Mattayo 12 - NEAJEEDA EESH BEA BUUNEESSEAN

Iitta Sabatto

¹ Damandida gwasik Yeesu jeeda madameega eaweetta sabatto. Iiduw ghwayeachchi giinealangaaschi, ak gwahirjeaweada muschoonga ak ghwaak.

² Daa Farisayajeega gissin giinealanga gwarukusa Yeesu gideaba, “Ang'wearda, giinealangaagu gwasin ng'asheanda mammisiina sinooda eaweetta Sabatto.”

³ Gwayeeshsha saawa, “Heappi miyoassoamwana gidaghayi sin Dawdi sea fuga mideawa damanda yeada jih:

⁴ gidabeada jeeda gheeda Aseetta ak ghwaak mukkatteeyda gihiimnooda, nea mammiisiina gideaba gayghwaak niny ghana fuga mideawa geaghus ghwaak ashoohoodiga?

⁵ Ghana miyoassoamwana aba jeeda deaweeda gideaba gili was askwearjeanda sabatto issa ghwadattas ashoohoodiga diineeda Yahuudi deaweeda aba jeeda gheeda sibatta Aseetta ak ea moawa gidinnyeanda?

⁶ Asi geayeeshshineegwa hiji gwanda siida haweawa eara gheeda sibatta Aseetta.

⁷ Ama inyeeda gajanala iitteaba ng'asheesu, ‘Geagasayi baydeayda mii haleanjeeda sisappa geadi bea ghadooweeda,’ gwachchi majoopparanna fuga manda gidamuy nisin.

⁸ Aba gideaba Balleanda Siida niny Ng'uttamiida Sabattohi.”

Siida aptu geattinda

⁹ Ghabeawa hoowa ak gawa jeeda ghoriida nyaawa sinealshachcheewa.

¹⁰ Nea abeeda gwanda hoowa siida aptu geattinda. Geannyaash nea geeyeeshsha, “Ghwahidi gideaba gajeahhaap siida eaweetta Sabatto?” Geannyaash ng'asheanji nea geegasa gichchea eahaaktayda.

¹¹ Gwayeeshsha saawa, “Aba jeedeang'wa gajea ng'eaha jea gang'adeesa gisillandannyi jeeda shoomanda eaweetta Sabatto jea ea maygwalealu?

¹² Siida ghang'al gisilleanda niba hada! Ada abeeda ghwahit siinooda ng'asheega miyaas eaweeda Sabatto.”

¹³ Ng'atta gwayeeshsha siidida, “Adoabiiwa gattindaang'u.” Ghoadoobiiw, ak ghahaap ea gawuurji geattinda niirja.

¹⁴ Iiduw gwaritta Farisayajeega jarooda ak ghwadawdaaw gichchea gwanuusta.

Soomjeanda loat Aseetta

¹⁵ Geeyi bwak ama jeeng'u Yeesu ng'asheanji ghabeawa hoowa. Ghwaat geashta fuga saang'a ak ghoahaap fuga miyeani sean,

¹⁶ ghaheawa nea gwayeeshsha adoorukusi sih iitteanyu.

¹⁷ Abeeda gwasa gida ghayi rugu sibaneeda suguura Isaaya nea gwayi:

¹⁸ “Ng'ulla siideanyu bea gadiyeeda aloachchi, abwariinyi nea iissa ghwanung'u gahoosan jeedeanyu. Gaydayiin guroroodeanyu badaydaannyi, nea gaygwarukkwiida girgweageedeanyu aba jeeda Emoojiga.

¹⁹ Maygwasheang'a ng'asheega ghana goojuuri, nea eara ghuuttannyi ghanyea majeeyiing'sa naweadinga;

²⁰ ghanyea maygwahirja muudayeanda ng'arng'ar, nea eara weasta aroasan ea maygwanuus, bwak ea eaghus eanisin girgweageeda jea goombaliischi.

²¹ Nea gheawungaaschi gayghwarar Emoojiga.”

Yeesu ea Belsebuuli

²² Hean Geeyeassa siisi ng'oaw bissea manda ghuutta bearji meangeenda; ghoahaap ak ghoang'wearda nea gabalool.

²³ Ghahamng'eanyi Buuneessean nea gwayi, “Siisi mii balleanda Dawdihi?”

²⁴ Iiy Farisayajeega ng'asheesu gwayi, “Siisi ghahoan meangeenda aba gideaba gwandeawa uurda Belsebuuli, meang'nyeandida bea eenda hawiin.”

²⁵ Gwajeeng'u gidabaloola saawa aba jeesinga nyaawa ak gwayeeshsha, “Sugoochcheandumeeda wassean iibearshi ea maygamajeegiit, ghana eara mujiini ghana gheeda wassean iidardaawaat, gheawi ea mayghamiinaada.

²⁶ Shattaani iihoan Shattaani, abeeda gang'uchi geaw. Abeeda sugoochcheandumeadannyi gayghaminadaydaan?

²⁷ Aniini iyearuutteawi meangeenda uurda Belsebuuli, heappi! Abeeda balloojiigeagwa saawa gooruuttideawa naaha? Aba gideaba saawa fuga jea goorgweakseegwa agooga.

²⁸ Ama ghamneawa earutteawi meangeenda uurda Gurorooda Aseetta, abeeda ghoanalli gideaba nihidu heedeang'wa Sugoochcheandumeeda Aseetta.

²⁹ Gayghoammustaan siida gideaba gayghabwasay gheeda siida mideawa uurda ak ghoawreat halanjeadannyi, nea mighannyi gwarada siitta mideawa uurdean? Ak abeeda gayghoammu ghoareat halanjeadannyi.

³⁰ Siida manda meatkwedeanyu niifuurnean muwuutta, nea siida wassean mabwadana geat sea aniini ghoadaarda.

³¹ Aba sareani geayeeshshineegwa, buuneeda gajeesamsa ring'eega nyaawa sean ea ging'weakka nyaawa sean, dukku fuga ang'eawi Gurorooda Ghaydit rukuna badayda ng'asheega munyas mayghwanyas samsiinda.

³² Amaduw gichcha siida jea gwarukuna ng'asheanda muy badayda Balleanda Siida gajeesamsa, dukku siitta jea gwargu ng'asheanda muy badayda Gurorooda Ghaydidiin, ea majeesamsa aba jeedeaba ng'eanyiini, ghana earaba ng'eanyiitta jea ghwahiiduunu.

Geetta ea haghweagaaschi

³³ “Asna geetta ghammiidu ak ghamiyasiit eara haghweagaaschi, ghana anung'u gamunyiit geetta ak gamunyasiidi eara haghweagaaschi aba gideaba geetta geenalla haghweagaaschi.

³⁴ Ea dayeega udang'usheega! Gajoammuustaan rukunooda ng'asheega miyaas nea goowoschi munyas? Aba gideaba siida iissa gwargu ng'asheega nyiit guroroadaannyiin.

³⁵ Siida miy aba jeeda gheaseadaannyi miy iissa gwargu ng'asheega miyaas, nea siida muy aba jeeda gheaseadaannyi muy iissa gwargu ng'asheega munyas.

³⁶ Asi geayeeshshineegwa, eawetta girgweaksiinda gaygaba siisi rugu ng'asheanda marachchi gil ghayi nyoo ea nurgu;

³⁷ aba gideaba aba ng'asheagaagu gajeegoonnyi doabiwnatta, ak aba ng'asheegaagu gajeergweakseay.”

Gassooda ng'asheega deamdeameadi

³⁸ Ak gwayeeshsha Ng'oorshoodiga ea Farisayajeega, “Giinealshoochcheanda geegasayi eadaaha gwadeagooda aba headaang'u.”

³⁹ Ghwasha nea gwayeeshsha, “Seaygeeda munyas biissa gamealuuli ak ea mwajeattaw gwadeagooda; geaghus gwadeagooda ghayi bea sibaneeda suguura Yoona.

⁴⁰ Gawuurji gida abiideatta Yoona jeeda ghweayeanda haw eawooji samwagu eawa ea askweari nii gichchea gawuurji Balleanda Siida gaygoobiida jeessigeeda eawooji samwagu eawa ea askweari.

⁴¹ Gayghamiinaada fuga Ninaawi eaweeda girgweaksiinda ak gaygoorgweaksa seaygeani aba gideaba gwandeawa gidinyeanda. Aba gideaba fuga Ninaawi ghayi saawa gwadukkuuna ring'eeda aba ng'asheega rukkwiida Yoona, nea aba hiji gwanda siida haweawa Yoona.

⁴² Gayghwahidu gatmooda ahaaghwa Wiilooda Ng'eanyiida Biyeara eaweetta jea eergweaksiina seaygeani, ak gaygoorgweaksa aba gideaba gwandeawa fiisu gidinyeanda. Aba gideaba niny gwasimna deasheagi ak ghwaan gooleeysiit weaghumeeda Sulemaani, nea ging'ulayi gwanda hiji siida haweawa Sulemaani.”

Biknooda meang'nyeandeenda muy

⁴³ “Meang'nyeandeenda muy iritteawa siida iissa gwaneayeewa ng'eannyiida manda beega, nea gagasa heechchea gafuufa ak amwanyasa.

⁴⁴ Amaduw gwayeeshsha geaw, Gaydabiikta gheenyu heetta earinni, biigu ghwahitta nea sippuus ak ea sisissin nea manda jeeda sih.

⁴⁵ Ghang'eat gawa ak gweadu meangeenda suuk ispwa, munyas ea ghwalabwa hoowa niny, ak ghapka sean ghamway jeedeaba siisi; amaduw gamunyiit seareedeaba siitta ea ghwalaabwa hoowa dea ghayi bea mwadi. Nii gichchea gawuurji gil aba seaygeeni ghamneawa munyasiin.”

Gheamatta Yeesu ea oorjooga geennyeah Yeesu

⁴⁶ Damanda duu gabaloola sea buuneeda, hea ghwahidu ghaamwat sea oorjooga ghaamwat ak ghaminaada aba gidaghuut nea gagasa goobalool.

⁴⁷ Ghwalamda Siyagi ak gwayeeshsha, “Ng'ulla gwanda geamadu ea oorjooga geamadu jarooda ghaminaada nea gagasa goobaloolnyi.”

⁴⁸ Ghwasha nea gwayeeshsha siitta adaw iittean, “Iyya ng'eaha, ama oorjooga giyeanya geabeang'a?”

⁴⁹ Ng'atta ghamiin giinealangaaschi nea gwayeeshsha, “Ng'ulla iyya ea oorjooga giyyeanya!

⁵⁰ Aba gideaba siida wassean nyoo gwasin gitta bwariiy Bwaabwa mida humng'eedean, siisi abeeda oorjeeda giyyeanya gil, ea huda giyyeanya, ea iyya.”