Marko 9 - NEAJEEDA EESH BEA BUUNEESSEAN

¹ Gabiikta Yeesu ak gwayeeshsha, “Aba huumwa gaydarukuneegwa gideaba aba jeani hiji gwanda fuga maygameewa ea eaghus anidaah gheambalmeeda Aseetta gidahittaayda nea gweadu uurda.”

Yeesu ghwayamwa deakta

² Ing'atta eawooji lah, ghwaat Yeesu Betro bea Yakkobo ea Yohaana uhuumba gijeeni geaw nea gaba geat. Iiduw aba hoowa ghwayamwa deaktaannyi ammadeannyaawa,

³ ak eara hang'waakkaaschi gaweriidi muuchchi. Eara aba jeeda ng'eanyiissean ghanyeamanda siida ammu gohuun hang'weakka ea gawerittiidunu.

⁴ Deagheatta geadaah Eliya ea Muusa nea gabalool sea Yeesu.

⁵ Gwayeeshsha Betro Yeesu, ea, “Ginealshoochcheanda, amiy muuchchi gideaba geendi hiji. Anda meesni ghooraji samwagu aba hiji. Ghoriida mabeanyi ang'iing'i niirja gaba Muusa, nea niirja gaba Eliya.”

⁶ Abeeda Betro ea oorjooga ghwanyawa anung'ut muuwda ea ghwaroot eara gichchea gwargu.

⁷ Miighoaw gil ea nuhoonu shamoghooda ak gwadukuta. Ghwanya ghuutta Siida nyaasha jeeda shamoghooda nea gwayi, “Nii Jeepteanyu abwariinyi olleysiiniit.”

⁸ Miighoaw gil ghoang'wearda Ginealanga gichcha, ak amwadaaha siinuut geaghus Yeesu akghwahit ea saawa.

⁹ Iiduw nea ghwararang'aadawa gijeeda gwayeeshsha Yeesu, asi adiiduw goorukusi sih ng'asheega ghwanyawa oadayiin ea eaghus ea nuduunna miyeeda Balleanda Siida.

¹⁰ Ng'atta Ghoang'ng'waay ng'asheanji, amaduw gwasheang'nyi Saawa nea gwayi gwadeaschi naaha ng'asheanji bea dunnooda miyeedean.

¹¹ Iiduw Geannyaash Yeesu nea geyeeshsha, “Anda gwayeena ginealshoodiga Diini gayghanyi goshoohu Eliya?”

¹² Gwayeeshsha, ada huumwa, “Eliya gayghanyi goshoohu ghwaan gwasissin halanjeassean. Eara gwasa, ghwasaan anda geang'waar aba jeeda Ng'ooruutka Ghaydit gideaba, Balleanda Siida gayghwanyas hang'weanidooda muuchchi nea gefool?

¹³ Geayeeshshineegwa, Eliya ada nihidu, ak gwasma Buuneeda gidagassiida saawa, gawuurji gidaghayi sung'waarda appadaydaannyi.”

Yeesu ghoahaap balleanji beardooschi meang'nyeandeenda

¹⁴ Gaweay ama hitta heeda ginealanga suurja ghwadaa emeetuw nibattiisa geat hoowa, nea gwasheang'dooschi sea ginealshoodiga mwaatkwa bea diineeda Yahuudi.

¹⁵ Daa Buuneeda Yeesu ghahamng'eanyi muuchchi. Gwasalda gaweay roonnyeeda Yeesu ak gogeachchi.

¹⁶ Gwayeeshsha Yeesu ginealangaaschi, “Ghwanyawa gosheang'nyeesi naaha ooga fiisu?”

¹⁷ Deagheatta gwarinna Sih jeeda emeeda ak gwayeeshsha, “Ea Ginealshoochcheanda, heetta geyeadu headaang'u balleanji itteanyu beardooschi meang'nyeandeenda nea iissa ghwanung' ghwaroat eara ghuutta.

¹⁸ Inyeessa ibalaksa meang'nyeandeenda gwajaksa ng'eanyi nea gabaru ghuutta furghwajeega nea gowiiri geeshatka nea ghabwarghanda. Iyeayeeshshi ginealangaagu orruutta meang'nyeandeenda ghwaraay.”

¹⁹ Gwayeeshsha Yeesu saawa, “Anda agooga gowoschi seaygeeda mandeawana masaweega! Assagooga gaydeabiita heedeang'wa ea ghoaw eeju? Gaydabattiseegwa ea ghoaw eeju? Heappi ayeanni hedeanyu.”

²⁰ Geyeadu balleandida heeda Yeesu. Daa Meang'nyeandeenda Yeesu ghwanung' ghoahiil balleanda ak gobedeaysa ng'eanyi ak goberbeershi nea gabaru ghuutta furghwajeega. Gwayeeshsha Yeesu ghweanda balleanda,

²¹ “Miyeanji gaba eeju?” Gwayeeshsha Siidida, “Ghang'eada jeepcheandumeadaannyi.

²² Nea iissa gwajaksa Meang'nyeandeenda jeeda beasta ea jeeda beega, nea gagasa nuusta. Asi immuusi, Gibwaydaneasa ak guweachcheasa!”

²³ Gwayeeshsha Yeesu, “Gwayi immuusi gili! Aba siida mideawa masaweega manda gichchea gwadilna.”

²⁴ Gojuur Siida nea gwayeeshsha, “Asi geandeawi masaweesu miihaw nea giheannean.”

²⁵ Daa Yeesu gidawamwaanda emeettuw madeadaannyi gabiissa gojuursa meang'nyeandeenda nea gwayeeshsha, “Meang'nyeandeenda inung' ghwaroat ghuutteaba jeebi nea ghaminyiit, geayi ritteawana saseedeaba jeebi nea adiiduw gudubiiksiina gichcha!”

²⁶ Gojuur Meang'nyeandeenda nea gwajaksa balleanda ng'eanyi ak gwaritteaysa. Iisung'ula balleanda aba ng'eanyi ea nuwuurji musta ea gwayeena buuneessean, “Nimi!”

²⁷ Gageanu Yeesu ak ghoang'ng'waay geattinda balleanda ak gagatgat. Hean ghang'eat ghaminaada.

²⁸ Iiduw nea nuwa Yeesu gah, gaweay headaannyi ginealanga nea gaba geat ak ghoanyaash nea gwayeeshsha, “Ghwasaan anda ghwanyawa aseasa gearaanyi errutta?”

²⁹ Gwayeeshsha Yeesu saawa, “Meang'nyeanji bea endean gaba giikka ama jea gwaritta geaghus eamwaash Aseettean gil.”

Yeesu gabiikta gabaloola ng'asheega miyeadannyi

³⁰ Gawa Yeesu nea godeayi ginealangaaschi, Gaweay nea gwasik jeeda ng'eanyiida Galilaaya. Abeeda Yeesu niny magassa ghwanal buuneeda heeda mida.

³¹ Nea nii abeeda gwasin gideaba niny iyanaal ginealangaaschi gwayeenniisa, “Balleanda Siida gajeenung' goobissa geattinga buuneeda jea ghabwar ghami. Nea ing'atta eawooji samwagu gaygwaduudu.”

³² Abeeda Ginealanga mwanala ng'asheanji ak ghoawal ghoanyaash.

Siida haw ng'eaha?

³³ Ghwahitta ng'eanyiida Gapernaumu. Iiduw nea nuweay jeeda gheeda ghoanyaash Yeesu ginealangaaschi nea gwayeeshsha, “Ghwanyawa aba naweeda gosheang'nyeesi naaha?”

³⁴ Ghwasiinda Saawa, aba gideaba gwachchi nea gwanda naweeda gwasheang'nyeesa gideaba ahaw ng'eaha aba jeannyaawa.

³⁵ Hean iiduw gawa Yeesu goopteada ak gaguursa ginealangaaschi attamaniyyeenya. Gwayeeshsha, “Siida gasa ghang'atta madeedeaba suurja dayiina geaw ng'eanyi ea gahuuydeana buuneessean ea ghoaw siida gadiyeesa buuneessean.”

³⁶ Gaguursa jeebi mwanang' ak ghwanung' ghaminaada aba madeannyaawa. Gageanu ak gabeashsa geattingaaschi gheatta jeepta ak gwayeeshsha,

³⁷ “Siida deapta jeepta uurji nii aba gheawungeasu, ghwadeaptanaan aniini. Nuut siida deaptanaan aniini mwadeaptanaan aniini akghwahit, ghwadeapta eara siida ajeaknean.”

Siida mwahasheasa gaba meatkweedeanya.

³⁸ Gwayeeshsha Yohaana Yeesu, “Ea Ginealshoochcheanda, sidaayi siida aruttiida meangeeniga aba gheawungaagu. Geyeeshshi nung'waada aba gideaba siidida mabwaheasa.”

³⁹ Gwayeeshsha Yeesu, “Adagudochchuursi, manda siida jea gwasin deamdeamanga sunu nea gwasna gheawungeasu amaduw gwasheamu gwarukuna badaydeanyu ng'asheega munyas.

⁴⁰ Aba gideaba siida mwahasheasa siisi gaba meatkwedeanya.

⁴¹ Ama siida wassean jea gagoonaneegwa beega jea aleaha gideaba gowoschi fuga Gristo siisi aba huumwa eara niny majaghanyi amwanyasa gimeardaannyi.”

Haleanjeeda eattu ramaseannyeekka

⁴² “Siida wassean jea ghwanung' ghwaramwasta siyagi aba jeedeaba fiisu manang'i mwasaniin ak ghwanung' gwasin ring'eeda, siisi abeeda ghang'wana gegeanu lagheaneeda haw bea ng'ealdeayda ak geerassa gheattannyi ama hit geejaksa jeeda basooda.

⁴³ Iinung' geattindaang'u, adiinya gilaji! Ghang'wana ginyasi eaweega nea gibeahi gattinagi, mwasamwa gideaba gindeawi geattinga sean ak guwi jeeda beasta manda mudeanooda. [

⁴⁴ Aba hoowa gwanda ghughuutka mameewwa, ea beasta mammissa.]

⁴⁵ Eara geashtaang'u iyaschoardaneey ghang'wana gilaji. Ghang'wana ginyasi eaweega eara beaha geashagi, mwasamwa gideaba gindeawi geashangaagu duwaaw amaduw geejakseey jeeda beasta manda mudeanooda. [

⁴⁶ Aba hoowa gwanda ghughuutka mameewwa, ea beasta mamissa.]

⁴⁷ Eara gheang'daang'u iyaschoardaneey, ghang'wana giloodu! Ghang'wana guwi jeeda gheambalmeeda Aseetta nea gibeahi ghaang'agi. Mwasamwa gideaba gindeawi gheanyangaagu duwaaw amaduw geejakseey jeeda beasta manda mudeanooda.

⁴⁸ Aba hoowa gwanda ghughuutka mameewwa ea beasta mamissa.

⁴⁹ Gaygaba siisi simmiinna beasta.

⁵⁰ Balang'da gida miy gil. Amaduw balang'da inuhutta samneadaannyi gaygudu esma naaha? Gagasa ahuuwa balang'da aba jeedeang'wa nea gobeayi hoyyoo nea gororoochchi.”