Mattayo 11 - NEAJEEDA EESH BEA BUUNEESSEAN

Fuga ajeagu Yohaaneeda Abattiisachchi

¹ Iing'atta gidawda adadaw Yeesu giinealangaaschi attamaniyyeenya iittaannyi, ghabeawa hoowa ak gawa goonealshi aba jeeda mujiinajeega nyaawa nea gwarukkwiida Giijasta miy.

² Iiduw nea ghwayiiy Yohaaneeda Abaattiisachchi iitta gissina Yeesu nea gwanda ghealooniga, hean goojeakta giinealangaaschi ghoanyaash

³ nea gwayeeshsha, “Assang'iingi guwosi siida ghayi jea ghwahidu ghana jea eefurda nuut?”

⁴ Ghwasha Yeesu ak gwayeeshsha saawa, “Aweayeena ak goorukusi Yohaana iitta ng'asheega oayiinyi ea gea oadaayi:

⁵ fuga ng'oawwi ghoang'wearda, fuga badeeda gaweelweel, gea bearji udamusuura geammidu, gea miinyi gwayiing'shi, fuga meewa gwaduuttu nea fuga barbari geerukusa Giijasta Miy.

⁶ Nea ghang'wana siida mwasta gil appadaydeanyu.”

⁷ Ngeatng'eat gabiikta, gwarukusa Yeesu emeeda ghwanyawa badageat iitta Yohaana, “Gooweayi adaaha naaha aba dareapcheeda? Nyeeshtooda ayuuk jeammeeda?

⁸ Abeeda gooweayi adaaha naaha? Siida akkwa hang'weakka oormajeega? Ng'ulla fuga akkweali hang'weakka oormajeega goobiitta gealga sugoodiga.

⁹ Abeeda ghwasaan andagooritti? Gooweayi adaaha naaha? Sibaneeda? Eah, geayeeshshiineegwa eara daahaweewa sibaneeda.

¹⁰ Nii siida sung'oorsa ng'asheesuun gil, ‘Ng'ulla aniini geajeagu giijasoochcheandeanyu madeeda gheanyangaang'u, jea gwasinneey naweadang'u aba madeadaang'u.’

¹¹ Aba huumwa geayeeshshineegwa, manda siida wassean aba gea jii gadeemga dea haweewa Yohaaneeda Abattiisachchi eara siitta siyi amwanang'eawa sean aba jeeda sugoochcheandumeeda humng'eedean ahaweewa niny.

¹² Ghang'eada askwearjoojiga Yohaaneeda Abattiisachchi ea gagul ghamneawa sugoochcheandumeeda humng'eeda subwasay, nea fuga bwasay gageanda aba uurda.

¹³ Aba gideaba ghang'eada sibanga ea deaweeda gwaramoorani eaghwahitta damanda Yohaana;

¹⁴ nea iyoagasayi amwasa niny ea Eliyayda jea ghwaani.

¹⁵ Siida mideawa iidiga ea dayiing'shi!

¹⁶ Asi gaydagala naaha seaygeani? Gawuurji diibiga mida naada, guuriisa suurja nea gwayeenniisa,

¹⁷ ‘Geang'waschi, ak ea mwoang'wasi; geeyyeawdi, ak ea mooyyeawdani.’

¹⁸ Aba gideaba ghwahidu Yohaana ak ea meagiischi nea mwali gil, ak gwayi, ‘Gwandeawa meangeenda;’

¹⁹ ghwahidu Balleanda Siida ak gweagiischi nea gwaleeshi, ak gwayi, ‘Ng'ulla, nii aadeaw nea boogideati, nea gwaduupchi fuga ang'ng'oonyi gwaadi ea fuga riing'eega!’ Amaduw weaghumeeda ea nidaajiit aba sinaweagaaschi.”

Mujiinajeega mandeawana masaweega

²⁰ Iimuchchu goojuursa mujiinajeegiga ghayi sissa niny ng'asheega deamdeameadi ak ea madukkuunana riing'eega nyawaan.

²¹ “Eamuy deang'wa Gurasiini! Eamuy deang'wa Betsayda! Aba gideaba ng'asheakka ghayi deamdeameadi sisissa jeadeang'wean, inyeada ghayi geasissa mujiineada Diro ea Sidooni, gajeenigeawiit gwadukkuuna ng'asheaga munyas ak ghwayeashta deareada nea gookkwa guniyajeaga.

²² Asi geayeeshshineagwa, gajeawussus gideaba gayghamilikghta ghoorjooda nyaawa Diro ea Sidooni ea ghwalaabwaneegwa hoowa.

²³ Eara angiing'i Gapernaumu, gajeettiing'neey ea gula humng'eeda? Gajeahing'neayi ea una jeeda maloonghajeega. Aba gideaba inyeada ghayi ng'asheaga deamdeameadi sisin aba ng'eang'deang'wa geesissa mujiineeda Sodooma, gwachchi mujiineetta gajeagudugwanda ea gagul ghamneawa.

²⁴ Ak gaydayeeshshineegwa, eaweetta girgweaksinda gaynyasa ang'iing'i ghorjooda haw adaraam dea Sodooma.”

Apkaani heedeanyu ak gofuufchi

²⁵ Aba damandida gwayi Yeesu, “Geabadiischoweey ea Bwaabwa was Ng'uttamiida humng'eeda ea ng'eanyiida, aba gideaba gufnyi ng'asheesu fuga weaghoodi ea fuga mideawa fughareenga akkihiimsi diibiga manang'i;

²⁶ ea Bwaabwa nii gweagu gideaba gidubwariiydi, ang'iing'i gil.

²⁷ Nugoonan Bwaabwa haleanjeessean. Manda siida nal Balleanda geaghus Ghweanda, ghana siida nal Bwaabwa geaghus Balleanda ghana siida wassean gasa Balleanda goohiimsa.

²⁸ Apkaani heedeanyu oagasean agoogeeda deawiit nea ghabwanyeagwa sareenda, ak gaydeafuufeegwa.

²⁹ Aghasana geat jookkeedeanyu, ak ghoanalanaan ng'asheega; aba gideaba aniini geewoschi ng'eeni nea geayeadayi geaw ng'eanyi aba guroroodeanyu, ak abeeda gajanyasa hoseaneega aba jeesingeagwa.”

³⁰ “Aba gideaba jookkeedeanyu ea bumbun nea sareendeanyu aassas!”