Mattayo 10 - NEAJEEDA EESH BEA BUUNEESSEAN

Giijasoodi damaniyyeenya

¹ Gaguursa giinealangaaschi attamaniyyeenya, ak ghoadaw gheambalmeeda jea gooruutteawa meangeenda munyas nea ghoahaap geeyoonung'weakka ea sawanaduutka sean.

² Gheawungeaba giijasoodusu attamaniyyeenyean ea suhu, dea madeeda Simoneeda suguura Betrohi ea oorjeeda ghaamwat suguura Andereya, ea Yakkobo balleanda Sebedaayo ea Yohaana oorjeeda ghaamwat.

³ Filippo ea Bartolomaayo, Domaso ea Mattayooyda ghayi ang'ng'oonyi gwaadi, ea Yakkobo balleanda Alfaayo, ea Dadaayo.

⁴ Simoneeda Ganaani ea Yudaayda Iskariyootte ghayi laabwadaw Yeesu.

Gijeakteayda fuga attamaniyyeenya

⁵ Goojeakta Yeesu giijasoodigiga attamaniyyeenyean ak ghoadaw giijasta nea gwayeeshsha, “Adooweeyi jeeda daroorakka Emoojiga, ghana jeeda mujiineeda wassean bea Samariya.

⁶ Ghang'wana ghoang'ng'waanyi naweeda aweayeena heeda gisilga roodeadi bea Israeeli.

⁷ Aba jeeda neayeedeang'wa arukkwiida gideaba, ‘Sugoochcheandumeeda humng'eeda nineekkiit.’

⁸ Oahaabwa fuga miyeani, ak goottuudu fuga nimeewa, nea ghoammidu fuga bearji udamusuura, nea goorruutti meangeenda. Geegooneegwa mwadaagha, oattayda mwadaagha.

⁹ Adoayadi jeesinga shageenigeawa lappiya ghana lagheanga meeng'meeng'i sisinna lappiya wassean, ghana heelajeega,

¹⁰ ghana shageeda naweeda, ghana hang'deaba iyyeenya, ghana geekka ghana bileang'ida. Aba gideaba siida gadiyeeda gammiisa nyasitta daghwardaannyi.

¹¹ Iyoweayi jeeda mujiineeda wassean ghana gharang'da, googasayi siida deaptaneagwa biissa adoabiiwaat ak gooppiidi gheannyi ea abeawana hoowa.

¹² Iyooweayi jeeda gheeda gookkeachcheewi fuga bea gheeda.

¹³ Nea gheetta iimiisa hoyyooydeang'wa, abeeda danyasa hooyyooydeang'wa. Ama deappa ea mammisiina abeeda hooyyooydeang'wa gaygabiikseegwa agooga.

¹⁴ Nea siida iimwadeataneegwa ghana ghaheawa gooleeysiit ng'asheegeagwa, iyooritteawi gheetta ghana mujiineedida, ghoalalakti birjeanda mida geeshangeagwa.

¹⁵ Aba huumwa geayeeshsheegwa eaweetta girgweaksiinda gajeawussus ng'eanyiida Sodooma ea Gomoora gamilikghteaysa ghorjooda eaweetta girgweaksiinda ea ghang'al mujiineetta.”

Ghabasta jea ghwahidu

¹⁶ “Asi Aniini geajeakteaydaneegwa gisilga jeeda suyeekka; asi andeawana weaghumeeda ea awuurjeewana ichchibooda, nea goong'eeniitti ghariibajeanda.

¹⁷ Ashageada Buuneeda aba gideaba gayghwaadeagwa gheeda siirgweachcha nea ghabwareagwa aba jeesinga gealga nyaawa siinnealshachcheewa.

¹⁸ Gajeayadeagwa madeeda sugoodiga ea dea fuga ahaaghwa ng'eanyiida appadaydeanyu, ak goomuwiisi Giijasta miy saawa ea fuga Emoojiga.

¹⁹ Asi isiyaadeagwa adootteemsheesi gichchea arukuta aba gideaba damandida gajeegooneegwa gichchea arukuta.

²⁰ Aba gideaba mii agooga gil fuga jea gabalool, gaygabalool Gurorooda Ghweandeang'wa aba jeesingeagwa.

²¹ Siida gayghwalabadaw oorjeeda ghaamwat enuus, ak ghwalabadaw ghweanda jeaptaannyi, nea gwayamsa geat diibiga ghweaniga nyaawa ea gheamadiga nyaawa ak ghabwar gameewa.

²² Nea gayghwasteagwa buuneassean aba gheawungeasu. Nea siichchea ghamilikghta ea gammudean abeeda ea siichea eelealu.

²³ Ighabwaseagwa buuneeda aba mujiineani, goomng'awsi mujiineannuut. Aba huumwa geayeeshshineegwa majaduulni mujiinajeega ng'eanyiida Israeeli nea miighwahidu Balleanda Siida.

²⁴ Giinealaneeda mwoammu ghang'al giinealshoochchaandaannyi; nea eara soomjeanda ea mwoammu ghang'al siida haw adaw gadiyeeda.

²⁵ Ghwahit iwuurji giinealaneeda sea giinealshoochcheandaannyi, ak gawuurji somjeanda sea siidaannyi haw bea gadiyeeda. Abeeda iisuguura siida bea gheeda Beelsebuuli, heappi abeeda ea maygwasissa ng'asheega munyas muuchchi fuga mida jeedeaba gheannyi.”

Siida miisa gheawalmeeda

²⁶ “Asi adoawwalli saawa aba gideaba ng'asheanda funyaat gajeajaat, nea gitta funyaadiin gajeattahaach.

²⁷ Ng'asheanda earukuneegwa aba jeeda misaneeda, oorukuta aba eeshpwara; nea ng'asheanda oayiinyi meang'shooda, arukkwiida aba uhuuda gheeda.

²⁸ Adoawwalli fuga ammu gwanuus saseeda ak amwoammu gwanuus gurorooda; ghang'wana giiwali siitta ammu gwanuus saseeda ak gwajaksa gurorooda jeeda maloonghajeega.

²⁹ Heappi udabwaraadaji iyyeenya meesheahhideawana heelajeanjagi? Eara akkalealla mwoammu goobissa ng'eanyi nea mwamwasa Ghweandeang'wa.

³⁰ Nea agooga eara buudeega iheengeagwa ea siyiida sean.

³¹ Adoabealli, agooga; ghoang'alli udabwaraadajeega saang'a.”

Masaweega ea gissiheawaatta Gristo

³² Siida mwasan aba madeeda buuneeda, abeeda earanini gaydamwas niny aba madeeda Bwaabwa mida humng'eeda;

³³ nea siida wassean jea ghaheawanaan aba madeeda buuneeda, eara aniini gaydaheawa niny aba madeeda Bwaabwa mida humng'eeda.

Meanni hoyyoo geadu ng'uchcheeda

³⁴ “Adiiduw ghoaghannyi gili eayeadu hoyyoo jeeda ng'eanyiida; meayeanni hoyyoo geayeadu ng'uchcheeda.

³⁵ Aba gideaba ghawunnyi deang'uuchchi siida ea ghwaan, ea huda ea ghaamwat, ea gatmooda ea ghamasiyeeda;

³⁶ weajoodiga siida fuga gheannyaawa.

³⁷ Siida bwariiy ghwaan ea ghaamwat ea ghwalabwanaan hoowa siisi mammisean; siida bwariiy balleanda ghana huda ea ghwalabwanaana hoowa, siisi mammisean;

³⁸ nea dea mwasara behiidannyi ak gweada geeshteanyu ea mammisean.

³⁹ Siida agaba aweagaaschi gaygahutteawi, nea siida hutteawi aweagaschi appadaydeanyu gaygwalealu.”

Gimearda

⁴⁰ “Siida deaptaneegwa ghwadeaptanaan aniini, nea siida deaptanaan, ghwadeapta siida ghayi ajeaknean.

⁴¹ Siitteapta sibaneeda aba gideaba sibaneeda gil, gayghwanyas giimearda sibaneeda. Dea deapta siida doabiiwaat aba gideaba ea doabiiwaat eara niny gayghwanyas giimearda doobiiwnatta.

⁴² Siida wassean jea ghoadaw siiyagi aba jeedeaba fiisu manang'iin beega garbappi aba gideaba giinealaneeda, aba huumwa geayeeshshineegwa eara niny mayghwaroat giimeardaannyi.”