Mattayo 13 - NEAJEEDA EESH BEA BUUNEESSEAN

Gissigala siida wea histeayda

¹ Eaweettida gwaritteawa Yeesu ghoaha ak gawa goobideada aba ghuutta basooda.

² Gabassa geat emeetuw, ak geey bwak ea gwading'da maleambooda; ak goobideada nea ghaminaada emeeda aba ghuutta basooda.

³ Gwarukusa buuneeda ng'asheega saang'a nea gagalla geat nea gwayeeshsha, “Ghayi gawa sih histeada.

⁴ Damani histeawean gwanda gea abitpissa jeennaweeda, ghwahidu dariidakka ak ghwaak.

⁵ Suurja goobitpissa badahuukka harearatka, heeda manda sigeeda saang'a, deagheatta gwardu iiduw ea manda sigeeda ang'ng'waay hawunga,

⁶ iiduw nea gwadagu daknooda ghoaseal beasta daknooda; ak ghwasis aba gideaba manda hawunga.

⁷ Suuk goobitpissa jeeda halaghweenga, rudu halaghweenga ghaminghis.

⁸ Suuk goobitpissa heeda mida sigeeda miyaas, gwardu ak gwaji akkalealla bughala, gwaji niirja laadam, gwaji niirja diktam ea damanamughuush.

⁹ Siida mideawa iidiga, ea dayiing'shi.”

Gissibaysiina galloodeaba geat bea ng'asheega

¹⁰ Ghapka headaannyi Giinealanga ak gwayeeshsha, “Ghwasaan andagibalooli saawa nea gigalli geat ng'asheega?”

¹¹ Ghwasha nea gwayeeshsha saawa, “Agooga sugooneegwa nalooda makcheameeda sugoochcheandumeeda humng'eeda, nea saawa ea miyeattaw.

¹² Aba gideaba siida wassean mideawa gil gajeeheassa ea ghwanaawda, nea siitta mandeawana giliin, eara giitta mideawean gajearreat.

¹³ Nii gideabaysiini gibaloolda nyaawa nea geagalli geat ng'asheegeani, aba gideaba saawa iyang'wearda ea mwadaaha, ghoaleaydiit ak amwayiinya nea mwanala.

¹⁴ Aba heannyaawa gwasa ng'asheanda rugu sibaneeda siyi Isaaya nea gwayi: ‘Iing'da gajayiinya, ak ea mwajanala, ging'weerdeayda gajoang'ng'wearda, ak ea mwajadaaha.

¹⁵ Aba gideaba guroruunatkeaba fiisu nidurmaniidi, nea iidiga nyaawa ea mayiingshi muuchchi, ak ea niiluulan gheanyanga nyaawa, adaghwadaah aba gheanyanga nyaawa, ak ghwayiiy aba iidiga nyaawa, ak gwajeeng'u aba guroruunatka nyaawa, ak gwayamsean geat ak ghaahaapchi.’

¹⁶ Ghoang'wani agooga aba gideaba gheanyangeagwa ghoang'wearda nea iidigeagwa gwayiing'shi.

¹⁷ Aba huumwa geayeeshshineegwa sibanga saang'a ea fuga doobiiweadi ghayi gagaseadayi deakteaba ng'asheesu ghamneawa oadayiin, ak ea mwadaaha, nea ghwayiiy ng'asheesu ghamneawa oayinyiin ak ea mwayiinya.

Yeesu gwargu ganeega gala siida wea histeayda

¹⁸ “Asi agooga oalleaydiit gideagali siida wea histeayda.

¹⁹ Siida wassean iiy ng'asheanda sugoochcheandumeeda ak ea mwanala, ghwahidu giitta muyiin ak ghoasealda gidida sihisa guroroadaannyiin.

²⁰ Nea dea sihisa jeeda harearatkean ea siitta iiy ng'asheandideaniin gil ama deagheatta ghoang'ng'waay nea gang'weela.

²¹ Amaduw ea mandeawana hawunga aba jeadaannyi iissa ghoang'ng'waay ng'asheandida gilinuwaas, ama hidu sawanadeeda ghana gapnu ghabasta appadaydeaba ng'asheenji gabay ghoabeada.

²² Nea dea abissa jeeda geediga halaghweenga, ea siitta iiy ng'asheanda amaduw aba geawunda gheang'da barureega badayda ng'eanyiida, ghaminighis ak ea mudugwaji haghweega.

²³ Nea dea sihisa heeda sigeeda miyasiin ea siitta iiy ng'asheandideaniin ak gwajeeng'uuni; nii dea jih haghweega, gwaji akkalealla bughala, akwaji nii laadam, akwaji nii diktam ea damanamughuush.”

Gissigala morookka

²⁴ Gwarukuta gichcha galeega nea gwayeeshsha, “Sugoochcheandumeeda humng'eeda gawuurji siida weah gwahista histeanga miyaas aba jeeda madamnyeandannyi.

²⁵ Iiduw nea nilil buuneeda, ghwahidu weajoochcheanda ak gwahisa morookka dang'adiga ngano ak ghang'eat gawa.

²⁶ Rudu nngano nea ghamwanmwan nea gwaji geadaah gaguuyi sea moorookka.

²⁷ Gaweay soomjooga ak gwayeeshsha siitta bea madamnyeandean, ‘Ea Siida mureeda, mwaghannyi ghayi gihisti mmbeeyooda miyaas aba jeeda madamnyandang'u? Amaduw gwarinna yeenu moorookka?’

²⁸ Gwayeeshsha niny, ‘Nii gwasin weajoochcheanda.’ Ghoanyaash soomjooga nea gwayeeshsha niny, ‘Gigasayi eweaya eammughuusha?’

²⁹ Gwayeeshsha, ‘Manda; iyoammughuushchi morookka gajiiduw ghoaloachchi eara nngano.

³⁰ Anung'waada gwaheettu sean ea ghwahitta damanda lajiitta; damandida gaydayeeshsha fukka jea ghwalajiin, oshsheeda oammughuusha morookka ak ghoarachchi gharmuchcheekka ak geaghwarda, nea nngano goowweamsi gijigoodeanyu.’”

Gissigala ghajilleanda haradaali

³¹ Gwarukta gichcha galeega nea gwayeesha, “Sugoochcheandumeeda humng'eeda gawuurji sea ghajiileandageetta suguura haradaali ghayi geanu siida akwahisa jeeda madamnyandaannyi;

³² gabiissa amwanang'eawa ghajilga sean amaduw nea gwardu gwaheedu ak geadaah nea niiw geetta haw, ghwahidu dariidakka ak gwadeeksa ghoorajeega nyaawa damealgaaschi.”

Gissigala gidamwattaw

³³ Gwarukusa saawa gichcha galeega, “Sugoochcheandumeeda humng'eeda geegala sea hamiiraayda geanu gatmooda, ak googuuyi sea dearangspa gweeraji samwagu ak geeyi bwak ea ghaghuut geaw sean.”

Yeesu gagadiyeatta galeega

³⁴ Suh seaniin goobaloola Yeesu emeetuw aba galeega nea moang'ng'wa gwarukuta ng'ashaan nea manda gidagala.

³⁵ Abeeda ghoaw huumwa ng'asheanda ghayi rugu sibaneeda nea gwayi: “Gaydajaat ghuutteanyu aba galeega, gaydargu gea funyaat ghang'eada deasubwada sindeetta ng'eanyiida.”

Yeesu gwargu ganeega gala morookka

³⁶ Iiduw gwaheelli emeetuw ak gawa ghoah. Gamaseaw Giinealangaaschi ak gwayeeshsha “Goona ganeega ng'asheanda gwachchi igali geat sea morookka madamnyeandean.”

³⁷ Gwayeeshsha, “Siida hista histeanga miyaas Balleanda Siida;

³⁸ madamnyeandida ea ng'eanyiida gil, histeanga miyas balloojiga sugoochcheandumeeda; nea morookkiga ea balloojigeaba diitta muyiini.

³⁹ Nea weajoochcheandida histean ea meang'nyeandeenda, nea lajitta ea mudeanooda ng'eanyiida, nea fuga lach ea malaykajeega.

⁴⁰ Asi gitta simmugurriida morookka ak geang'uda beastean, ea gichchea gawuurji mudeanooda ng'eanyiida.

⁴¹ Balleanda Siida gaygoojeagu malaykajeagaaschi, ak ghoawaam aba jeeda sugoochcheandumeadaannyi haleanjeessean eadu ringeeda ea fuga sean sina ng'asheega munyas.

⁴² Ak geehisa jeeda duwayda beasta; ak gooyyeawda fuga nyaawa aba hoowa nea goowiiri geeshatka aba sawanadeeda.

⁴³ Abeeda geadoobiiweadi gayghoameang'daayda Aseetta aba jeeda sugoochcheandumeeda Bwaabwa nyaawa. Siida mideawa iidiga ea dayiinya.

Galeega lappiyeeda funyaat

⁴⁴ “Gichcha sugoochcheandumeeda humng'eeda gawuurji gheaseeda funyaat aba jeeda madamnyeanda, ama daa siida ghafuy; aba ng'weeloadaannyi gawa ak ghwashaayda haleanjeedaannyi sean mideawa ak ghwasha madamnyeandida.

Galeega booshcheanda haw sheayeat

⁴⁵ “Gichcha sugoochcheandumeeda humng'eeda gawuurji sea siida sheahiida haleanjeeda gasa boshcheanda miy,

⁴⁶ geeyi bwak ama daa boshchanjagi mideawa sheayeeda haw, gawa ak ghwashaayda haleanjeedaannyi sean ak ghwasha.

Galeega gheareedanga

⁴⁷ “Gichcha sugoochcheandumeeda humng'eeda gawuurji sea gheareedanga siippuutta jeeda basooda, ak ghoang'ng'waay heeluutka sean bea ghweayeega;

⁴⁸ geeyi bwak ama nyiit, goongiiru buuneeda ea ghwahidu ghuutta basooda ak ghaghwal ghweayeega miyaas ak ghwayiin jeesinga dabiitta nyaawa nea gea munyas gwahista.

⁴⁹ Nii gichchea gawuurji gil eaweetta muudeanooda ng'eanyiida aba gideaba eaweettida gayghwahidu malaykajeega ak gooheelli fuga munyas ea gea doobiiweadi,

⁵⁰ ak gwahisa fuga munyas jeeda duwayda beasta; abeeda gaygwanda buuneeda nea giwiirda geeshatka.”

Meanang'oochcheandumeeda eesh ea dea waas

⁵¹ “Heappi nojeeng'u ng'asheesu seaniin?” Ghwalamda Saawa ak gwayeeshsha, “Eah.”

⁵² Ng'atta gwayeeshsha saawa, “Asi gilinyoo ea ng'oorshoochcheanda gil was giinealaneeda sugoochcheandumeeda humng'eeda, gawuurji sea siida mideawa gheeda geanu aba jeeda gheaseadaannyi haleanjeeda eashish ea gea woosi.”

Yeesu geaheawa aba Nasareetti

⁵³ Iiduw nea ghoahiit Yeesu galeegiga ghang'eat gawa,

⁵⁴ gawa ng'eang'da nyaawa hitta hoowa goonealshi aba jeeda ghooriida nyaawa siinnealshachcheewa, ak goonealshi ea ghahamng'eanyi buuneeda nea gwayi, “Siisi ghwanyasa yeenu weaghumeeni ea ng'asheesu deamdeameadiin?

⁵⁵ Neada siisi ea mii balleandeaba siitta sina behajeegeani? Neada ghaamwat ea megureewana Mariya? Nea oorjooga ghaamwat ea mii Yakkobo gil ea Yoseefu ea Simon ea Yuudahi?

⁵⁶ Ama eara haweega ghaamwat sean ea meendeawanani aba hiji? Abeeda ghwanyasa yeenu siisi ng'asheesu seaniin?”

⁵⁷ Deagheatta geenyareesi aba ng'asheagaaschi. Hean gwayeeshsha Yeesu saawa, “Sibaneeda majaghanyi ea meattawa mureeda, geaghus ea meattawa aba ng'eanyidaannyi ea gheannyaawa.”

⁵⁸ Ea mudugwasissa hoowa deamdeamang'su saang'a aba gideaba mandeawana masaweega.