Marko 5 - NEAJEEDA EESH BEA BUUNEESSEAN

Yeesu ghoahaap siida bearji meangeenda

¹ Muchchu ghwahitta gigheawda basooda ng'eanyiida siyi Geraasi.

² Deagheatta nea gwarinna Yeesu jeeda maleambooda geadaah siisi mideawa meangeenda nea gwaleabu heeda sibunynyiisa buuneeda ak gwaroonnyi.

³ Siisi eajusu gobiitta hoowa sibunyyiisa buneedean nea ghanyeamanda siisi ammu ghwarat aba munyaloalajeega.

⁴ Nea eara isiratta munyaloalajeega ghana biingu inyeessa gang'achcheaweada sean nea ghanyea mwoammu sih ghwajoar.

⁵ Inyeessa Gojureadayyi eawa ea askweari nea gahoonna geaw hoowa sibunynyiisa buneedean ea jeesinga beareega nea inyessa ghabwashadawa geaw lagheanga.

⁶ Iiduw nea ghwadaa Yeesu nea gudeasheagi Ghafwach ama hitta heeda ghwahiiy geaw aba mureeda aba madeeda Yeesu

⁷ ak gojuur nea gwayeeshsha, Gendeeyeesi naaha Yeesu sea ang'iing'i, “Balleanda Aseetta haw? Geamuscheey aba gheawunga Aseetta adisawannyean!” (

⁸ Ghwanyaashtunu aba gideaba niyeeshsha niny, “Ritteaysiina siisi.”)

⁹ Ghoanyaash Yeesu nea gwayeeshsha, “Ghawungaagu ng'eaha?” Gwayeeshsha siidida, “Gheawungeasu geguura ‘Lugooda,’ aba gideaba aseasa geewoschi saang'a.”

¹⁰ Gamearmearani Yeesu nea gwayeeshsha, aniyean adiguttidaneasa aba ng'eang'i.

¹¹ Abeeda gwanda hoowa hawanda ukkurumajeega sihhaghwa aba geeshta heayeeda.

¹² Gamearmearani, Meangeenda Yeesu nea gwayeeshsha, “Nung' eweaya jeedeaba ukkurumajeegiga.”

¹³ Gwasiksa Yeesu lugoodida bea meangeendean, ak gwaritteaysa siidida ak ghoabitta jeeda ukkurumajeega. Abeeda ukkurumajeega gwariiksa sagalamnyooji iyyeenya. Gamng'aw ukkurumajeega ak ghoabuttaawa geat marechcheanda ak ghwaak basooda sean.

¹⁴ Gwasalda Fukkwachchi ahaaghwa ukkurumajeega ak gaweay ea ghwahitta mujiini ea heeda mawasa mujiini. Ghapka Buuneeda ghwadaa ng'asheega bunu.

¹⁵ Gaweay ama hitta hoowa mida Yeesuun ghwadaa siidida eawoojusu ng'uttooschi lugooda meangeenigean nea goopteada nea gookwa hang'daannyi nea nibiiksa fughareadaannyi, ak geabeal.

¹⁶ Iiduw gwarukusa Fukkwachchi daa ng'asheesu buneessuurja iitta gidabussa siitta bearji meangeendean ea iitta ukkurumajeega.

¹⁷ Hean gebiissa emus Yeesu gideaba ng'amwana ng'eang'deanya.

¹⁸ Daa Siidida nea gawa Yeesu jeeda maleambooda gamus godeayi.

¹⁹ Ghaheawa Yeesu godeayi siidida. Ghoadeal nea gwayeeshsha, “Una ghoah ak girukusi ng'asheega sean fuga ghaheang'wa ea gida nuweattaneey Ng'uttamiida ea gida nubwaydaaydaneey.”

²⁰ Gawa Siidida ak gwarukkwiida aloheeda ng'asheega miyaas sissa Yeesu aba jeeda mujiinajeekka attamanamughushiin. Nyas buuneeda iidi bea ng'asheesuun ghahamng'eanyi sean.

Giheapta hudeaba Yayro ea gatmooda waas weleeda hang'da Yeesu

²¹ Gwading'da Yeesu maleambooda ghoaghaawa basooda ak gawa ama wea gigheawda goreemsa Emeettuw gaweay ghwanyasa hoowa.

²² Iiduw ghwahidu heeda siisi suguura Yayro siisi abeeda gaba fuga hees ahaaghwa ghoriida fuga Yahuudi sinnealshachcheewa. Hitta Siisi gobedeaysa madeeda Yeesu nea gwayeeshsha,

²³ “Jeebi itteanyu mwanang' bea haweega ghabwar miyeeda. Eeniyean beenni waasana geattingaagu ak abeeda gayghahaap.”

²⁴ Ghang'eat Yeesu godeayi siidida. Ghabwang'aada emeettuw gamaseaw nea geasaabwan.

²⁵ Abeeda gwanda hoowa gatmooni aream foojeanda galeagasean gweannyeew damaniyyeenya.

²⁶ Gatmooni abeeda niduulu haleanjeedaannyi aba beatta gealga meanga nea ghanyeamalossiina eara gil gwareanyiisachchi muuchchi.

²⁷ Abeeda ninyas iitta Yeesu Ghwaat geeshta ak ghawaas weleeda hang'da Yeesu.

²⁸ Gwasin ng'asheanji nea gwayeeshsha Geaw, “Iyawaaschi weleedeaba siisi ghanalli gaydahaap.”

²⁹ Hitta nea ghawaasa geaw weleeda hang'da Yeesu deagheatta gageanda gireemdida bea foojeandean. Nea eara iisawsa saseadannyi ghwadaa nimajegiit.

³⁰ Jeeng'u Yeesu gidabeada nisuunya urdaannyi gwasachsa ghaat emeeda ak gwayeeshsha, “Ghawaas ng'eaha weleeda hang'deanyu?”

³¹ Gwayeeshsha ginealangaaschi, “Girukutaydiin nea gidaahi gidariistaneey buuneeda?”

³² Gong'weerng'weersa Yeesu meadajeega sean ghwadaa ea jea ghwanyas siida ghwanyawa waas.

³³ Iiduw nea ghwadaah, gatmoodida gideaba nihaap gaweesa Yeesu nea ghabwadanaada aba muuwda ama hitta gwatkuy aba madeadaannyi ak ghoadayda iitta sean.

³⁴ Gwayeeshsha, Yeesu gatmooda, “Balleanda gidahaapnyi masaweagaagu, una nea gibeahi seayu nea gagasa ea mabikseey geyoani.”

³⁵ Duuw gabalool Yeesu gatmoodida deagheatta ea sichcheagu fiisu leabu gheeh Yayro ak gwayeeshsha, “Yeeptaang'u nimi. Ghwasaan andagideawiidi ginealshoochcheanda?”

³⁶ Nyas Yeesu iidi ghoanaawa geaw ak gwayeeshsha, “Adibeali. Heappi ang'iing'i mwasa.”

³⁷ Hean ea modeayi fii suuk geaghus Betro, Yakkobo ea Yohaanayda gennyea Yakkobo.

³⁸ Ghwahitta gheeh Yayro ak ghwadaa Yeesu emeeda mwahawda heeda mwasakta dabeakka suurja gaguttu heareega nea ghoahaawda.

³⁹ Hitta Yeesu gwayeeshsha, “Anda agooga goyyeawdi nea mandaneegwa eara hawdaaw? Balleanda eara miyeeda miighami. Gabeachchi ruweanga akghwahit.”

⁴⁰ Gabarra rear buuneeda. Hean goruutta buuneessean jarooda ama hit gaguursa ghweanda jeepta ea gheamatta jeepta ea ginealangaaschi ghwanyawa adeana ak gaweay hoowa bea gah mida jeeptean.

⁴¹ Hitta Yeesu ghoang'ng'waay geattinda jeepta nea gwayeeshsha, “Dalittakum,” nea gideaba, “Huda mwanang' ng'eada!”

⁴² Deagheatta gafakna geaw ng'eanyi hudida ak ghang'eat gawa. (Jeeptida abeeda gaba gweenynyeew damaniyyeenya.) Ghwanung' ng'asheanji ghahamng'eanyi buuneeda muuchchi.

⁴³ Iiduw gwayeeshsha Yeesu buuneeda, Adiiduw goorukusi gili gwachchi easinnyiin. Ng'atta gwayeeshsha oattawa huda gichchaghwaak.