Marko 7 - NEAJEEDA EESH BEA BUUNEESSEAN

Ng'asheega sing'ng'wanyaana fugeaba garayi

¹ Ghapka fuga mwaatkwa was Farisaayajeega nea godeana ginealshoodiga diineeda Yahuudi nea gwaleabu Yerusaleemu ama hidu goweameesa heeda mida Yeesu.

² Hidu nea ghoang'wearda ghwadaa ginealanga mwaatkwa bea Yeesu gweagiischi nea meahuuna geattinga.

³ Aba gideaba fuga was Farisaayajeega ea fuga sean was emeeda Yahuudi inyeessa gwasinda ng'asheega gidaghayi ang'ng'wanyaanda fugeaba garayi; iissa ea mayghwaak gil nea meahuuna geattinga muuchchi.

⁴ Saawa mayghwaak gida leabu jarooda nea menyooghanyi ehhuun. Gwanda seareeda ghayi sing'ng'wanyaan inyeessa gehhuun gweerajeega, ea dahuunatka, ea bwakkurajeega gharinga.

⁵ Ghoanyaash Yeesu, fuga was Farisaayajeega sea ginealshoodiga diineeda Yahuudi, “Ghwasaan anda ginealangaagu moang'ng'waanya ng'sheega ghayi bea fugeaba garayi? Eara iyagiischi ghwaakta geattinga mehhuuna?”

⁶ Ghwalamda Yeesu ak gwayeeshsha, “Fuga ammiittu geat! Niiw huumwa ramoraneeda ghayi rukutteawa. Isaya badahukkeagwa, ‘Ghayi gwayi Aseetta, Fiisu gwasinnunean mureeda aba ghuusiga akghwahit, nea guroruunatka nyaawa easheagewean.

⁷ Earra gabattean ghanyea maygwaloossa gil. Aba gideaba goneali buuneeda humeannyeekka mawasa geasu was gea buuneeda.’

⁸ Agooga ghoanung'waadi digheanda Aseetta ak ghoang'ng'waanyi fughareenga buuneeda.”

⁹ Gabiikta Yeesu ak gwayeeshsha, “Agooga gowoschi milmili. Ghoanalli amulsiina deaweedeeda Aseetta aba ng'asheegeangwa oang'ng'wanyaannyi.

¹⁰ Ghayi gwayeeshsheegwa Muusa, ‘Sissiina gweanu ea geamadu mureeda.’ Nea, ‘Siida imwaashta ghwaan ghana ghaamwat gagasa ghami.’

¹¹ Ghoayamnyi Agooga ak goyeeshshi, ‘Siida imideawa gili ghwanyawa jea ghoadaw ghwaan ghana ghaamwat, amaduw gwayi gili Gorbani.

¹² Abeeda siisi gajeaninyas gidajeagamulsiinda weetta ghwaan ghana weetta ghaamwat.’

¹³ Nii ghamneawa Gidofooldi ng'asheanda Aseetta gil, aba ginealshoodeang'wa oang'ng'wanyaadi. Nea goosnayi eara ng'asheega saang'a uurji suh.”

Ng'asheega ng'utta buuneeda ririnnyeanda

¹⁴ Ghabwadageat Yeesu emeeda ama hit gwayeeshsha, “Oalleaydiit oagasean ak gojeeng'u.

¹⁵ Manda gichchea gawa jeessiida leabu jarooda, jea ghang'uda siida ririnnyeanda. Amadukku ng'asheanda leabu jeessiida ea gea ng'utta siida ririnnyeanda gil.” [

¹⁶ Siida agar iitta adayiinya ng'asheesu.]

¹⁷ Iiduw nea gwaheelli emeeda nea gawa jeeda ghoriida ghoanyaash Ginealangaaschi ng'asheega gwachchi galla geadiin.

¹⁸ Gwayeeshsha Yeesu, “Asseara agooga moanali? Moanali gideaba gidawea jeessiida leabu jarooda, mwoammu ghang'uda siida ririnnyeanda,

¹⁹ Aba gideaba mawa jeeda gurorooda, gawa jeeda siyeakkiisa hamitta. Amaduw gwaritta jarooda.” (Aba sareani Yeesu gohiimsa buuneeda gideaba hamichchoojiga sean ghwadoabiiw.)

²⁰ Gabiikta Yeesu gwayeeshsha, “Siida geaghus ghang'uda ririnnyeanda ng'asheega munyas leabu jeadaannyi.

²¹ Aba gideaba ng'asheega leappu jessiida gwaleabu jeeda guroroadaannyi nea giikka munyasiini gil, nea hiseadayeandumeeda,

²² Ea gwadishta, ea nuusta buuneeda, mealuleega, shidoodeaba ghaang', munyinda, lachng'eanyiida, ririnynyeanda, geawunda gheang'da, ging'weakka, ghwarjeeda ea lendeeda.

²³ Ng'asheesu munyas seaniin gwaleappu jih ak gang'utta fii ririnnyeanda.”

Masaweespa gatmu

²⁴ Ghabeawa Yeesu hoowa, ak gawa ng'eanyiida Diro. Aba hoowa iiduw gawa jeemba ghoah nea magassa ghwanal sih amaduw ghwaraay ghafuy geaw.

²⁵ Abeeda gwanda Gatmooni mida jeebi ittaannyi bea haweega beardooschi meang'nyeandeenda, nea aninyas iitta Yeesu, Ghwaan ama hidu gobedeaysa madeadaannyi.

²⁶ Gatmooni abeeda gaba emoojiga. Gaba ng'eanyiida Foynikkeeda mida jeeda Sirya. Hidu Gatmooni gwayeeshsha Yeesu, Aniyean nung' gwaritteaysa hudeanyu meang'nyeandeenda.

²⁷ Ghwalamda Yeesu ak gwayeeshsha, “Ameasa ghanyi gwalang'u diibiga, mwadoabiiwa gideaba gegeanu hamitta diibiga ak geejaksa gudajeega.”

²⁸ Gwayeeshsha Gatmoodida, “Ea Siida mureeda, eara gudajeega inyeessa goliim murmurga abuutpuut diibiga iyagiischi.”

²⁹ Gwayeeshsha Yeesu, “Aba ng'asheanji ghamneawa irguun, una ghoah hudaang'u niritteaysa meang'nyeandeenda!”

³⁰ Gawa Gatmoodida ghoah ama hitta ghwadaa hudaannyi gawiilgeaw aba bulaliida nea niritteaysa meang'nyeandeenda.

Yeesu ghoahaap siisi miiy manda ghuutta.

³¹ Ghang'eat Yeesu gawa ghang'amwa ng'eanyiida Diro. Gawa ak gwasik ng'eanyiida Sidooni, ak ghwahitta Basooda siyi Galilaaya, nea gwasik mujiinajeega attamanamughuush suguura Dekapooli.

³² Ghwahidu heeda Yeesu Fiisu eattu siisi miiy bissa ea manda ghuutta. Sihhiidu geyeeshsha Yeesu, aniyean mwasa ang'ng'waanya uhuudeaba siisi.

³³ Gageanu Yeesu siidida ak gorutteawa jeeda emeeda. Hit gageanu ak ghoabuutta mooringaaschi jeesinga iidiga, gang'ushsha nea gageanu ak ghwasat ng'ushapta.

³⁴ Hean gong'weersa Yeesu humng'eeda, amahit gosiima, ak gwayeeshsha siida ghwanyawa miyaan, “Efwatta!” Nea gideaba, “Jaadana.”

³⁵ Hean gabiissa ghwajaada idigeaba siidida ak goottina ng'ushapta, ak eara ghuttaannyi gabiissa ghoammu gabalool.

³⁶ Ng'atta gwayeeshsha Yeesu buuneeda, ng'asheesu easinnyiin adiiduw ghoanung' ghwayiiy eara siida. Nea iissa gidaheawaatta gideaba adoorukuti ada ghoaraanya buuneeda rukutteayda.

³⁷ Ghahamng'eanyi Buuneeda muuchchi nea gwayi, “Gwasin ng'asheega sean nea ghoadoabiiw, ghwanung' gwayiing'shi fuga miinyi nea eara gea manda ghuusiga gabalool!”