawan fukka sean mida jeeda maleamboodean nea gwayeeshsha, “Aba huumwa ang'iing'i guwosi Balleanda Aseetta.”

Yeesu ghoahaap fuga miyeani aba Genasareetti

³⁴ Ghoaghaawa basooda ak ghwahitta ng'eanyiida Genasaretti.

³⁵ Jeeng'u fugeaba hoowa, ghoadayda iitta aba daroorakkiga neekkeewean. Geeyeassa fuga sean miyeani,

³⁶ geemearmearani niny eawaas earea wileeda hang'daannyi gil akghwahit; nea fukka sean waas weeleadaannyiin geahhaap.